Dutolonomi 25 - Baibo Busansulushi Bwa Libuku Ili

¹ “Ono na bene Isilaeli bobilo bapusana balyeelete kuya kunkuta. Lyalo boomboloshi balaakupa mulandu uyo wabisha akuleka wooyo utacite mulandu.

² Na uyo wacaninwa mulandu wapingulwa kuumwa, moomboloshi ulyeelete kumulwiita ayi oone bufubeme panshi akwaambila umwi ayi amukwiipe. Ulyeelete kuumwa misako kweelana akubisha kwakwe.

³ Teelete kuumwa misako isotoka pamakumi one. Na yasotoka paapo, inga wasebaana pameenso a bantu.

⁴ “Mutafwaliki cinsangala musune utoomulyatweetaako maila kwaamba ayi alupuke.

Sheelete kucitwa na mukwanu wafwa

⁵ “Na basankwa bobilo bamukowa kabekala pantu pomwi, ono umwi wafwa kaatacite mwaana musankwa, mwanakashi uyo wakacaala taaelete kuya mukweebwa kumuntubo, sombi kumukwabo musankwa wafwa.

⁶ Mwaana musankwa mutaanshi kushalwa ulyeelete kutumbwa liina lya wooyo wakafwa, kwaamba ayi liina lya mufu uyo litaloobi mucishi ca Isilaeli.

⁷ Sombi na mukwabo uyo kaatasuni kweeba mukamukwabo, mwanakashi uyo ulakonsha kuya kubamaloba kumwinjililo wa ndabala akwaamba ayi, ‘Mulamu wangu wakaka kubusha liina lya mukwabo pakati ka bene Isilaeli. Wakaka kucita kweelana amulimo wabumulamu kuli ndime.’

⁸ Lyalo bamaloba bamundabala iyo balaakumwiita akwaambaakwe. Ono na watolelela kwaamba ayi taasuni kumweeba,

⁹ mukalubinje mwanakashi uyo ulyeelete kuya kuli nguwe pameenso a bamaloba abo, akumufuula nkwabilo yomwi alimwi akumushipila mate kumeenso, akwaamba ayi, ‘Ici ncecicitika kumusankwa ukaka kubusha litongo lya mukwabo.’

¹⁰ Mpeeke bamuŋanda ya musankwa uyo mucishi ca Isilaeli balaakunokwiitwa ayi ‘Bamuŋanda yakwe wooyo wakafuulwa nkwabilo.’

Milawo imwi

¹¹ “Na basankwa bobilo batoolwa, ono mukamusankwa umwi weelesha kufuna ibaye kwiinda mukucata musankwa umwi uyo kubuntu,

¹² kuteelesha kumunyumfwila nkumbu. Mulyeelete kumutimbula lyaansa.

¹³ “Tamweelete kweenda ashipimo shobilo, cimwi cancinencine sombi cimwi cakubeca.

¹⁴ Alimwi tamweelete kuba ashipimo shobilo shipusene muŋanda, cimwi cakasuminishikwa, sombi cimwi ciniini cakubeca.

¹⁵ Mulyeelete kuba ashipimo shancinencine alimwi sheelete, ayi mukekale nshiku shiinji mucishi ico Mwaami Lesa, Lesa wanu ncaatoomupa.

¹⁶ Mukwiinga Mwaami Lesa, Lesa wanu ulipatite muntu woonse ubeca.

Mbobakalwiitwa kucaya bene Amaleki

¹⁷ “Amwiibaluke bene Amaleki mbobakacita kuli ndimwe lilya ndimwakaswa mucishi ca Ijipiti.

¹⁸ Tabakwe kuloonda Lesa. Mwebo ndimwakalinga kulemete cakukopoka bakesa kwisule lyanu akucaya baabo boonse bakacaalila.

¹⁹ Paceebo ceeci, na Mwaami Lesa, Lesa wanu akamushiishe mucishi ico ncaatoomupa akumupulusha kubalwani banu abo bamushingulukite, mukacaaye bene Amaleki boonse kwaamba ayi kutakabi nabi womwi eshi akabeebaluke tubili. Kutalubaako kucita boobo!