Dutolonomi 24 - Baibo Busansulushi Bwa Libuku Ili

Shakuleka mwanakashi

¹ “Ono na musankwa umwi weeba, mpeeke muyanshiku, wayeeya kukaka mwanakashi uyo ceebo wamucanina kampenda. Kuswawaawo wamulembela nkalata yakulekana, wamupa akumutanda muŋanda yakwe.

² Na mwanakashi uyo weebwa kumwi,

³ sombi ibaye wabili alakwe wamukaka akumulembela nkalata ya kulekana akumutanda muŋanda yakwe, nabi na musankwa uyo wafwa,

⁴ ibaye mutaanshi teelete kumuboosha ceebo taasalalite. Mwaami Lesa taasuni sha mushobo uyo. Tamweelete kucita cibiibi ca mbuli ceeci mucishi ico Mwaami Lesa, Lesa wanu ncaatoomupa.

Milawo imwi ipusenepusene

⁵ “Na musankwa wakeeba onoono, teelete kuya kunkondo nabi kucita mulimo umwi uli woonse. Muntu uyu ulyeelete kwikala mwaaka wakabumbulu kwakubula kusebensa kwaamba ayi anoosangalasha mukaakwe.

⁶ “Ono na mwakakweletesha cintu muntu umwi, kuteelesha kumucatila mpelo nabi libwe lyakupelelaawo. Mukwiinga kucita boobo, nkumunyaya cimucafwa mubuumi bwakwe.

⁷ “Uyo woonse ucata mwine Isilaelinyina, wamufuba nabi kumuulisha busha, ulyeelete kucaikwa. Munshila iyi mulaakukusha bubi ubu pakati kanu.

⁸ “Kumakani a manata, mulyeelete kucita shoonse isho bapailishi bene Lefi nsheenga bamulwiita. Mulyeelete kukonkela milasho yoonse iyo njendabalwiita.

⁹ Amwiibaluke Mwaami Lesa, Lesa wanu ncaakacita kuli Milyamu lilya ndimwakaswa mucishi ca Ijipiti.

¹⁰ “Na mwakweletesha mwine Isilaelinyinaanu cimwi cintu, kuteelesha kwinjila muŋanda yakwe ayi mubwese cakufwala ca peculu ico ncaapa mukushomesha ayi ulaakuboosha.

¹¹ Mwebo mulyeelete kwiimikana pansengwe kwaamba ayi lakwe mwiine amuletele.

¹² Ono na muntu uyo ngumukandu cakufwala ca peculu ico ncaacatisha kuli ndimwe, tamweelete kucooneka kumishaanu.

¹³ Kamumubooshesha macolesha lyoonse ayi anoofwala pakoona. Lyalo ulaakukulumba, alakwe Mwaami Lesa, Lesa wanu ulaakukondwa ceebo ca micito yanu ibotu.

¹⁴ “Kuteelesha kunyengelela musebenshi wanu mukandu, abe mwine Isilaelinyinaanu nabi muswamashi wikala mundabala imwi yomwi mucishi canu.

¹⁵ Lyoonse kamumufolesha maali ngaasebensela lisuba kalitana kwipila mukwiinga ngumukandu, aboobo mpopali moyo. Na mwabula kumufolesha, inga walilila Mwaami Lesa ceebo ca ndimwe, mpeeke mulaakuba amulandu.

¹⁶ “Bamashali teshi bakacaikwe ceebo ca shibiibi sha bana babo, abalo bana babo teshi bakacaikwe ceebo ca shibiibi sha bamashali babo. Muntu womwi awomwi ulaakucaikwa ceebo cakubisha kwakwe mwiine.

¹⁷ “Kuteelesha kunyengelela baswamashi nabi bana banshiwa mumilandu. Alimwi taaku weelete kubwesa cakufwala ca mukalubinje mwanakashi ayi ncakushomesha kwaamba ayi ulaakuboosha nkongole.

¹⁸ Mulyeelete kwiibaluka ayi mwakalinga basha mucishi ca Ijipiti, ono Mwaami Lesa, Lesa wanu ngwakamufuna. Nceceeco ncendamupeta mulawo uyu.

¹⁹ “Ono na mutootebula shakulya shanu, akulubako mulwi umwi mumuunda, tamweelete kuuboolela. Amushiile baswamashi, bana banshiwa alimwi abamukalubinje banakashi. Na mukacite boobo, Mwaami Lesa, Lesa wanu ulaakumupa coolwe mumilimo yanu yoonse.

²⁰ Pakunooyapa maolifi, tamweelete kwiindulukaamo kuyapa. Ayo acaala mushiile baswamashi, bana banshiwa alimwi abamukalubinje banakashi.

²¹ Na mwatebula mumyuunda yanu ya minyansa linkanda lyomwi, tamweelete kwiindulukaamo. Iyo yacaala mushiile baswamashi, bana banshiwa alimwi abamukalubinje banakashi.

²² Kutalubaako ayi mwebo mwakalinga basha mucishi ca Ijipiti. Nceceeco ncendamupeta mulawo uyu.