Dutolonomi 23 - Baibo Busansulushi Bwa Libuku Ili

Bateelete kubungana abantu ba Mwaami Lesa

¹ “Taaku musankwa wakatungulwa nabi wakatimbulwa busankwa weelete kubungana abantu ba Mwaami Lesa.

² “Taaku mwaana wamucikupu nabi wa mulunyungu lwakwe kushikila akulishalane lyalikumi weelete kubungana abantu ba Mwaami Lesa.

³ “Taaku mwine Amoni, mwine Moabu nabi umwi wamulunyungu lwabo kushikila akulishalane lyalikumi, weelete kubungana abantu ba Mwaami Lesa.

⁴ Mukwiinga bantu aba bakakaka kumupa cakulya amaanshi lilya ndimwakalinga kuswa mucishi ca Ijipiti, alimwi bakeeta aBalaamu mwanaakwe Beyo wa mundabala inene ya Peto mucishi ca Mesopotamya, ayi amushingane,

⁵ Nacibi boobo Mwaami Lesa, Lesa wanu taakwe kunyumfwa shakaamba Balaamu, sombi wakaalula mashingo ayo kuba coolwe kuli ndimwe ceebo Mwaami Lesa, Lesa wanu ulimusuni abuumbi.

⁶ Mubuumi bwanu boonse, tamweelete kupanga cishibinda ambabo nabi kubacafwa ayi basumpuke.

⁷ “Kuteelesha kusebaanya bene Edomu, mukwiinga mbamakwabanu. Abalo bene Ijipiti tamweelete kubasebaanya ceebo mucishi cabo mwakekalaamo.

⁸ Bamulishalane lyabo lyatatu kuya kunembo, balakonsha kubungana abantu ba Mwaami Lesa.

Kubamba kabotu misumba ya bashilumamba

⁹ “Ono na mwaya mukulwana abalwani banu akuyaka misumba, mulyeelete kutalamuka kushintu shoonse isho sheenga shamulengesha kutanoosalalite kweelana aMilawo.

¹⁰ Na muntu walilengesha kutanoosalalite ceebo walota kukumana amwanakashi, ono waliwaalila, ulyeelete kuswa pansengwe lya misumba akunooshiite kweenka uko.

¹¹ Sombi mucoombesuba, asambe pamubili, lyalo na lyepila, ulakonsha kuboola mukati.

¹² “Mulyeelete kusala musena womwi pansengwe lya misumba ayi nkwakunooya mukulicafwila.

¹³ Pakunooya mukulicafwa, mulyeelete kunyamuna cakukabisha kalindi mpomweelete kwikala, akufukilaawo pakumanisha.

¹⁴ Misumba iyo ilyeelete kunoosalalite ceebo Mwaami Lesa, Lesa wanu uli amwebo pamusena apo mukumulama akulengesha ayi mukome balwani banu. Kuteelesha kucita cintu nabi comwi citaluleme ico ceenga calengesha ayi Mwaami Lesa, Lesa wanu amufutatile.

Milawo imwi ipusenepusene

¹⁵ “Ono na musha umwi waloboka mwaami wakwe, ono wesa mukuyuba kuli ndimwe, mutamubooshi kumwaami wakwe.

¹⁶ Ulakonsha kwikala mundabala yanu ili yoonse njaasuni, alimwi kutaba alunkutwe kuli nguwe.

¹⁷ “Taaku mwine Isilaeli musankwa nabi mwanakashi weelete kuba mufuule wa mumisena yakulambililaako bene Kenani.

¹⁸ Anu taaku maali acanikwa munshila ya mushobo wooyo eenga aletwa muŋanda ya Mwaami Lesa ayi ngakucita kweelana akushomesha cakulumbila. Mulyeelete kwishiba ayi Mwaami Lesa, Lesa wanu ulipatite bafuule abo.

¹⁹ “Na mwakweletesha mwine Isilaelinyinaanu maali, cakulya nabi cintu cimwi coonse, tamweelete kubooshelwa cakuba ampindu.

²⁰ Muswamashi inga wamubooshela ampindu, sombi kuteshi mwine Isilaelinyinaanu. Amukonkele mulawo uyu kwaamba ayi Mwaami Lesa, Lesa wanu akamupe coolwe pacintu cili coonse nceshi mukacite mucishi ico ncemutooya mukwikalaamo.

²¹ “Na mwashomesha cakulumbila Mwaami Lesa, Lesa wanu cintu cimwi, kuteelesha kucelwa kucita kweelana ambomwashomesha. Mukwiinga Mwaami Lesa ulaakunoolangila, aboobo na mwabula kucicita, mulaakupekwa mulandu.

²² Teshi kubisha na mwabula kushomesha cakulumbila kuMwaami Lesa,

²³ sombi na mwasunabo kushomesha cakulumbila nobeene, mulyeelete kucita kweelana akushomesha kwanu.

²⁴ “Ono na mwenjila mumuunda wa minyansa wa muntu umwi, mulakonsha kulya minyansa ili yoonse njemusuni, sombi tamweelete kulongela imwi mumutaanga pakunooswaamo.

²⁵ Alimwi na mwenjila mumuunda washakulya shili anga ngamaila sha muntu umwi, mulakonsha kulya shili anga ngamaila nshemukonsha kupulula kumaansa, sombi tamweelete kucesa acicekeshi.