Dutolonomi 22 - Baibo Busansulushi Bwa Libuku Ili

¹ “Na wabona ŋombe nabi mbelele ya mwine Isilaelinyoko itokweendaanabo, tooelete kwiilangabo meenso. Ulyeelete kwiiboosha kumwiine.

² Ono na mwineyo teekali pafwaafwi, nabi na toomwishi, lyalo inga weetola kumishaanu. Na mwineyo wesa ciilangoola, ulyeelete kumupa.

³ Ucite mbomunya ubo kumbongolo, cisani nabi cintu cimwi coonse mwine Isilaelinyoko nceenga wasowa. Kutalangaakobo meenso, sobwe.

⁴ “Na wabona mbongolo yawa nabi musune wa mwine Isilaelinyoko wawa, tooelete kumulangabo meenso. Umucafweeko ayi mubushe cifubwa ico.

⁵ “Mwanakashi taaelete kufwala shacisankwa, alakwe musankwa taaelete kufwala shacanakashi, mukwiinga Mwaami Lesa, Lesa wanu ulipatite bantu bacita shintu sha mushobo uyo.

⁶ “Na wacaana ciinswa ca muyuni kucisamu nabi panshi anyina kaali pamayi nabi abana bakwe, tooelete kubwesa nyina.

⁷ Twaana twalo inga watubwesa, sombi kuteelesha kubwesa nyina kwaamba ayi shintu shinookweendela kabotu akwikala nshiku shiinji.

⁸ “Na wayaka ŋanda, kweela ciluli mulyeelete kuyaka akalubumbu mweela ciluli coonse kukasha kuloka. Lyalo teshi mukabe amulandu na umwi akaloke akufwa.

⁹ “Tooelete kushanga mbuto aimwi mumuunda wa minyansa. Na ukacite boobo, teshi mbuto yeenka iyo njeshi ikabishikwe, sombi aminyansa yoonse.

¹⁰ “Kuteelesha kulimisha musune ambongolo kulijoko lyomwi.

¹¹ “Tooelete kufwala cisani cabooya bwa mbelele ico ncebakatungila pantu pomwi acisani cibotu citeshimite.

¹² “Kushakufwala shako, ukanootungilako masambaala kumakonko one oonse.

Milawo ya mucikwati

¹³ “Ono na musankwa umwi weeba, sombi kunembo lusuno lwakwe lwamana kumukaakwe,

¹⁴ lyalo watalika kumubekesha shikani shimwi alimwi akumubekesha ayi ndyaakamweeba wakamucana keeshi kale basankwa,

¹⁵ baishi abanyina mwanakashi uyo balyeelete kubwesa cisani cakasebenseshekwa. Kuswawaawo bakacitole mukutondesha bamaloba ba mundabala ayi ncakwiila mwanaabo wakeebwa kaatana kukumanawo kale amusankwa.

¹⁶ Mpomunyaawo baishi mwanakashi balaakulwiita bamaloba abo ayi, ‘Ndakeebesha mwanaangu kumusankwa uyu, sombi bulya taamusuni.

¹⁷ Wabekesha shikani mwanaangu, akwaamba ayi ndyaakamweeba wakacana ulishi kale basankwa. Sombi citondesho cakwaamba ayi mwanaangu taakalinga kwishi basankwa ndibakeebana, ncisani ici ncebakasebensesha pabwiinga.’

¹⁸ Lyalo bamaloba abo balaakutola musankwa uyo mukumuuma.

¹⁹ Balaakumulipilisha amwaanda womwi wa maali a silifa akupa baishi mwanakashi uyo, mukwiinga musankwa uyo wasebaanya mwanakashi mwine Isilaeli. Nacibi boobo, ulaakunoolibo mukaakwe, alimwi teelete kumukakaawo mubuumi bwakwe boonse.

²⁰ “Sombi na shikani shakaamba musankwa nshalushinisho, alimwi citondesho cakwaamba ayi mwanakashi uyo taakalinga kwishiiwo basankwa cabula,

²¹ balyeelete kumutola pamulyango wa ŋanda ya baishi, apo basankwa ba mundabala mpobeelete kumucaya amabwe ceebo wacita cintu cilensha nsoni muIsilaeli, kwiinda mukukumana abasankwa kaacili muŋanda ya baishi. Munshila iyi mulaakukusha bubi ubu pakati kanu.

²² “Ono na musankwa umwi wapukilwa kumuka mwiine, boonse bobilo balyeelete kucaikwa. Munshila iyi mulaakukusha bubi ubu pakati kanu.

²³ “Na musankwa umwi wacatwa mundabala imwi kaalete amwanakashi wakamamikilwa,

²⁴ boonse bobilo balyeelete kutolwa kumwinjililo wa ndabala iyo akubacaya amabwe. Mwanakashi ulaakucaikwa ceebo nabi wakalinga mundabala taakwe kutama ayi bamufuneeko. Alakwe musankwa ulaakufwita ceebo cakukumana amwanakashi wakamamikilwa. Munshila iyi mulaakukusha bubi ubu pakati kanu.

²⁵ “Na musankwa umwi wacana mwanakashi wakamamikilwa muluundu akukumanaakwe cakumukakatisha, musankwa eenkabo ngoweelete kucaikwa.

²⁶ Taaku ceelete kucitwa kumwanakashi ceebo taaku mulandu ngwaacita ngweenga wacailwaawo. Mulandu uyu ulyeelenebo amuntu waya mukulwana mubye akumucaya.

²⁷ Musankwa wakacata mwanakashi umamikitwe muluundu, akukumanaakwe. Nacibi kwaamba ayi mwanakashi uyu wakatama, taaku muntu wakalingaako ayi amufuneeko.

²⁸ “Ono na musankwa umwi wacatwa wakakatisha mwanakashi utamamikitwe akukumanaakwe,

²⁹ musankwa uyo ulyeelete kulipila maali a silifa ali makumi osanwe akupa baishi mwanakashi. Mpeeke ulyeelete kumweeba ceebo wakumanaakwe cakumukakatisha. Aboobo teelete kumukaka mubuumi bwakwe boonse.

³⁰ “Taaku musankwa weelete kusebaanya baishi kwiinda mukweeba bamuka baishi nabi kukumanaabo.