Dutolonomi 21 - Baibo Busansulushi Bwa Libuku Ili

Muntu wacanika ulifwite cakuteshiba wamucaya

¹ “Ono na kwacanika muntu ufwite muluundu, mucishi ico Mwaami Lesa, Lesa wanu ncaatoomupa, sombi tamwishi wakamucaya,

² bamaloba alimwi aboomboloshi banu balyeelete kuya kumusena nkwaakafwita mukupima mushinso mboobete kuswa kumandabala ashingulukite mutuntu uyo.

³ Lyalo bamaloba ba mumandabala ali pafwaafwi apaapo pakacanika muntu uyo, bakabwese mpwishi itana kusebensaawo.

⁴ Bakeetole kumusena uli pafwaafwi akalonga katayuminini, uko nkobatana kulimaawo nabi kushangako cimwi cintu, akwiityola nshingo.

⁵ Bapailishi bene Lefi abalo balyeelete kuya mukwiinga Mwaami Lesa, Lesa wanu wakabasala ayi banoosebensa mulimo wa bupailishi akunoopa coolwe muliina lyakwe alimwi akunokoombolosha milandu yakulwana abucayi yoonse.

⁶ Mpeeke boonse bamaloba ba mundabala ili pafwaafwi apaapo pakacanika mutuntu, balyeelete kusamba kumaansa peculu lya mpwishi yakatyolwa nshingo mucinyika,

⁷ akwaamba ayi, ‘Teshi ndiswe twakacaya muntu uyu alimwi awakamucaya woonse tatumwishi.

⁸ NoBaami baLesa, amulekelele bantu banu bene Isilaeli abo mbomwakakusha mucishi ca Ijipiti. Amutulekelele alimwi mutatupi mulandu wakucaya muntu utakwe kubisha.’

⁹ Aboobo kwiinda mukucita bwakamwaambila Mwaami Lesa teshi mukapekwe mulandu wakucaya muntu utakwe kubisha.

Banakashi babwesekwa busha munkondo

¹⁰ “Ono na Mwaami Lesa akalengeshe ayi mukome balwani banu munkondo, akumwaabila bantu mbweshi mukacate busha,

¹¹ mpeeke umwi pakati kanu wabonawo mwanakashi mubotu weenga wamukonda, ulakonsha kumweeba.

¹² Ulyeelete kumutola kuŋanda yakwe uko nkweshi akacesele munkunyu, kunengulula maala a kumaansa

¹³ alimwi akufuula shakufwala isho nshaakacatwaasho akufwala shimwi. Ulyeelete kwikala muŋanda yakwe kwamweenshi womwi kaalila baishi abanyina. Kuswawaawo ndyeenga mweebana.

¹⁴ Na kunembo lusuno lwamana kuli nguwe, inga wamuleka waya kuli koonse nkwaasuni. Tooelete kumuulisha nabi kumusebensesha anga ngumusha ceebo wakakumanaakwe ndiwakamweeba.

Shintu sheelete kupekwa mwaana musankwa wakwiiya

¹⁵ “Ono na musankwa keebete banakashi bobilo, ono boonse bashala baana basankwa, sombi mwaana musankwa wakwiiya kaali wa mumwanakashi uyo ngwaatasuni bunene,

¹⁶ pakunokwaabanya baana basankwa buboni, teelete kusalulula. Atakapi mwaana wa mwanakashi uyo ngwaasuni akushiya mwaana musankwa wakwiiya wa mwanakashi ngwaatasuni bunene.

¹⁷ Musankwa uyo ulyeelete kwaabanya buboni bwakwe mushipansha shotatwe, akupa mwaana musankwa wakwiiya shipansha shobilo, nabi taakwe kumushalila mumwanakashi ngwaasuni bunene. Mwaana musankwa wakwiiya ulyeelete kupekwa kweelana ashintu shimweelete.

Mwaana musankwa utanyumfwili bashali

¹⁸ “Ono na muntu ulicite mwaana musankwa shintindi, utanyumfwili bashali bakwe nabi bamuuma cili buyani,

¹⁹ baishi abanyina balyeelete kumutola kubamaloba mukumoombolosha mundabala njeekalaamo.

²⁰ Balyeelete kubaambila ayi, ‘Mwaneesu ngushintindi, alimwi taatunyumfwili. Ulanyonyoola maali alimwi ngucakolwa.’

²¹ Mpomunyaawo basankwa boonse ba mundabala iyo balyeelete kumucaya kumabwe. Munshila iyi mulaakukusha bubi ubu pakati ka bene Isilaeli. Mpeeke bantu boonse balaakunyumfwa cikani ico akuloonda abuumbi.

Milawo imwi

²² “Ono na muntu wacaikwa ceebo cakupwaya mulawo, mpeeke bamupopa pamucilingano,

²³ muntu uyo taaelete koonaawo. Ulyeelete kufukilwa pabushiku mbomunya ubo, ceebo muntu upopwa pamucilingano Lesa ulamushingana. Mukoofukile kwaamba ayi mutakabishi cishi ico Mwaami Lesa, Lesa wanu ncaatoomupa.