Dutolonomi 20 - Baibo Busansulushi Bwa Libuku Ili

Mbobeelete kuya kunkondo

¹ “Na mutooya mukulwana abalwani banu, ono mwaboona ayi balicite maaki aanji, shikoci shiinji alimwi bashilumamba baanji kwiinda banenu, tamweelete kubaloonda. Mwaami Lesa, Lesa wanu uyo wakamukusha mucishi ca Ijipiti, ulaakuba amwebo.

² Kamutana kutalika kulwana, mupailishi ulyeelete kwisa mukulwiita bashilumamba ayi,

³ ‘Amunyumfwe, mwebo nobene Isilaeli! Sunu mutoolwana abalwani banu. Aboobo mutabaloondi, kuboola pesule nabi kwiingana.

⁴ Mwaami Lesa, Lesa wanu utooya amwebo alimwi akulengesha ayi mubakoome.’

⁵ “Kuswawaawo, bamatanjilili balaakwaambila bashilumamba ayi, ‘Sa pano pali umwi wakaswabo mukuyaka ŋanda, sombi taana kwiibenga kuMwaami Lesa? Na mpwaali, aye kumushi mukwiinga na wacaikwa munkondo, ŋanda inga yabengwa amuntu umwi kuMwaami Lesa.

⁶ Sa pano pali umwi wakaswabo mukushanga minyansa sombi taana kutalika kwiiyapa? Na mpwaali, aye kumushi mukwiinga na wacaikwa munkondo, minyansa iyo inga yalikwa amuntu umwi.

⁷ Sa pano pali umwi wakamamikila? Na mpwaali, aye kumushi mukwiinga na wacaikwa munkondo, musankwa umwi inga weeba mwanakashi uyo ngwaakamamikila.’

⁸ “Bamatanjilili aba balaakwiilikaawo ayi, ‘Sa pano pali umwi waloonda akufwa citu? Na mpwaali, aaye kumushi ceebo inga walengesha babye kutyongola abalo.’

⁹ Ono na bamanisha kwaamba boobo kubashilumamba, balyeelete kusala munene wa cipani comwi acomwi.

¹⁰ “Na mutooya mukulwana ndabala inene imwi, mulyeelete kutaanguna kupa ciindi cakwaamba ayi baabe ndabala yabo mumaansaanu cakubula kulwana.

¹¹ Ono na basumina akucalula minjililo, bantu boonse mundabala iyo balyeelete kuba basha banu akunoomusebensela.

¹² Sombi na bakaka kucita boobo akutalika kulwana, bashilumamba banu bakashinguluke ndabala inene iyo akubalwana.

¹³ Lyalo na Mwaami Lesa, Lesa wanu waaba ndabala iyo mumaansaanu, mukacaaye musankwa woonse uliimo.

¹⁴ Ono banakashi, baana, shifubwa alimwi ashintu shoonse sheenga kashiliimo inga mwatoola. Mulakonsha kusebensesha shintu shoonse sha balwani banu ceebo Mwaami Lesa, Lesa wanu wamupa.

¹⁵ Anu ubo mbomweelete kunoocita mandabala anene oonse ali kulaale acishi nceshi mukaye mukwikalaamo.

¹⁶ “Sombi mumandabala oonse a mishobo iyo ili mucishi ico Mwaami Lesa, Lesa wanu ncaatoomupa, mukanyonyoole bantu boonse.

¹⁷ Kweelana abwakaamba Mwaami Lesa, Lesa wanu, ncakwiila mukanyonyoole bantu boonse, nkokwaamba ayi bene Iti, bene Amoli, bene Kenani, bene Pelisi, bene Ifi alimwi abene Jebusi.

¹⁸ Mukabacaaye, kwaamba ayi batakamulengeshi kubisha kuMwaami Lesa kwiinda mukumwiisha shintu shilensha nsoni, isho nshebacita pakulambila balesa babo.

¹⁹ “Ono pakushinguluka ndabala inene ayi mwiikoome, kuteelesha kutema shisamu sha shisepo nabi nkondo yatola ciindi cilaamfu. Mwebo nkunoolyabo shisepo ceebo shisamu tashishi mbobalwani banu.

²⁰ Nacibi boobo, shalo shisamu isho shiteshi sha shisepo inga kamushisebensesha kupanga shakutantilaawo pakushinguluka ndabala inene iyo, kushikila mweekoma.