Dutolonomi 19 - Baibo Busansulushi Bwa Libuku Ili

Mandabala anene akulobokelaako

¹ “Ono na Mwaami Lesa, Lesa wanu akamane kunyonyoola mishobo iyo ine cishi ico ncaatoomupa, mwaakubwesa mandabala anene amaandaabo alimwi akwikala mumo,

² mulyeelete kusala mandabala anene otatwe ayo ali pakati ka cishi ico Mwaami Lesa, Lesa wanu ncaatoomupa.

³ Mukapange mikwakwa iya nkuko akutimbula cishi ico Mwaami Lesa, Lesa wanu ncaatoomupa mushipansha shotatwe. Ono uyo woonse weenga wacaya muntu inga wakonsha kulobokela kumandabala anene ayo.

⁴ Na muntu umwi wacaya muntunyina mumapuso uteshi mulwani wakwe, inga walobokela kundabala inene imwi pali ngawo ayi akalifuune.

⁵ Atwaambe ayi bantu bobilo baya muluundu mukutema shisamu. Ono umwi pakunootema cisamu, keembe kasokoka akuyasa mubye wafwa, muntu uyo inga walobokela kundabala inene imwi yakulobokelaako mukulifuna.

⁶ Nikwalingabo ndabala inene yomwi, naakwiinga mushinso wakuya kuli njiyo kooli ulaamfu. Aboobo shikamukowa wa wooyo wacaikwa inga watandaanya wooyo wacaya mubye mumapuso akumucaya alakwe, nacibi kwaamba ayi taalinga kweelete kucaikwa ceebo uyo wakacaikwa taalinga mulwani wakwe.

⁷ Nceceeco ncendaambila ayi musale mandabala anene otatwe.

⁸ “Na Mwaami Lesa, Lesa wanu akanungeeko acimwi cishi, kweelana ambwaakashomesha cakulumbila kubamashali banu bakulukulu,

⁹ mukasalilewo mandabala anene amwi otatwe. Ulaakumunungilaako cishi na mukanookonkela milawo yoonse njentoomupa sunu, nkokwaamba ayi kusuna Mwaami Lesa, Lesa wanu alimwi akunookala kweelana akwiisha kwakwe.

¹⁰ Mukacite mbomunya ubo kwaamba ayi bantu batacite mulandu batakacaikwi alimwi ayi mutakabi amulandu wakutila bulowa mucishi ico Mwaami Lesa, Lesa wanu ncaatoomupa.

¹¹ “Ono na muntu umwi ulipatite mubye, mpeeke wamubelamina akumuuma wafwa. Kuswawaawo walobokela kundabala inene imwi yakulobokelaako,

¹² bamaloba ba mundabala mwaakala balyeelete kutuma bantu ayi bakamuleete, akumwaaba mumaansa a shikamukowa wakwe wooyo wakacaikwa ayi bamucaaye alakwe.

¹³ Tamweelete kumunyumfwila nkumbu, sobwe. Mboboobo mbweshi mukanookusha bubi bwakucaya bantu batacite mulandu mucishi ca Isilaeli, kwaamba ayi shoonse shikanoomweendela kabotu.

Mulawo wa pamanyinsa

¹⁴ “Mucishi ico Mwaami Lesa, Lesa wanu ncaatoomupa tamweelete kusenya manyinsa akapimwa kalekale.

Bakamboni

¹⁵ “Kamboni womwi taakoonshi kulengesha ayi muntu umwi apekwe mulandu. Kulyeelete kuba bakamboni bobilo nabi botatwe ayi apekwe mulandu.

¹⁶ Na muntu umwi wabekesha mubye mulandu,

¹⁷ bobilo boonse balyeelete kwiimikana kunembo lya Mwaami Lesa ayi mupailishi alimwi aboomboloshi batoosebensa paciindi ico baboomboloshe.

¹⁸ Mpomunyaawo boomboloshi balyeelete kwiipulushisha kabotu mbuli makani mbwaabete. Ono na cacanika ayi kamboni uyo ngumubeshi, ulisunibo kubekesha mwine Isilaelinyina,

¹⁹ acitwe kweelana ambwaalinga kusuni ayi mubye acitwe. Munshila iyi mulaakukusha bubi ubu pakati kanu.

²⁰ Mpeeke bantu boonse balaakunyumfwa cikani ico akuloonda abuumbi. Aboobo taaku aumwi weshi akeeleshe kucita boobo.

²¹ Tamweelete kunyumfwa nkumbu mumilandu ya mushobo wooyu. Mulandu ulyeelete kuba buumi pabuumi, liinso paliinso, liino paliino, lyaansa palyaansa, ncimpanta pacimpanta.