Dutolonomi 17 - Baibo Busansulushi Bwa Libuku Ili

¹ “Kuteelesha kubenga ŋombe nabi mbelele icite kampenda kali koonse kuMwaami Lesa, Lesa wanu ayi ngumulambu, mukwiinga ico Mwaami Lesa ulicipatite.

² “Ono twaambe ayi mwanyumfwa kwaamba ayi musankwa nabi mwanakashi umwi mundabala imwi pakati ka aayo Mwaami Lesa, Lesa wanu ngweshi akamupe, wabisha kuli nguwe akupwaya cipangano cakwe.

³ Nkokwaamba ayi wakalambila akusebensela balesa bamwi, lisuba, mweenshi nabi nyenyeenshi, ico citeendelani amulawo wa Mwaami Lesa.

⁴ Na mwanyumfwa makani a mushobo wooyu, mulyeelete kwiipusha kabotu kabotu. Ono na bubi ubu bwacanika ayi bwakacitika cancinencine muIsilaeli,

⁵ muntu uyo mulyeelete kumukusha pansengwe lya ndabala akumucaya kumabwe.

⁶ Nacibi boobo, ulyeelete kucaikwa na paba bakamboni bobilo nabi botatwe beenga bamushinina. Teelete kucaikwa na palibo kamboni womwi.

⁷ Bakamboni abo mbobeelete kutaanguna kumuuma mabwe. Kuboolaawo, bantu boonse ndyeenga bamuuma kushikila wafwa. Munshila iyi mulaakukusha bubi ubu pakati kanu.

⁸ “Ono na kwaba milandu iyumu itakoonshi koomboloshekwa munkuta shanu, mbuli ya kucaya muntu, kulwanina buboni nabi ya kucisa muntu mukeetole kumusena womwi wakulambililaako uyo Mwaami Lesa, Lesa wanu ngweshi akasaale.

⁹ Mukabike milandu iyi mumaansa a bene Lefi bapailishi alimwi amoomboloshi utoosebensa paciindi ico, kwaamba ayi baipingule.

¹⁰ Lyalo mukacite bweenka mbweshi bakamulwiite abo beshi bakabe mumusena uyo womwi wakulambililaako ngweshi akasaale. Mulyeelete kubikaako maano kwaamba ayi mukacite shoonse nsheshi bakamulwiite.

¹¹ Mukacite kweelana amilawo njeshi bakamwiishe alimwi abupingushi mbweshi bakamupe. Mutakasuuli nsheshi bakamulwiite akucita shimbi.

¹² Uyo woonse weshi akanyanshe moomboloshi nabi mupailishi utoosebensa kunembo lya Mwaami Lesa, Lesa wanu ulyeelete kucaikwa. Munshila iyi mulaakukusha bubi ubu pakati ka bene Isilaeli.

¹³ Mpeeke bantu boonse balaakunyumfwa cikani ico akuloonda abuumbi. Aboobo taaku aumwi weshi akeeleshe kucita boobo.

Mwaami wa cishi mbwaasalwa

¹⁴ “Mwaakushika mucishi ico Mwaami Lesa, Lesa wanu ncaatoomupa akutalika kwikala mumo, lyalo mulaakuba amuyeeyo wakuba amwaami bweenka mbuli mishobo imwi yoonse imushingulukite.

¹⁵ Mpeeke mukasaale muntu uyo Mwaami Lesa ngweshi akaambe ayi ngooelete kuba mwaami. Tamweelete kusala muswamashi uyo uteshi mwine Isilaelinyinaanu.

¹⁶ Mwaami uyo teelete kuba amaaki aanji a bashilumamba bakwe nabi kutuma bantu bakwe kuIjipiti ayi bakaletelewo amwi, mukwiinga Mwaami Lesa wakakasha bantu bakwe kuboola nkuko.

¹⁷ Mwaami uyo teelete kweeba banakashi baanji mukwiinga inga bamulengesha kuswa kuMwaami Lesa. Teelete kuba asilifa alimwi agolodi uunji bunene, sobwe.

¹⁸ “Na muntu waba mwaami, ulyeelete kulilembela milawo iyi mulibuku lyakwe kuswa mulyeelyo lili abapailishi bene Lefi.

¹⁹ Libuku ili lilyeeletebo kunooli muliimfwa lyakwe akanoolibelenga lyoonse mubuumi bwakwe, kwaamba ayi akeeye kulemeka Mwaami Lesa, Lesa wakwe alimwi akukonkela cakushomeka milawo amilasho yoonse iyi.

²⁰ Ici cilaakumulengesha kutayeeya ayi lakwe uli kabotu kwiinda bene Isilaelinyina bamwi boonse, akumukasha kutakonkela milawo ya Mwaami Lesa munshila ili yoonse. Lyalo lakwe alimwi abamulunyungu lwakwe balaakweendelesha ciindi cilaamfu muIsilaeli.