Dutolonomi 16 - Baibo Busansulushi Bwa Libuku Ili

Bushiku bwa Pasika bwakwiibaluka kusotokela

¹ “Kamulemeka Mwaami Lesa, Lesa wanu kwiinda mukusekelela bushiku bwa Pasika bwakwiibaluka kusotokela mumweenshi wa Abibu. Mukwiinga mumweenshi uyu, ciindi ca mashiku, Mwaami Lesa wakamukusha mucishi ca Ijipiti.

² Mukanooya kumusena womwi wa kulambililaako akucaya ŋombe nabi mbelele nkomunya uko, ayi nja bushiku bwa Pasika mukulemeka Mwaami Lesa, Lesa wanu.

³ Pakunoosekelela, tamweelete kulya shinkwa. Sombi kwanshiku shosanwe ashobilo, mulyeelete kunoolyabo cimaande, bweenka mbomwakacita pakuswa calubilo mucishi ca Ijipiti. Cimaande ico cilaakunokwiitwa ayi cimaande ca mapensho. Mukanoocilya kwaamba ayi mukanokwiibaluka bushiku ndimwakaswa mucishi ca mapensho ca Ijipiti kwa buumi bwanu boonse.

⁴ Nkokwaamba ayi kwanshiku shosanwe isho, taaku muntu mucishi canu weelete kuba acimena muŋanda. Ayalo nyama yakabengwa ayi ngumulambu wa pabushiku bwakutaanguna macolesha, tayeelete koona, sombi kulikwabo bushiku bweenkoobo.

⁵ “Nyama ya pabushiku bwa Pasika bwakwiibaluka kusotokela tayeelete kucailwa mundabala imwi ili yoonse Mwaami Lesa, Lesa wanu njeshi akamupe.

⁶ sombibo kumusena womwi wakulambililaako uyo ngweshi akasaale. Nkomunya uko nkomweelete kubengela mulambu wa bushiku bwa Pasika macolesha, ceebo ici nceciindi ndimwakaswa mucishi ca Ijipiti.

⁷ Mukateente nyama akwiilita kumusena womwi wakulambililaako. Bwaakucabo mukaboole kumisumba yanu.

⁸ Mpomunyaawo kwanshiku shosanwe abomwi mukanoolyabo cimaande. Ono pabushiku bwasanu ashobilo mukabungane ayi mulambile Mwaami Lesa, Lesa wanu alimwi tamweelete kucita mulimo nabi womwi.

Bushiku bwaKusekelela Kutebula

⁹ “Kuswa ciindi nceshi mukatalike kutebula shili anga ngamaila, mukabelenge nsondo shosanwe ashobilo.

¹⁰ Lyalo mukalemeke Mwaami Lesa, Lesa wanu, mukabe akusekelele kwaKutebula kwiinda mukumupa cipo cakulyaaba, kweelana ashoolwe nshaakamupa.

¹¹ Mwebo pantu pomwi abana banu, basebenshi banu, bene Lefi, baswamashi, bana banshiwa alimwi abamukalubinje banakashi abo bekala mumandabalaanu, mulyeelete kusangalala kunembo lya Mwaami Lesa, Lesa wanu kumusena womwi uyo wakulambililaako.

¹² Kamwiibaluka ayi mwakalinga basha mucishi ca Ijipiti. Anu milawo iyi mulyeelete kunooikonkela.

Kusekelela kwa Shimpaka

¹³ “Ono na mukamanishe kulupula shili anga ngamaila shanu shoonse akutyana minyansa yanu yoonse, mukabe akusekelela kwa Shimpaka nshiiku shosanwe ashobilo.

¹⁴ Mukasekelele pantu pomwi abana banu, basebenshi banu, bene Lefi, baswamashi, bana banshiwa alimwi abamukalubinje banakashi abo bekala mumandabalaanu.

¹⁵ Mukanoolemeka Mwaami Lesa, Lesa wanu kwiinda mukusekelela uku kwanshiku shosanwe ashobilo, kumusena weenka womwi wakulambililaako. Mwaami Lesa ulaakumupa coolwe mukutebula kwanu amumilimo yanu yoonse, aboobo mulaakusangalala abuumbi.

¹⁶ “Anu basankwa boonse mumushobo wanu balyeelete kwisa kumusena womwi wakulambililaako mukulambila Mwaami Lesa, Lesa wanu mankanda otatwe mumwaaka. Nkokwaamba ayi ciindi cakusekelela bushiku bwa Pasika bwakwiibaluka kusotokela, pakusekelela kwaKutebula alimwi apakusekelela kwa Shimpaka. Umwi aumwi ulyeelete kuleta cipo

¹⁷ kweelana acoolwe ico Mwaami Lesa, Lesa wanu ncaakamupa.

Milimo ya boomboloshi

¹⁸ “Mukasale boomboloshi alimwi abacinenenene bamwi mumukowa wanu womwi awomwi mumandabala ayo Mwaami Lesa, Lesa wanu ngweshi akamupe. Bantu abo balyeelete kunokoombolosha cakutasalulula.

¹⁹ Tabeelete kutakonkela makani nabi kuba akasalulushi mukoombolosha kwabo, sobwe. Tabeelete kutambula makulo, mukwiinga makulo alalengesha buluya kubasongo boonse akusendeka maswi a baluleme.

²⁰ Mwebo mukanokoombolosha bantu boonse cakutanyengelela, kwaamba ayi mukekalilile mucishi ico Mwaami Lesa, Lesa wanu ncaatoomupa.

²¹ “Ono mwaakuyaka cipaililo ca Mwaami Lesa, Lesa wanu, mutakabikiwo cikoshanyo cakwe Ashela lesa mwanakashi wakubesa.

²² Kuteelesha kwiimika libwe ayi munoolambililaawo ceebo ishi nsheshintu Mwaami Lesa, Lesa wanu nshaapatite.