Dutolonomi 15 - Baibo Busansulushi Bwa Libuku Ili

Mwaaka wasanu ayobilo

¹ “Lyoonse kumeelelesho a mwaaka wasanu ayobilo, mulyeelete kulekelela bantu mbomwakakweletesha.

² Mbweshi cikanooba mbulya. Wakakweletesha mwine Isilaelinyina woonse ulyeelete kumulekelela. Teelete kusesa nkongole iyo mukwiinga Mwaami Lesa, Lesa wanu mwiine ngowaamba ayi tayeelete kuseswa.

³ Muswamashi lakwe inga wamubooshesha, sombi kuteelesha kusesa mwine Isilaelinyinaanu.

⁴ “Nacibi boobo, pakati kanu teshi pakabe muntu mukandu nabi womwi. Mukwiinga Mwaami Lesa, Lesa wanu ulaakumupa coolwe cinene abuumbi mucishi ico ncaatoomupa,

⁵ kulilabo na mukanoomunyumfwila akukonkela kabotu milawo yoonse iyi njentoomupa sunu.

⁶ Mwaami Lesa ulaakumupa coolwe kweelana ambwaakamushomesha. Mulaakukweletesha maali kumishobo iinji, sombi mwebo taaku nkweshi mukakweleteewo. Mulaakweendelesha mishobo iinji, sombi mwebo taaku nabi womwi eshi akamweendeleshe.

⁷ “Ono na mundabala imwi mucishi ico Mwaami Lesa, Lesa wanu ncatoomupa muli mwine Isilaelinyinaanu utacite shiyandika mubuumi, tamweelete kuba boonyu mukutamucafwa.

⁸ Mulyeelete kuba amyoyo ibotu akumupa shoonse nshaatacite.

⁹ Tamweelete kukaka kumukweletesha ncaasuni ayi mukwiinga mwaaka wakulekelela nkongole uli pafwaafwi. Muyeeyo uyu ubiibi tooelete kuba muli ndimwe. Na mwakaaka kumukweletesha, ulaakulilila kuMwaami Lesa, lyalo mwebo mukabe amulandu.

¹⁰ Mulyeelete kumupa amyoyo yoonse cakutatongooka. Mpeeke Mwaami Lesa ulaakumupa coolwe mumilimo yanu yoonse.

¹¹ Mulyeelete kwishiba ayi lyoonse palaakunooli bene Isilaeli bamwi bakandu abo bayandika kucafwikwa. Paceebo ceeci, ndamwaambila ayi mulyeelete kunoobanyumfwila nkumbu akubacafwa.

Bwakulama basha

¹² “Na mwine Isilaelinyinaanu musankwa nabi mwanakashi walyuulisha busha kuli ndimwe akumusebensela myaaka yosanwe awomwi, mulyeelete kumwaangulula mumwaaka wasanu ayobilo.

¹³ Na mwamwaangulula, tamweelete kumuleka ayi aboolele maansaabo.

¹⁴ Mulyeelete kumupa shintu shimwi kuswa pasheesho Mwaami Lesa nshaakamupa camyoyo yoonse. Nkokwaamba ayi mbelele, shili anga ngamaila nabi waini.

¹⁵ Kamwiibaluka ayi amwebo mwakalinga basha mucishi ca Ijipiti, ono Mwaami Lesa, Lesa wanu ngowakamwaangulula. Nceceeco ncentoomupeta mulawo uyu sunu.

¹⁶ “Sombi na musha uyo waamba mwiine ayi, ‘Nshisuni ayi muŋangulule’ ceebo cakwaamba ayi ulikusuni webo abamuŋanda yako, alimwi kaali kabotu,

¹⁷ ulyeelete kumutola kumulyango wa ŋanda yako akumutulula kutwi. Mpeeke ulaba musha wako wa nshiku shoonsebo. Musebenshi wanu mwanakashi alakwe mulakonsha kumucita mbomunya ubo.

¹⁸ Citakanoomucisa pakwaangulula musha. Mulyeelete kwishiba ayi ncito njaacita mumyaaka yosanwe awomwi ileenda payeeyo musebenshi ulipilwa maali njaaelete kucita. Mukanoocita mbomunya ubo kwaamba ayi Mwaami Lesa, Lesa wanu akamupe coolwe mumilimo yanu yoonse.

Baana bakwiiya ba shifubwa

¹⁹ “Baana basankwa bakwiiya ba ŋombe aba mbelele mukababike palubasu ayi mba Mwaami Lesa, Lesa wanu. Tamweelete kusebensesha ŋombe ishi nabi kucesa mbelele ishi booya.

²⁰ Sombi mumwaaka womwi awomwi, mwebo abamumaandaanu mulakonsha kunoolya shifubwa ishi pameenso aMwaami Lesa, Lesa wanu kumusena womwi uyo wakulambililaako.

²¹ Sombi na kwaboneka kampenda kucifubwa comwi, nkokwaamba ayi ncilema myeendo nabi ayi tacilashi, ingayi cifubwa ico taceelete kubengwa kuMwaami Lesa, Lesa wanu ayi ngumulambu.

²² Banyama ba mushobo wooyo inga kamubalitabo kuŋanda. Anu muntu usalalite kweelana aMilawo nabi utasalalite, woonse inga walya, bweenka mbuli mbomulya ya konse nabi ya nalufwi.

²³ Tamweelete kulya bulowa bwa banyama, sombi mulyeelete kubutila panshi anga ngamaanshi.