Dutolonomi 14 - Baibo Busansulushi Bwa Libuku Ili

Ncebatakalinga kweelete kucita pacililo

¹ “Mwebo muli bantu ba Mwaami Lesa, Lesa wanu. Paceebo ceeci, na mulicite cililo, tamweelete kulinengoola nabi kucesa misusu palumbwiishi.

² Mwebo muli bantu ba Mwaami Lesa, Lesa wanu. Wakamusala ayi mube bantu bakwe mwiine kuswa pamishobo yoonse ya mucishi ca panshi.

Banyama basalalite alimwi abatasalalite

³ “Tamweelete kulya cintu cili coonse ico Mwaami Lesa ncaamba ayi tacisalalite.

⁴ Ono banyama mbomweelete kulya mbaaba, ŋombe, mbelele, mpongo,

⁵ koonse, nsefu, balukokamabwe alimwi abapelembe.

⁶ Mulakonsha kulya banyama boonse bapanseene shoondo, batikula shakulya akushitafuna alimwi.

⁷ Sombi tamweelete kulya banyama batapanseene shoondo alimwi batatikuli shakulya akushitafuna alimwi. Kuteelesha kulya ngamela, basulwe alimwi abacibila. Mulyeelete kubabona ayi tabasalalite ceebo nabi balatikula shakulya akushitafuna alimwi, tabacite shoondo shipanseene.

⁸ Nkumba ayalo nabi ilicite shoondo shipanseene, teetikuli shakulya akushitafuna. Aboobo teesalalite kuli ndimwe. Tamweelete kulya banyama aba nabi kukumya mituntu yabo, ceebo tabasalalite kuli ndimwe.

⁹ “Mulakonsha kulya nswi ili yoonse icite twakusambisha alimwi amaamba,

¹⁰ sombi cintu coonse cikala mumaanshi citacite twakusambisha alimwi amaamba, taceelete kulikwa. Mulyeelete kucibona ayi tacisalalite.

¹¹ “Mulakonsha kulya bayuni bali boonse basalalite kweelana aMilawo.

¹² Sombi bayuni mbomuteelete kulya mbaaba, bamumbankwashi, makubi, bacuungwe,

¹³ bacikupwi basalala alimwi abashiya ba mishobo yoonse,

¹⁴ bacikwangala ba mishobo yoonse,

¹⁵ ntibatiba, makwiikwi, bacibengelele, tukoshi

¹⁶ bamwiina, bashicisekwe, bancoli,

¹⁷ bakapwa, balukumba, nshika,

¹⁸ matongola, nkobokobo, nduba alimwi atumpafwa.

¹⁹ “Shilongolo shoonse shuuluka alimwi sheendela kumyeendo yone tashisalalite kuli ndimwe, aboobo tasheelete kulikwa.

²⁰ Sombi inga mwalya shilongolo shimwi shuuluka shisalalite kweelana aMilawo.

²¹ “Tamweelete kulya cintu cili coonse califwita. Mulakonsha kupa baswamashi mbomwikalaabo nabi kuulisha kubaswamashi bamwi. Sombi mwebo muli bantu basalalite ba Mwaami Lesa, Lesa wanu. “Tamweelete kuteleka mwanaampongo mumukupa wa banyina.

Mulawo wa pacalikumi

²² “Mukanoobika palubasu calikumi pashintu shoonse nsheshi mukanookusha mumyuunda yanu myaaka yoonse.

²³ Kuswawaawo mukaye kumusena womwi uyo Mwaami Lesa, Lesa wanu ngweshi akasaale ayi nkokwakumulambilila. Nkomunya uko, mukalye shipansha shanu shalikumi sha shili anga ngamaila, waini, mafuta a olifi, kubikaawo abaana ba ŋombe aba mbelele bakwiiya. Mukanoocita boobo kwaamba ayi mukeeye kulemeka Mwaami Lesa, Lesa wanu lyoonse.

²⁴ Ono na musena wakulambililaako uli kulaale akooko nkomwikala, cakwaamba ayi inga tamucikoonshi kunyamuna shalikumi sha mumyuunda yanu isho Mwaami Lesa nshaakamupa, ncemweelete kucita

²⁵ nkuulisha shalikumi shanu akutola maali kumusena womwi wa kulambililaako.

²⁶ Lyalo mukasebenseshe maali ayo kuula shintu shoonse nshemusuni, mbuli nyama ya ŋombe, ya mbelele, waini nabi bwalwa. Mpeeke mulyeelete kulya abamuŋanda yanu noonse kunembo lya Mwaami Lesa, Lesa wanu ayi musangalale.

²⁷ “Bene Lefi abo mbomwikalaabo tamweelete kubalubaako ceebo taaku cipansha ca cishi ncibakapekwa ayi ncabo.

²⁸ Lyoonse na peenda myaaka yotatwe, mulyeelete kuleta shalikumi sha mumwaaka watatu uyo akushisunga mumandabalaanu.

²⁹ Shakulya ishi nsha bene Lefi mukwiinga balo taaku cipansha ca cishi ncebakapekwa, alimwi nsha baswamashi, bana banshiwa kubikaawo abamukalubinje banakashi bekala mumandabalaanu. Balyeelete kunoosa mukubwesa shoonse nshebasuni. Mukanoocita boobo kwaamba ayi Mwaami Lesa, Lesa wanu akamupe coolwe mumilimo yanu yoonse.