Dutolonomi 13 - Baibo Busansulushi Bwa Libuku Ili

¹ “Na mulaluki nabi shikusansulula shiloto washomesha kucita caankamiko nabi citondesho ca nkusu,

² ayi amulengeshe kunoolambila akusebensela balesa mbomutana kulambilawo kale, nabi na nceenga washomesha kucita cacitika cancinencine,

³ mutakamunyumfwili napaceyi. Mulyeelete kwishiba ayi Mwaami Lesa, Lesa wanu utoosebensesha muntu uyo kwaamba ayi amweeleshe akubona na ncakwiila mulimusuni amyoyo yanu yoonse alimwi abuumi bwanu boonse.

⁴ Amukonkele Mwaami Lesa, Lesa wanu eenka akumulemeka, mumunyumfwile akulama milawo yakwe. Kamumulambila akushomeka kuli nguwe.

⁵ Sombi mukacaye shikusansulula shiloto amulaluki uli woonse weenga wamulwiita ayi mwaashukile Mwaami Lesa, Lesa wanu uyo wakamukusha mucishi ca Ijipiti umo momwakalinga basha. Munshila iyo walinga kusuni kumukusha kubuumi ubo bwakamulwiita Mwaami Lesa ayi mwikale. Ncakwiila ulyeelete kucaikwa kwaamba ayi mukushe bubi ubu pakati kanu.

⁶ “Na mukwanu, mwanaako musankwa nabi mwanakashi, mukaako usunikwi nabi mubyo ngoonyumfwanaakwe bunene wakunyengelela ayi ulambile balesa bamwi, abo webo abamashali bako bakulukulu mbomutakwe kulambilawo kale,

⁷ nabi mbalesa ba mishobo ya pafwaafwi nabi ya kulaale awebo,

⁸ kutasumina nabibo kumunyumfwila. Kutamunyumfwila nkumbu nabi kuba aluse kuli nguwe alimwi kutamufunininaawo.

⁹ Ee, ulyeelete kucaikwa! Webo ndiwe weelete akutaanguna kumuuma mabwe, bamwi boonse bacaalile.

¹⁰ Mumuume mabwe kushikila afwe, mukwiinga walinga kusuni kumukusha kuMwaami Lesa, Lesa wanu, uyo wakamukusha mucishi ca Ijipiti umo momwakalinga basha.

¹¹ Lyalo bene Isilaeli boonse balaakunyumfwa cikani ico akuloonda abuumbi. Aboobo taaku nabi womwi eshi akacite bubi bwa mushobo uyu alimwi.

¹² “Mwaakunookala mumandabala ayo Mwaami Lesa, Lesa wanu ngaatoomupa, ono na mwanyumfwaawo shamashila ayi

¹³ bantu bamwi bamucita shibi ba mumushobo wanu bayungoola bantu mumandabalaabo ayi balambile balesa abo mbomutakwe kulambilawo kale,

¹⁴ mulyeelete kunyumfwishisha kabotu. Na mwacana ayi ncakwiila bubi bwa mushobo uyu bwacitika,

¹⁵ mukacaaye bantu boonse beshi bakanooli mundabala iyo pantu pomwi ashifubwa shabo shoonse. Ndabala yoonse iyo mukeenyonyoole.

¹⁶ Kuswawaawo mukabunjike shintu sha bantu ba mundabala umo pamusena ucanika bantu baanji. Lyalo ndabala mukeeteente alimwi ashintu shoonse shiliimo ayi ncipo kuMwaami Lesa. Ndabala iyo ilyeelete kunyonyookelabo limwi, tayeelete kuyakululwa alimwi, sobwe.

¹⁷ Ono mutakeeleshi kubwesa cintu nabi comwi pasheesho shakaambwa ayi shilyeelete kunyonyoolwa. Lyalo Mwaami Lesa ndyeshi akamulekelele akumunyumfwila nkumbu. Ulaakumunyumfwila nkumbu akumulengesha ayi mukafuule abuumbi, kweelana ambwaakalasha bamashali banu bakulukulu,

¹⁸ kulilabo na mukanookonkela milawo yakwe yoonse iyo njendamulwiita sunu alimwi akucita nshaasuni.