Dutolonomi 12 - Baibo Busansulushi Bwa Libuku Ili

Musena womwi wakulambililaako

¹ “Ono njeeyi milasho amilawo njemweelete kunookonkela lyoonsebo mwaakunookala mucishi ico Mwaami Lesa, Lesa wa bamashali banu bakulukulu ncaatoomupa.

² Mucishi ico nceshi mukabwese, mukanyonyoole misena njebalambililamo balesa babo patulundu tulaamfu atufwaafwi alimwi amushisamu sha shimfule shibotu.

³ Mukamwayoole shipaililo shabo, mukanyonyoole mabwe ngobakeemika pamisena yakulambililaawo alimwi mukatente shikoshanyo shakwe Ashela mumulilo, lesa wabo mwanakashi wakubesa akutimboola shibumbwabumbwa shabo kwaamba ayi batakalambilili mumisena iyo lyobilo.

⁴ “Tamweelete kulambila Mwaami Lesa, Lesa wanu munshila njebalambililamo balesa babo.

⁵ Pakati ka shipansha sha shishi mweshi mukanooli mikowa yanu yoonse, Mwaami Lesa ulaakusala musena womwi, uko bantu nkweshi bakanoosa mukumulambilila.

⁶ Kumusena uyo weenka nkweshi mukanoopeta milambu yakutenta amilambu imwibo, pantu pomwi acalikumi, shipo nshemushomesha cakulumbila kupa Mwaami Lesa, cipo cakulyaaba alimwi abaana bakwiiya ba ŋombe ambelele.

⁷ Lyalo mwebo abamumaandaanu, mulaakunoolya akusangalala mushintu shibotu isho nsheshi mukanoosebensela pameenso a Mwaami Lesa, Lesa wanu mukwiinga wamupa coolwe.

⁸ “Na ciindi ico cikashikile, tamweelete kunoocita mbuli mbomucita bulya. Bulya Mwaami Lesa mulamulambilabo kweelana ambomusuni

⁹ mukwiinga tamuna kushika mucishi ico Mwaami Lesa, Lesa wanu ncaatoomupa, umo mweshi mukekale muluumuno.

¹⁰ Ono na mukasubuke Mulonga wa Joodani Mwaami Lesa ulaakulengesha ayi mukabwese cishi ico akwikalaamo. Ulaakumulama kubalwani banu, ncakwiila mulaakunookala muluumuno.

¹¹ Mpomunyaawo Mwaami Lesa ulaakusala musena womwi uko nkweshi mukanoomulambilila, alimwi nkomunya uko nkomweelete kunoomuletela shintu shoonse nshendamulwiita. Nkokwaamba ayi milambu yakutenta amilambu imwibo, pantu pomwi acalikumi alimwi ashipo shimwi nshemushomesha cakulumbila kupa Mwaami Lesa.

¹² Mukanoosangalala pameenso a Mwaami Lesa, pantu pomwi abana banu, basebenshi banu alimwi abene Lefi bekala mumandabalaanu. Sombi mulyeelete kwishiba ayi bene Lefi teshi bakabe acishi cinebo beene, sobwe.

¹³ Anu tamweelete kupeta milambu yanu kumusena uli woonse ngomwasuna.

¹⁴ Paceebo ceeci mukanoopetabo kumusena womwi uyo Mwaami Lesa ngweshi akasaale mucishi ca mukowa omwi pakati kanu. Aboobo kumusena weenkabo uyo nkweshi mukanoopeta milambu yanu yakutenta akucitila shintu shimwi shoonse nshendamulwiita.

¹⁵ “Sombi mulyaangulukite kucaya akulya banyama banu kuli koonse nkweenga kamushiite. Mulakonsha kulya kweelana abuunji bwabaabo Mwaami Lesa mbwaatoomupa. Tacicite mulandu, muntu usalalite kweelana aMilawo nabi utasalalite, woonse inga walya, bweenka mbuli mbomulya ya konse nabi ya nalufwi.

¹⁶ Nakubi boobo tamweelete kulya bulowa bwa banyama, mulyeelete kubutila panshi anga ngamaanshi.

¹⁷ Ono shoonse nsheenga mwapa Mwaami Lesa tasheelete kulikwa mumisena umo mweshi mukanookala. Nabi shalikumi shanu sha shili anga ngamaila, waini, mafuta a olifi, baana bakwiiya ba ŋombe ambelele, shipo shakulyaaba, shipo nshemushomesha cakulumbila kupa Mwaami Lesa alimwi ashipo shimwi shoonse.

¹⁸ Mwebo abana banu pantu pomwi abasebenshi banu alimwi abene Lefi bekala mumandabalaanu mulyeelete kulita shipo isho pameenso a Mwaami Lesa, Lesa wanu mumusena womwi uyo wakulambililaamo uyo mwiine ngwaakasala. Mulyeelete kusangalala pashintu shoonse nsheshi mukanoosebensela.

¹⁹ Mukabikeeko maano kutasuula bene Lefi mwaakunookala mucishi canu ico.

²⁰ “Na Mwaami Lesa, Lesa wanu akakomenye cishi canu, kweelana ambwaakashomesha, mulaakunoolya nyama ciindi cili coonse ncemusuni.

²¹ Na musena womwibo wa kulambililaako uli kulaale bunene, lyalo na mwasuuna nobeene, inga mwacaya ŋombe nabi mbelele ili yoonse Mwaami Lesa njeenga wamupa, alimwi akulita nyama iyo kuŋanda, kweelana ambondamulwiita.

²² Anu muntu usalalite kweelana aMilawo nabi utasalalite, woonse inga walya, bweenka mbuli mbomulya ya konse nabi ya nalufwi.

²³ Ono ncemuteeletebo kucita nkulya nyama icicite bulowa ceebo buumi buli mubulowa, aboobo tamweelete kulya buumi pantu pomwi anyama.

²⁴ Tamweelete kulya bulowa bwa banyama, sombi mulyeelete kubutila panshi anga ngamaanshi.

²⁵ Na mukanookonkela mulawo uyu, Mwaami Lesa ulaakukondwa alimwi shintu shoonse shilaakunoomweendela kabotu pantu pomwi abamulunyungu lwanu.

²⁶ Amukatole shipo shanu ashintu shimwi nshemwakashomesha cakulumbila kupa Mwaami Lesa kumusena womwi uyo wakulambililaako ngweshi akasaale.

²⁷ Uko, mukanoobengelako milambu yakabumbulu yeelete kutentelwa pacipaililo ca Mwaami Lesa, Lesa wanu alimwi amilambu iyo njemulyako nyama akutila bulowa pacipaililo.

²⁸ Anu shoonse nshendamulwiita mulyeelete kushikonkela amyoyo yanu yoonse, mpeeke shintu shoonse shilaakunoomweendela kabotu pantu pomwi abamulunyungu lwanu lyoonse alyoonse, mukwiinga mulaakunoocita ciluleme alimwi cikondelesha Mwaami Lesa, Lesa wanu.

Kucenjeshekwa pakulambila shibumbwabumbwa

²⁹ “Ono Mwaami Lesa, Lesa wanu ulaakunyonyoola mishobo ya mucishi ico, lyalo mulaakucibwesa akwikalaamo.

³⁰ Na Mwaami Lesa akamane kunyonyoola mishobo iyo, mutakeeleshi kuyandoola kwishiba mbobalambila balesa babo kwaamba ayi munoolambila munshila yeenka iyo.

³¹ Mutakanoolambila Mwaami Lesa, Lesa wanu munshila njebalambililamo balesa babo, mukwiinga pakulambila balesa babo balacita shintu shoonse shilensha bunya, isho Mwaami Lesa nshaapatite. Balo balabenga abana babo pashipaililo shabo ayi njimilambu.

³² “Mwebo mulyeelete kunoocita shintu shoonse nshendamulwiita. Tamweelete kunungaawo nabi kukushaawo.