Dutolonomi 11 - Baibo Busansulushi Bwa Libuku Ili

Bunene bwa Mwaami Lesa

¹ “Amusune Mwaami Lesa, Lesa wanu alimwi kamukonkela milawo amilasho yakwe yoonse.

² Amwiibaluke sunu nshemweeya paMwaami Lesa kwiinda mushintu nshemwakalinga kubona akucita. Ndimwe mwakashibona akushicita kuteshi bana banu. Mwakabona bunene bwa Mwaami Lesa, Lesa wanu, nkusu shakwe shiindaawo

³ alimwi ashaankamiko. Mwakabona ncaakacita kuli Falawo, mwaami wa Ijipiti akucishi cakwe coonse.

⁴ Mwakabona mbuli Mwaami Lesa mbwaakalobya bashilumamba bene Ijipiti boonse, pantu pomwi amaaki alimwi ashikoci shabo kwiinda mukubalengesha kufwita muLweenge Lusalala ndibakalinga kukonkela ndimwe.

⁵ Mwebo nobeene mulishi Mwaami Lesa ncaakamucitila muluyanga kamutana kushika kokuno.

⁶ Amwiibaluke ncaakacita kuli Datani aAbilamu, bana bakwe Eliyabu basankwa, bamumukowa wakwe Lubeni. Mumeenso anu noonse inshi yakacaluka akubamina pantu pomwi abamumaanda abo boonse, misumba yabo, basebenshi babo boonse alimwi ashifubwa.

⁷ Ee, ndimwe mwakabona shintu shinene shoonse isho shakacita Mwaami Lesa.

Shoolwe sha cishi cakashomesha Mwaami Lesa

⁸ “Mukonkele milawo yoonse njendamupa sunu. Lyalo mulaakukonsha kusubuka Mulonga wa Joodani akubwesa cishi ico ayi cikabe caanu.

⁹ Mulaakwikala ciindi cilaamfu mucishi muli bubile abulongo bubotu ico Mwaami Lesa ncaakashomesha kupa bamashali banu bakulukulu abamulunyungu lwabo.

¹⁰ Cishi ncemutooya mukwikalaamo tacibete mbuli ca Ijipiti umo mumwakalinga kwikala kataanshi. MuIjipiti mwakalinga kucita na mwashanga mbuto, mwakalinga kusebensa cankusu kutilila myuunda.

¹¹ Sombi ici ncemutooya mukwinjilaamo, ncishi ca tulundu ashinyika, alimwi ncishi cilokelwa kabotu mfula.

¹² Cishi ico Mwaami Lesa, Lesa wanu ulacilama akucibamba kabotu mwaaka woonse.

¹³ “Ono aboobo amukonkele milawo njendamupa sunu. Amusune Mwaami Lesa, Lesa wanu akumusebensela amyoyo yanu yoonse alimwi abuumi bwanu boonse.

¹⁴ Na mukacite boobo, ulaakunoolosha mfula mucishi canu paciindi ceelete, lyalo mulaakuba ashili anga ngamaila, waini, mafuta a olifi

¹⁵ alimwi abwiisu bwa shifubwa shanu. Mulaakuba ashakulya shoonse nshemusuni.

¹⁶ Mutakalisuminishi kuyungoolwa kuswa kuMwaami Lesa akutalika kulambila balesa bamwi akubasebensela.

¹⁷ Na mukacite boobo, Mwaami Lesa ulaakumukalalila. Ulaakucata mfula, lyalo inshi ilaakuyuma cakutamena shishango. Mpeeke mulaakufwa cakufwambaana mweenka umo mucishi cibotu ncaatoomupa.

¹⁸ “Maswi angu aya aakale mumyoyo amumiyeeyo yanu. Amwaange maswi aya pamikono yanu alimwi mwaafwaale pankumo ayi nciibalusho.

¹⁹ Mwaiishe kubana banu. Kamwaabandika kumishaanu nabi kumwibo, pakookesha nabi pakusebensa.

²⁰ Mwaaleembe peculu pamilyango ya maanda anu apaminjililo.

²¹ Lyalo mwebo abana banu mulaakwikala nshiku shiinji mucishi Mwaami Lesa, Lesa wanu ncaakashomesha kupa bamashali banu bakulukulu. Mulaakwikala tibili akumamanino acishi.

²² “Amukonkele cakushomeka milawo yoonse njendamupa. Amusune Mwaami Lesa, Lesa wanu, amucite shoonse nshaamba, alimwi kamushomeka kuli nguwe.

²³ Lyalo ulaakutandaanyamo bantu boonse mbuli mbweshi munooya ciya kunembo. Mpeeke mulaakwikala mucishi ca mishobo inene alimwi icite nkusu kwiinda ndimwe.

²⁴ Mulaakukoma cishi cili coonse nceshi mukayeeko. Cishi canu cilaakutalikila kuluyanga lwa kumalenge akuya kutulundu twa Lebanoni kumatwa, alimwi kuswa kuMulonga wa Yufuletisi kwicwe kushikila kuLweenge lwa Mediteleniyani kumbo.

²⁵ Taaku muntu uli woonse weshi akamukaashe. Mwaami Lesa, Lesa wanu ulaakulengesha bantu kumuloonda kuli koonse nkweshi mukaye mucishi ico coonse, bweenka mbwaakashomesha.

²⁶ “Sunu ntoomupa ciindi cakusala pakati ka coolwe alishingo.

²⁷ Na mukonkele milawo yoonse njendamupa sunu, citooba coolwe,

²⁸ Sombi litooba lishingo na mwiisuule akutalika kulambila balesa abo mbomutana kulambilawo kale.

²⁹ Mwaami Lesa aakumwinjisha mucishi ico ncemutooya mukwikalaamo, mukaambilishe coolwe paKalundu ka Gelisimu alyalo lishingo kuKalundu ka Ebali

³⁰ Tulundu tobilo utu tuli kumbo lya Mulonga wa Joodani, mucishi ca bene Kenani bekala muCinyika ca Joodani. Tuli cakumbo pafwaafwi ashisamu shinene sha kuMole pafwaafwi andabala ya Gilugala.

³¹ Muli pafwaafwi kusubuka Mulonga wa Joodani akwikala mucishi ico Mwaami Lesa, Lesa wanu ncaatoomupa. Mwaakucibwesa akwikalaamo,

³² amukabikeeko maano kukonkela milawo amilasho yoonse njeentoomupa sunu.