Dutolonomi 10 - Baibo Busansulushi Bwa Libuku Ili

Mose mbwaakatambula milawo alimwi

¹ “Lyalo Mwaami Lesa wakandwiita ayi, ‘Besa mabwe obilo apampamene mbuli ataanshi alya alimwi upange libokoshi lya mapulanga kwaamba ayi waabikeemo. Lyalo use kuli ndime pakalundu.

² Ndaakulemba pamabwe apampamene ayo maswi eenka ngondakalinga ndalemba paataanshi ngowakapwaya. Lyalo ulyeelete kwaabika mulibokoshi ilyo.’

³ “Aboobo ndakapanga libokoshi lya mapulanga amulombe akubesa mabwe obilo apampamene mbuli ataanshi, akuyaawo peculu lya kalundu.

⁴ Lyalo Mwaami Lesa wakalemba maswi eenka ngaakalinga alemba pamabwe obilo apampamene ataanshi. Maswi ayo njiMilawo ili Likumi iyo njaakamupa ndimwakalinga kubungene kukalundu. Mpomunyaawo Mwaami Lesa wakampa mabwe ayo.

⁵ Mpeeke ndakapiluluka akukunkuluka kalundu. Lyalo kweelana abwakaamba Mwaami Lesa ndakaabika mulibokoshi ilyo ndindakapanga alimwi kuswabo lyeelyo mwaabete.”

⁶ Bene Isilaeli bakanyamuka kuswa pamikalo yakwe Jaakani akuya kuMosela. Uko Aloni wakafwa akufukilwa. Mpeeke Eliyasa mwanaakwe wakabwesa musena wakwe mubupailishi.

⁷ Kuswa kooko bakaya kuGudigoda akwiindilila kuya kuJotibata musena ucite maanshi aanji.

⁸ Paciindi ico, Mwaami Lesa wakasala mukowa wakwe Lefi ayi banoolama Libokoshi lya Cipangano, akumusebensela mubupailishi alimwi akunoopa shoolwe muliina lyakwe. Uyu ucili ngomulimo wabo asunu.

⁹ Nceceeco bene Lefi ncebatakwe kupetwaawo cipansha ca cishi mbuli mikowa imwi yoonse. Balo ncebakapekwa ncoolwe cakuba bapailishi ba Mwaami Lesa, Lesa wanu kweelana ambwaakashomesha.

¹⁰ “Ono ndakekala pakalundu nshiiku makumi one mbuli mbondakacita kataanshi. Mwaami Lesa wakanyumfwa kusenga kwangu akusumina kutamunyonyoola.

¹¹ Lyalo wakandwiita ayi mutanjilile kwaamba ayi mukabwese cishi ico ncaakashomesha cakulumbila kupa bamashali banu bakulukulu.

Mwaami Lesa ncaasuni

¹² “Ono nobene Isilaeli, amukutike Mwaami Lesa ncaasuni ayi mwebo mucite. Ulisuni ayi munoomulemeka akucita shoonse nshaamba. Mumusuune, mumusebensele amyoyo yanu yoonse

¹³ alimwi akukonkela milawo amilasho yoonse njentoomupa sunu kwaamba ayi shintu shinoomweendela kabotu.

¹⁴ Liculu lili peculu pawoonse alyalo ndya Mwaami Lesa, cishi ca panshi acalo ncaakwe pantu pomwi ashintu shoonse shiliimo.

¹⁵ Ono lusuno lwa Mwaami Lesa pabamashali banu bakulukulu lwakalinga lunene abuumbi, cakwaamba ayi wakasala mwebo kuba bantu bakwe kuleka bamwi boonse alimwi mucili bantu bakwe asunu.

¹⁶ Anu aboobo kuswa sunu amutalike kunyumfwila Mwaami Lesa, mucileeke bushicimpamya.

¹⁷ Mwaami Lesa, Lesa wanu nguLesa wa balesa, Mwaami wa baami, uleendaawo alimwi ngushinkusu, weelete kuloondwa. Taasalululi alimwi taatambuli makulo.

¹⁸ Ulabikaako maano kubamucaala akubamukalubinje kubona kwaamba ayi tabatoonyengelelwa. Baswamashi bekala pakati kesu ulibasuni alimwi ulabapa shakulya ashakufwala.

¹⁹ Ono aboobo amutondeshe lusuno kubaswamashi abo ceebo amwebo mwakalinga baswamashi muIjipiti.

²⁰ Kamunyumfwila Mwaami Lesa, Lesa wanu alimwi kamulambilabo nguwe eenka. Kamushomeka akushomesha cakulumbila muliina lyakwebo.

²¹ Amumulumbaishe ceebo nguLesa wanu. Mwebo nobeene mwakabona ameenso anu shintu shikankamanisha nshaakacita ceebo ca ndimwe.

²² Bamashali banu bakulukulu ndibakaya kuIjipiti bakalingabo makumi osanwe aobilo. Sombi bulya Mwaami Lesa, Lesa wanu wamufusha anga ninyenyeenshi mwiculu.