Dutolonomi 1 - Baibo Busansulushi Bwa Libuku Ili

Mbobakalibambila kuswa pakalundu ka Olebu

¹ Mulibuku ili, muli makani Mose ngaakaambila bene Isilaeli ndyaakalinga muluyanga kwicwe lya Mulonga wa Joodani. Bakalinga mucinyika ca Joodani pafwaafwi aSufi, pakati ka ndabala ya Palani aya Tofelo, Labani, Asaloti alimwi aDisaabu.

² Mushinso uli kuswa kuSinayi kushika kuKadeshi Baniya kwiinda ya Kalundu ka Siya, wakalinga kutola nshiku likumi abomwi.

³ Pabushiku butaanshi bwa mweenshi wa likumi awomwi mumwaaka wa makumi one kuswa ndibakaswa mucishi ca Ijipiti, Mose wakabalwiita shoonse Mwaami Lesa nshaakamulasha ayi abalwiite.

⁴ Ici cakacitika Mwaami Lesa kaali wakoma kale Sioni mwaami wa bene Amoli, uyo wakalinga kweendelesha ndabala ya Eshiboni, aOgi mwaami wa Bashani, uyo wakalinga kweendelesha ndabala ya Ashitaloti aya Edileyi.

⁵ Bantu aba kabacili kwicwe lya Joodani mucishi ca Moabu, Mose wakatalika kubapandulwita milawo yakwe Lesa iyi. Wakabaambila ayi,

⁶ “Nditwakalinga paKalundu ka Sinayi Mwaami Lesa, Lesa wesu wakatulwiita ayi, ‘Ono mbubo mwekalisha pakalundu aka.

⁷ Amumwaye misumba mutolelele lweendo. Amuye kucishi ca tulundu ca bene Amoli akumisena yoonse ishingulukite nkokwaamba ayi kucinyika ca Joodani, kucishi ca tulundu akumisena ikuneme, kumisena ya kumalenge alimwi akuloombe lwa Mediteleniyani. Mukashiike akucishi ca Kenani alimwi akwiindilila cakushika kutulundu twa Lebanoni akuMulonga unene wa Yufuletisi.

⁸ Ici coonse ncecishi nebo neMwaami Lesa ncendakashomesha kupa bamashali banu bakulukulu, Abulaamu, Isaki alimwi aJakobo pantu pomwi abamulunyungu lwabo. Kamuya mukekaleemo.’ ”

Mose mbwaakasala boomboloshi

⁹ Mose wakaambila bantu ayi, “Katucili kuKalundu ka Sinayi, ndakamulwiita ayi, ‘Mulimo wakumweendelesha mwebo wankomenena. Nshikoonshi kuukonsha neenka.

¹⁰ Mwaami Lesa, Lesa wanu wamufusha anga ninyenyeenshi shili mwiculu.

¹¹ Ono Mwaami Lesa wa bamashali banu bakulukulu, aamufuushe mankanda cuulu kwiinda mbomubete akumusumpula kweelana ambwaakashomesha!

¹² Sombi nebo neenka inga ndakonsha buyani kucita mulimo wakumweendelesha akoombolosha tukani pakati kanu?

¹³ Amusale bantu basongo, bacite lushibo alimwi balemekwa kuswa mumukowa womwi awomwi, lyalo ndaakubabika ayi bamutanjilile.’

¹⁴ Mwebo mwakasumina ayi ncibotu kucita boobo.

¹⁵ Aboobo ndakabwesa basongo alimwi batanjilili balemekwa, abo mbomwakasala, akubabika ayi bamutanjilile. Bamwi bakalinga kweendelesha bali cuulu, bamwi mwaanda, bamwi makumi osanwe, abalo bamwi likumi. Ndakasala abamwi bacinenenene mumikowa yoonse.

¹⁶ “Mpomunyaawo ndakabalwiita ayi, ‘Amukutike makani akwiinga esa pakati ka bantu banu. Amoomboloshe makani oonse cakwelanisha nabi ali pakati ka bene Isilaelinyinaanu nabi na ngumwine Isilaeli amuswamashi ngomwikalaakwe.

¹⁷ Mutabi akasalulushi mukoombolosha kwanu. Bantu boonse, ulemekwa nabi utalemekwi, muboomboloshe mushobo womwi. Mutaloondi muntu nabi womwi, ceebo boomboloshi bwanu bulaswa kuli Lesa. Na kwaba mulandu weenga wayuma kuli ndimwe, inga mwauleta kuli ndime ndawoombolosha.’

¹⁸ Paciindi ceenka ico ndakamulwiita shimwi shoonse nshemwakalinga kweelete kucita.

Beshikusensa mbobakatumwa kuswa kuKadeshi Baniya

¹⁹ “Twakacita ico Mwaami Lesa, Lesa wesu ncaakatwaambila. Twakaswaawo paKalundu ka Sinayi akwiinda muluyanga lunene, luyoosha ndumwakabona nobeene kuya kucishi ca tulundu ca bene Amoli. Nditwakashika kuKadeshi Baniya,

²⁰ ndakamulwiita ayi, ‘Ono mwashika kucishi ca tulundu ca bene Amoli, ico Mwaami Lesa, Lesa wesu nceshi atupe.

²¹ Amubone aneeci. Kamuya mwikaleemo kweelana abwakaamba Mwaami Lesa, Lesa wa bamashali banu bakulukulu, mutaloondi nabi kutonsha.’

²² “Sombi mwebo mwakesa kuli ndime akwaamba ayi, ‘Atutanjisheeko basenseshi kwaamba ayi bakese bakatulwiite nshila njetweelete kwiinda alimwi abubete mandabala anene uko.’

²³ “Muyeeyo uyo wakankonda. Aboobo ndakasala basankwa bali likumi abobilo nkokwaamba ayi womwi mumukowa womwi awomwi.

²⁴ Mpeeke bakaya mucishi ca tulundu kushika akucinyika ca Eshikolu akucisensa.

²⁵ Ndibakaboola bakatuletela shisepo nshibakacanaako uko. Bakaluula ayi cishi Mwaami Lesa, Lesa wesu ncaatootupa cilicite bulongo bubotu abuumbi.

²⁶ “Sombi mwakakaka mulasho wa Mwaami Lesa, Lesa wanu. Ncakwiila mwakakaka kwinjila mucishi ico.

²⁷ Mwakatalika kutongookelana mumisumba yanu ayi, ‘Mwaami Lesa ulitupatite. Wakatukusha muIjipiti kwaamba ayi ese atwaabebo kubene Amoli ayi batucaaye.

²⁸ Nceebonshi nceenga twaitako uko? Twaloonda. Basankwa mbotwakatumaako bakatulwiita ayi bantu bali kooko balishimpite alimwi mbalaamfu abuumbi kwiinda ndiswe. Balekala mumandabala anene acite lubumbu lulaamfu abuumbi. Bakabonaako abamulunyungu lwa bantu bapolomene beetwa ayi Anakimu!’

²⁹ “Sombi ndakamwaambila ayi, ‘Mutaloondi bantu abo.

³⁰ Mwaami Lesa, Lesa wanu utoomutanjilila alimwi utoomulwaninaako bweenka mbomwakabona kaacita muIjipiti

³¹ amuluyanga. Mwakabona mbwaakamweensha kabotu lweendo loonse kushika pamusena pano, bweenkabo mbuli mushali musankwa mbweenga wanyamuna mwanaakwe musankwa.’

³² Ono nakubi kwaamba ayi ndakamulwiita boobo, tamukwe kukonsha kushoma Mwaami Lesa, Lesa wanu.

³³ Wakamutanjilila mulweendo lwanu mulicincilo lya mulilo mashiku alimwi mulicincilo malumwi. Wakalinga kumuyandweeta misena yakuyakawo misumba akumutondesha nshila njemweelete kwiinda.

Mwaami Lesa mbwaakapa bene Isilaeli mulandu

³⁴ “Mwaami Lesa ndyaakanyumfwa kutongooka kwanu, wakakalala. Mpeeke wakashomesha cakulumbila ayi,

³⁵ ‘Taaku muntu nabi womwi pakati kanu nobamucita shibi ba cecino ciindi, eshi akenjile mucishi ca bulongo bubotu, ico ncendakashomesha bamashali banu bakulukulu.

³⁶ Kalebu eenkabo mwanaakwe Jefune ngweshi akenjile mucishi ico. Lakwe watolelela kushomeka amoyo woonse kuli ndime. Ndaakupa nguwe abamulunyungu lwakwe cishi ici, ee, cishi ncaakasensa.’

³⁷ Ceebo ca ndimwe, Mwaami Lesa wakakalalila anebo akwaamba ayi, ‘Awebo Mose teshi ukenjileemo mucishi ico.

³⁸ Sombi shikukucafwa, Joshuwa mwanaakwe Nani ulaakwinjila mucishi ico. Umuyuminishe mukwiinga ulaakutanjilila bene Isilaeli kuya mukucibwesa.’

³⁹ “Lyalo Mwaami Lesa wakaambila swebo soonse ayi, ‘Bana banu abo bacili baniini abuumbi batana kwishiba bubi abubotu, balaakwinjila mucishi ico. Aba mbobaana mwebo mbomwakaamba ayi balaakucatwa kubalwani banu. Ndaakubapa cishi alimwi cilaakuba cabo.

⁴⁰ Sombi mwebo noonse amupiluluke muboolele muluyanga munshila iya kuLweenge Lusalala.’

⁴¹ “Lyalo mwebo mwakakumbula ayi, ‘Mose, twabishisha Mwaami Lesa. Ono bulya tutooya tukalwaane bweenka bwaamba Mwaami Lesa, Lesa wesu.’ Mpeeke womwi awomwi pakati kanu wakalibambila kuya mukulwana, kamuyeeya ayi ncuubu kulwana cishi ca tulundu.

⁴² “Sombi Mwaami Lesa wakandwiita ayi, ‘Bacenjeshe ayi batalwaani ceebo teshi nooli abo. Aboobo balwani babo batoobakoma.’

⁴³ Ndakamulwiita Mwaami Lesa mbwaakaamba, sombi tamukwe kunyumfwaawo napaceyi. Mwakakaka mulasho wakwe alimwi mukulisumpula kwanu nobeene mwakaya mucishi ca tulundu mukulwana.

⁴⁴ Lyalo bene Amoli abo bakalinga kwikala mutulundu uto bakaswa anga ninsuki shiinji ayi bamulwaane. Bakamutandaanya kushika akuOma akumukoma mucishi ca tulundu ca Edomu.

⁴⁵ Mpeeke mwakalilila Mwaami Lesa ayi amucaafwe, sombi taakwe kumukutika nabi kumubikaako maano.

⁴⁶ Ono mwakekala kuKadeshi kwaciindi cilaamfu.