Danyelo 8 - Baibo Busansulushi Bwa Libuku Ili

Cili anga nciloto cakwe Danyelo ca mbelele isankwa ampongo

¹ Mumwaaka watatu wa bwaami bwakwe Beloshasa, nebo neDanyelo ndakabona cili anga nciloto cabili.

² Mucili anga nciloto ico ndakalicana muSusa ndabala inene icite lilinga mucishi ca Elamu. Ndakalinga kwiimfwi muloombe lwa Mulonga wa Ulayi.

³ Ndakeenamuka akubona mbelele isankwa kunembo lyangu iyo yakalinga kucite meeca obilo alaamfu kayiimfwi muloombe lwa mulonga uyo. Liica lyomwi lyakalinga lilaamfu kwiinda libye. Lifwaafwi ndilyakataanguna kumena, pesule lilaamfu ndilyakamena.

⁴ Ndakeebela mbelele isankwa iyo keetatukila banyama bamwi kumbo, kumatwa alimwi akumalenge. Taaku munyama wakalinga kukonsha kuyiimika nabi kufuna umwi kuswa munkusu sha njiyo. Yakalinga kucitabo kulilabo nceensuni akuba abulemu.

⁵ Kaanciyeeya pacikani ico, cakuteengashila mpongo yakaswa kulubasu lwa kumbo, keecica cakutalyata panshi. Mpongo iyo yakalinga kucite liica lyomwi linene pakati ka meenso a njiyo.

⁶ Yakalulama kumbelele iyo njendakabona kayiimfwi kuloombe lwa mulonga akwiifuumukila cabukali buyoosha.

⁷ Ndakeebela mpongo iyo ndiyakalwana mbelele isankwa iyo. Mpongo iyo yakalinga kukalalite abuumbi cakwaamba ayi yakapunka mbelele iyo akutyoloola meeca a njiyo obilo. Kuswawaawo mbelele yakabula nkusu shakwiilwana. Mpongo iyo yakashindikila mbelele iyo panshi akwiilyatoola. Taaku wakalinga kukonsha kwiifuna kunkusu sha mpongo.

⁸ Mpongo iyo yakaba abulemu buunji, sombi keecicite bulemu buunji, liica lya njiyo linene lyakatyolwa. Mumusena wa ndilyo, mwakamena meeca anene amwi one. Lyomwi alyomwi lyakalanga kulubasu lwa ndilyo.

⁹ Pakati ka meeca one ayo, kuliica lyomwi kwakamena liica limwi. Nkusu sha liica ilyo lyakamena shakamwaikila kumalenge, kwicwe alimwi akucishi cibotu.

¹⁰ Liica ilyo lyakaba ankusu abuumbi cakulwanabo alikoto lya nyenyeenshi sha kwiculu. Lyakawaala shimwi panshi akushilyatoola.

¹¹ Lyakalisumpula cakunyansha aMuleli wa likoto lya kwiculu. Lyakakasha milambu ya bushiku abushiku iyo yakalinga kubengwa kuMuleli uyo akubisha Ŋanda yakwe.

¹² Bantu bakatalika kubisha muŊanda iyo mumusena wakubenga milambu yabushiku abushiku yeelete. Lushinisho mukulambila lwakasowekwa. Liica ilyo lyakalinga kuswitilila mushintu shoonse nshelwakalinga kucita.

¹³ Lyalo ndakanyumfwa usalalite umwi kaamba aumwi usalalite wakamwaambila ayi, “Citooba ciindi cilaamfu buyani cili anga nciloto ici kacitana kucitika cancinencine? Citooba ciindi cilaamfu buyani bubi ubo bulensha bunya kabushinkila kubengwa kwa milambu ya bushiku abushiku? Citooba ciindi cilaamfu buyani likoto lya nyenyeenshi sha kwiculu kalilyatililwa pantu pomwi aŊanda yakwe Lesa?”

¹⁴ Lyalo ndakanyumfwa usalalite umwi wakakumbula ayi, “Cilaakutola macolesha amacuunsa ali 2,300, lyalo Ŋanda yakwe Lesa ilaakusalashikwa.”

Munjelo Gabuliyelo mbwaakasansulula cili anga nciloto ico

¹⁵ Ono nebo neDanyelo kaanceebela cili anga nciloto ico akweelesha kwishiba ncecaamba, cakuteengashila ndakabona muntu wakeemikana kunembo lyangu.

¹⁶ Lyalo ndakanyumfwa liswi kuswa kwitala lya Mulonga wa Ulayi lyakoolobesha ayi, “Gabuliyelo, mulwiite ncecaamba cili anga nciloto ncaabona.”

¹⁷ Mpomunyaawo Gabuliyelo wakesa weemikana kulubasu lwangu, sombi ndakaloonda abuumbi cakwaamba ayi ndakawita panshi. Mpeeke wakandwiita ayi, “Webo omuntu, kutika ncecaamba cili anga nciloto ici. Citokwaamba kuciindi ca kumeelelesho acishi ca panshi.”

¹⁸ Kaacaamba kuli ndime, ndakalinga kuwisukite panshi apo mpondakalinga kulete cakufubama. Mpeeke lakwe wakancata akunjimika.

¹⁹ Mpomunyaawo wakaamba ayi, “Ntookulwiita ceshi cikacitike kunembo muciindi ca bukali bwakwe Lesa. Cili anga nciloto citootondeka kuciindi ca meelelesho.

²⁰ “Mbelele isankwa icite meeca obilo njewabona, ileemikanina bulelo bwa bene Mediya abwa bene Pesha.

²¹ Mpongo ileemikanina bulelo bwa bene Gilisi. Liica linene pakati ka meenso a njiyo lileemikanina mwaami wakutaanguna wa bulelo ubo.

²² Meeca one ayo akaswa liica lyakutaanguna ndilyakatyolwa, aleemikanina malelo one eshi akaswe mumushobo wa mwaami uyo. Sombi malelo ayo teshi akabe ankusu sheelene abulelo bwakutaanguna.

²³ “Meelelesho a malelo ayo aakushika pafwaafwi alimwi malelo ayo akuba abubi buunji cakwaamba ayi alyeelete kupekwa mulandu, kulaakuba mwaami shicimpamya, shilunkutwe alimwi mubeshi.

²⁴ Ulaakuba abulemu, sombi kuteshi kwiinda munkusu shakwe mwiine. Ulaakulengesha kunyonyooka kuyoosha akuswitilila mushintu shoonse nsheshi akacite. Ulaakunyonyoola beshinkusu alimwi abantu bakwe Lesa.

²⁵ Ono ceebo cakwaamba ayi ulaakunoocenjete abuumbi, ulaakuswitilila munshila shakwe shakubeca. Ulaakulisumpula akunyonyoola bantu baanji cakutabacenjesha. Ulaakunyansha aMuleli wa baleli boonse, sombi ulaakunyonyoolwa cakubula kusebenseshawo nkusu shabuntu.

²⁶ Cili anga nciloto ici ca milambu yamacolesha amacuunsa ncewapekwa cilaakucitika cancinencine. Nakubi boobo bulya cibebo cabushishi mukwiinga cilaakucitika kalekale.”

²⁷ Nebo neDanyelo mubili wakatyolooka abuumbi akuciswa kwanshiku shiinji. Lyalo ndakanyamuka akuboola kumulimo uyo wakampa mwaami. Sombi cili anga nciloto ico cakampensha abuumbi mumoyo alimwi ndakaalilwa kucinyumfwisha.