Danyelo 7 - Baibo Busansulushi Bwa Libuku Ili

DANYELO MBWAAKASANSULULA SHILI ANGA NSHILOTO SHAKWE ( 7:1—12:13 ) Cili anga nciloto cakwe Danyelo ca banyama bone

¹ Mumwaaka wakutaanguna wa bwaami bwakwe Beloshasa, mwaami wa bene Babiloni, nebo neDanyelo ndakalota akubona shili anga nshiloto mashiku kaandete pabulo bwangu. Ciloto ico ndakacilemba.

² Ndakalemba ayi, “Muciloto cangu mashiku ndakalanga akubona myuuwo yone keepuupa kuswa kumbasu shoonse akufundaanya maanshi a mulweenge lulaamfu.

³ Mpeeke banyama banene bone bapusenepusene bakaswa mulweenge ulo.

⁴ Mutaanshi wakalinga anga ninkalamu alimwi wakalinga kucite mapapaminwa anga ngumumbankwashi. Kaanceebela, mapapaminwa ayo akasutulwaako. Lyalo munyama wakanyamunwa akulengeshekwa kwiimikana anga ngumuntu. Mpomunyaawo wakapekwa kalango ka buntu.

⁵ “Munyama wabili wakalinga kuboneka anga ngubeya kaaimfwi amyeendo yakwisule. Munyama uyo wakalinga kucatite mapinga otatwe mumeeno akwe. Ono liswi lyakamwaambila ayi, ‘Tolelela kulya nyama iinji tibili ukute.’

⁶ “Kaanceebela ndakabona munyama umwi wakalinga kuboneka anga ngushiluwe. Pamusana wakwe pakalinga mapapaminwa one ali anga nga muyuni. Wakalinga kucite mitwi yone alimwi wakapekwa nkusu abulemu bwakulela.

⁷ “Kaanceebela kwakaboneka munyama wane uloondesha abuumbi alimwi ucite nkusu shiinji. Wakalinga kucite meeno anene a nshimbi. Wakapwayoola banyama bamwi ameeno akwe a nshimbi akubalya alimwi akulyatoola sheesho shakacaala. Munyama uyo wakalinga kupuseneeko abanyama bamwi boonse alimwi wakalinga kucite meeca ali likumi.

⁸ Ndindakalinga kuyeeya pameeca ayo, ndakabona kaliica kaniini kakaswa pakati ka meeca amwi. Pakuswa kakatupula meeca amwi otatwe ayo akalingaawo kale. Kaliica ako kakalinga kucite meenso a muntu amulomo wakalinga kwaamba cakulisumpula.

Cili anga nciloto ca Lesa walyoonse alyoonse

⁹ “Kaanceebela shuuna sha bwaami shakabambwa, lyalo Lesa walyoonse alyoonse wakekala pacuuna comwi. Shakufwala shakwe shakalinga kutuba anga ncaandwa. Misusu yakwe yakalinga kutuba anga mbutonge. Cuuna cakwe ca bwaami cakalinga kubilimabo mulilo aalo mawilo a ncico akalinga kunyaka.

¹⁰ Mulonga wa mulilo wakalinga kukunka, ee, kukunka kuswa muli ncico kuya kunembo lyakwe. Kwakalinga shuulu ashuulu sha baabo bakalinga kumusebensela. Kunembo lyakwe kwakalinga kwiimfwi bantu baanji cakutabelengeka. Nkuta yakatalika amabuku akacalulwa.

¹¹ “Ndakatolelela kweebela ceebo ca maswi akulisumpula akalinga kwaamba kaliica kaniini. Kaanjebela munyama uyo wakacaikwa akuwaalwa mumulilo utoonyaka tibili wanyonyoolwa.

¹² Banyama bamwi bakanyaikwa nkusu shabo, sombi bakasuminishikwa kunoocili boomi kwaciindi ciniini.

¹³ “Muciindi ca cili anga nciloto ico mashiku, ndakabona wakalinga kuboneka anga ngumwanaamuntu keesa mumakumbi a kwiculu. Ndyaakashika pafwaafwi, wakatondeshekwa kuli Lesa walyoonse alyoonse.

¹⁴ Mpeeke wakapekwa nkusu, bulemu abwaami kwaamba ayi bamumishobo yoonse, bashikanda shipusenepusene abamumilaka yoonse ayi bamulambile. Bulelo bwakwe teshi bukamaneewo alimwi Bwaami bwakwe teshi bukanyonyoolweewo.

Shili anga nshiloto mboshaamba

¹⁵ “Nebo neDanyelo, shili anga nshiloto nshendakabona shakankankamika akumpensha abuumbi mumoyo.

¹⁶ Mpeeke ndakaya kumuntu womwi pabaabo bakalinga kwiimfwi kunembo pamusena uyo akumwiipusha bwaamba shintu isho. Lyalo wakansansulwita mboshaamba.

¹⁷ Wakaamba ayi, ‘Banyama banene bone abo baleemikanina malelo one ayo eshi akabe mucishi ca panshi.

¹⁸ Sombi bantu basalalite bakwe Lesa wa kwiculu Wiindaawo, balaakutambula bulelo ubo bweshi bukabe bwaabo kwalyoonse alyoonse.’

¹⁹ “Ono ndakayanda kwishiba shamunyama wane uyo wakalinga kupuseneeko abanyama bamwi boonse, munyama uyo wakalinga kuloondesha abuumbi, uyo wakalinga kucite meeno anene a nshimbi amaala a bulonse, uyo wakapwayoola banyama bamwi ameeno akwe a nshimbi akubalya alimwi akulyatoola sheesho shakacaala.

²⁰ Peculu lya waawo ndakalinga kusuni kwishiba shameeca likumi ayo akalinga pamutwi wakwe alimwi ashakaliica ako kakaswa pesule akutupula meeca amwi otatwe. Ee, ndakalinga kusuni kwishiba shakaliica, ako kakalinga kucite meenso a muntu amulomo wakalinga kwaamba cakulisumpula, ako kakalinga kuloondesha kwiinda meeca amwi oonse.

²¹ “Kaanceebela kaliica ako kakalinga kulwana bantu basalalite bakwe Lesa alimwi kakalinga kukoma,

²² tibili Lesa walyoonse alyoonse ndyaakesa mukupa bupingushi bwakwe mukufuna bantu basalalite bakwe Lesa wa kwiculu Wiindaawo abo mukwiinga ciindi cakashika cakwaamba ayi bulelo bube bwaabo.

²³ “Wakansansulwita ayi, ‘Munyama wane uyo uleemikanina bulelo bwane ubo bweshi bukabe mucishi ca panshi alimwi bweshi bukapusaneeko amalelo amwi. Bulaakupwayoola cishi coonse ca panshi akucilyatoola.

²⁴ Meeca ali likumi aleemikanina bamaami bali likumi abo beshi bakanooli mubulelo ubo. Pesule kulaakuba mwaami umwi upuseneeko abaabo bamwi boonse. Mwaami uyo ulaakukoma bamaami botatwe.

²⁵ Mwaami uyo ulaakunokwaamba shintu shakulwana Lesa wa kwiculu Wiindaawo akupensha bantu bakwe Lesa. Ulaakweelesha kusandula nshiku shakusekelela shibambitwe alimwi aMilawo yakwe Lesa. Bantu basalalite bakwe Lesa balaakuba mumaansaakwe kwamyaaka yotatwe amusa.

²⁶ Lyalo nkuta yakwiculu ilaakwikala ayi yoomboloshe. Ulaakunyaikwa nkusu shakwe alimwi bulelo bwakwe bulaakunyonyoolwa cakumaninina.

²⁷ Nkusu shoonse abulemu boonse bwa malelo oonse a mucishi ca panshi shilaakupekwa kubantu basalalite bakwe Lesa wa kwiculu Wiindaawo. Bulelo bwabo bulaakuba bwalyoonse alyoonse alimwi baleli boonse ba mucishi ca panshi balaakunoobasebensela akubanyumfwila.’

²⁸ “Ono makani ayo mpaaela peenka apa. Nebo neDanyelo ndakapenshekwa abuumbi mumoyo alimwi ciwa cangu cakasanduka kuboowa, sombi makani ayo ndakaaumunabo.”