Danyelo 6 - Baibo Busansulushi Bwa Libuku Ili

Danyelo mbwaakawaalwa mucilindi ca nkalamu

¹ Lyalo Dalyasi wakayeeya kusala beendeleshi bali mwaanda amakumi obilo kwaamba ayi banoocafwa kweendelesha bwaami bwakwe.

² Kubikaawo abacinenenene botatwe, Pabotatwe abo womwi wakalinga nguDanyelo. Beendeleshi abo bakalinga kulangwa abacinenenene botatwe abo kwaamba ayi kubule ca mwaami cisoweka.

³ Ono cakufwambaana cakeshibwa ayi Danyelo ulakonsha kusebensa kabotu kwiinda bacinenenene bamwi alimwi abeendeleshi ceebo ca mibo yakwe ibotu abuumbi. Paceebo ceeco mwaami wakayeeya kumulengesha kuba wacinenenene wiindaawo mubwaami bwakwe boonse.

⁴ Mpomunyaawo bacinenenene bamwi pantu pomwi abeendeleshi abo bakatalika kuyandoola mpweenga bapeta Danyelo mulandu munshila iyo njaakalinga kweendelesheshamo bwaami. Sombi bakaalilwa mukwiinga Danyelo wakalinga kushomeka alimwi taakwe kucitawo cilubite nabi cakutashomeka.

⁵ Lyalo bacinenenene abo bakaamba ayi, “Teshi tukacaneewo mulandu wakupa Danyelo, sombibo na caamba kumulawo ukumya kunshila njaapaililamo Lesa wakwe.”

⁶ Mpeeke boonse bakaya kuMwaami akwaamba ayi, “Nobaami baDalyasi, kamweendela buumi lyoonse!

⁷ Bacinenenene bamwi, beendeleshi boonse, beshikupandaako maano abacinenenene bamwi boonse basumina kwaamba ayi mwebo nobaami mupange mulawo wakwaamba ayi, ‘Kuswa sunu kushikila bushiku bwamakumi otatwe, muntu uli woonse uyo weshi akacanike kaapaila kuli lesa umwi nabi kumuntu umwi, kulekabo ndimwe nobaami, ulaakuwaalwa mucilindi ca nkalamu.’

⁸ Ono bulya nobaami, amulembe mulawo uyo akubikawo keshibilo kanu. Lyalo ulaakukonkelwa akuba mulawo wa bene Mediya abene Pesha utakoonshi kupilulwa.”

⁹ Lyalo mwaami Dalyasi wakalemba mulawo uyo akubikaawo keshibilo kakwe.

¹⁰ Danyelo ndyaakanyumfwa ayi mwaami wapanga mulawo uyo, wakenjila mucipinda ca peculu ca ŋanda yakwe apo pakalinga mbwelyo yakalinga kulangite kundabala ya Jelusalemu. Wakalinga kufukama mankanda otatwe pabushiku akupaila mukulumba Lesa wakwe bweenka mbwaakalinga kucita kuswabo kalekale.

¹¹ Mpomunyaawo balwani bakwe Danyelo bakaya boonse mulikoto akumucana kaapaila kuli Lesa.

¹² Lyalo bakaya kumwaami akubandikaakwe pamulawo uyo ngwaakapanga ayi, “Nobaami, sa tamukwe kupanga mulawo wakaamba ayi kwanshiku makumi otatwe muntu uli woonse uyo weshi akacanike kaapaila kuli lesa umwi nabi kumuntu umwi, kulekabo ndimwe, ulaakuwaalwa mucilindi ca nkalamu?” Mwaami wakakumbula ayi, “Ee, mulawo uyo uciimfwi abobulya kweelana amilawo ya bene Mediya abene Pesha iyo itakoonshi kupilulwa.”

¹³ Mpeeke bakaambila mwaami ayi, “Danyelo womwi wa basha abo bakaswa kucishi ca Juda taamulemeki nobaami nabi kukonkela mulawo uyo ngomwakapanga. Lakwe ucipaila kuli Lesa wakwe mankanda otatwe pabushiku.”

¹⁴ Mwaami ndyaakanyumfwa boobo, wakoongumana abuumbi akweelesha kuyandoola nshila yakufuninaamo Danyelo. Wakeelesha cankusu tibili lisuba ndilyakawa.

¹⁵ Lyalo basankwa abo bakaboola boonse kumwaami mulikoto akumwaambila ayi, “Nobaami, mulishi kwaamba ayi kweelana amilawo ya bene Mediya abene Pesha, taaku mulawo nabi mulasho wapanga mwaami ukonsha kupilulwa.”

¹⁶ Paceebo ceeco mwaami wakaamba ayi Danyelo aacatwe akuwaalwa mucilindi ca nkalamu. Nakubi boobo wakaambila Danyelo ayi, “Lesa wako, uyo ngoosebensela cakushomeka, aakupulushe.”

¹⁷ Libwe linene lyakaletwa akufwekwa pamulomo wa cilindi ico. Pali ndilyo mwaami wakabikaawo akeshibilo kakwe ka bwaami pantu pomwi atwishibilo twa bacinenenene bakwe boonse. Bakacita boobo kwaamba ayi kutabi upulusha Danyelo.

¹⁸ Lyalo mwaami wakaboolela kuŋanda yakwe ya bwaami akwikala mashiku oonse cakubula kulyaawo alimwi kwakubula shakumusangalasha shili shoonse. Peculu lya waawo wakaba acilabila.

¹⁹ Kumuyamaca mwaami wakanyamuka akucicila kucilindi ca nkalamu.

²⁰ Ndyaakashika wakeeta Danyelo campwampwa moyo ayi, “Danyelo omusebenshi wakwe Lesa muumi, sa Lesa uyo ngoosebensela cakushomeka wakonsha kukupulusha kunkalamu?”

²¹ Mpomunyaawo Danyelo wakakumbula ayi, “Nobaami, kamweendela buumi!

²² Lesa wangu watuma munjelo uyo wacala milomo ya nkalamu. Tashikwe kuncisaawo napaceyuubo ceebo ndacanika ayi nshicite mulandu pameenso akwe alimwi nshikwe kucitawo cilubo nabi comwi kuli ndimwe, nobaami.”

²³ Mwaami wakasangalala abuumbi akwaamba ayi Danyelo akushikwe mucilindi. Ndyaakakushikwa mucilindi ico, wakacanika ayi taacitewo cimenga nabi comwi ceebo wakacinka manungo muli Lesa wakwe.

²⁴ Lyalo mwaami wakaamba ayi abo bakalinga bapa mulandu Danyelo bacatwe akuwaalwa mucilindi ca nkalamu pantu pomwi abamakaabo alimwi abana babo. Kabatana kushika apanshi lya cilindi, nkalamu shakababaka akupwayoola mafuwa abo oonse.

²⁵ Kuswawaawo mwaami Dalyasi wakalemba nkalata kubamumishobo yoonse, bashikanda shipusenepusene abamumilaka yoonse mucishi ca panshi coonse. “Ndamwaansha noonse.

²⁶ “Ndapa mulawo mubwaami bwangu boonse ayi muntu womwi awomwi ulyeelete kuloonda akulemeka Lesa wakwe Danyelo. “Lakwe ngoLesa muumi weshi akabeeko kwalyoonse alyoonse. Bwaami bwakwe teshi bukanyonyoolweewo alimwi bulelo bwakwe teshi bukamaneewo.

²⁷ Ulafuna akupulusha, ulacita shitondesho sha nkusu sha kwiculu ashaankamiko kwiculu alimwi apacishi ca panshi. Wakapulusha Danyelo kuswa kumilomo ya nkalamu.”

²⁸ Kuswawaawo Danyelo wakaswitilila abuumbi mubwaami bwakwe Dalyasi abwakwe Sailasi mwine Pesha.