Danyelo 5 - Baibo Busansulushi Bwa Libuku Ili

Kusekelela kwakwe Beloshasa

¹ Bumwi bushiku mwaami Beloshasa wakeeta bacinenenene bali cuulu kwisa mukusekelela kunene abuumbi. Lyalo Beloshasa wakanwaabo waini.

² Beloshasa ndyaakalinga kunwa waini wakwe, wakaambila basebenshi bakwe ayi baye balete nkomeshi sha golodi asilifa isho Nebukadinesa mushali wakwe nshaakaleta kuswa muŊanda yakwe Lesa kuJelusalemu. Beloshasa wakacita boobo kwaamba ayi lakwe, bacinenenene, bamakaakwe, bakasuwa bakwe banwiteemo.

³ Lyalo bakaya baleta nkomeshi sha golodi isho shakaswa muŊanda yakwe Lesa kuJelusalemu. Mpeeke mwaami, bacinenenene, bamakaakwe abakasuwa bakwe bakanwitaamo.

⁴ Ndibakalinga kunwa waini bakalinga kulumbaisha balesa ba golodi, ba silifa, ba bulonse, ba nshimbi, ba shisamu alimwi aba mabwe.

⁵ Cakuteengashila lyaansa lya muntu lyakaboneka akutalika kulemba palubumbu lwa ŋanda ya bwaami apo pakalinga kwiindaawo kutuba mukwiinga malampi akalinga kumunika abuumbi palubasu apo. Lyaansa ilyo Mwaami wakalibona kalilemba.

⁶ Ciwa ca mwaami cakasanduka kuboowa. Wakaloonda abuumbi cakwaamba ayi mumanungo mwakaboolabo tontolo.

⁷ Lyalo wakoolobesha ayi kwiitwe beshimampelampela, basongo ba shintu shili mwiculu alimwi abamukamwaami. Ono ndibakesa mwaami wakabaambila ayi, “Uli woonse weshi abelenge ishi shilembetwe palubumbu apa akundwiita mboshaamba, ntoomupa shakufwala shibotu shifubelafubela shabwaami akufwalikwa ncetani ya golodi munshingo. Peculu lya waawo utoosumpulwa kuba muleli watatu mubwaami bwangu.”

⁸ Lyalo beshikumupandaako maano boonse bakasena pafwaafwi, sombi taaku nabi womwi wakakonsha kubelenga malembo ayo nabi kulwiita mwaami mbwaakalinga kwaamba.

⁹ Paceebo ceeco ciwa ca mwaami Beloshasa cakeendawobo kusanduka kuboowa abalo bacinenenene bakwe taaku ncebakacitaawo.

¹⁰ Muka mwaami ndyaakanyumfwa coongo cakacita mwaami Beloshasa abacinenenene bakwe wakenjila mucipinda cakusekelelaamo. Lyalo wakaamba ayi, “Nobaami kamweendela buumi kwalyoonse alyoonse! Ono ndaseenga kwaamba ayi mutaloondi bunene.

¹¹ Kuli musankwa mucishi canu ucite mushimu wa balesa muli nguwe. Bashali banu baNebukadinesa kabacili baami, musankwa uyo wakacanika kwaamba ayi ulicite maano, lushibo alimwi abusongo anga mbalesa. Balo baNebukadinesa bashali banu bakamusala ayi abe munene wa beshikusonda, beshimampelampela, basongo ba shintu sha mwiculu alimwi abamukabaami.

¹² Liina lyakwe musankwa uyo nguDanyelo, sombi mwaami Nebukadinesa wakamutumba lya Beloteshasa. Musankwa uyo wakacanika ayi ulicite maano akankamika, lushibo alimwi amaano akunyumfwishisha shintu. Ulakonsha kusansulula shiloto, kulabulula tushimpi alimwi ulakonsha kusansulula shishisitwe. Amwiitebo Danyelo, utoomulwiita malembo aya ncaamba.”

Danyelo mbwaakasansulula malembo ayo

¹³ Aboobo Danyelo wakaletwa kunembo lya mwaami. Alakwe mwaami wakamwiipusha ayi, “Sa ndiwe Danyelo womwi wa basha abo bata baNebukadinesa mbobakaleta kuswa kuJuda?

¹⁴ Ndanyumfwa ayi mushimu wa balesa basalalite uli muli ndiwe alimwi ayi ulicite maano, maano akunyumfwishisha shintu abusongo.

¹⁵ Basongo abeshimampelampela bakeetwa ayi bese babelenge malembo aya akundwiita ncaamba, sombi boonse bakaalilwa.

¹⁶ Ono ndanyumfwa kwaamba ayi webo inga wakonsha kunyumfwisha shintu shoonse akusansulula shishisitwe. Ncakwiila na ukonshe kundwiita malembo aya ncaamba, utoofwalikwa shakufwala shifubelafubela alimwi ancetani ya golodi munshingo. Peculu lya waawo ulaakusumpulwa kuba muleli watatu mubwaami bwangu.”

¹⁷ Lyalo Danyelo wakakumbula ayi, “Sobwe nkambo, shipo shanu amushisungebo nobeene nabi kushipa umwi muntu. Nakubi boobo nobaami, ntoomubelengela malembo aya akumulwiita ncaamba.

¹⁸ “Nobaami, Lesa wa kwiculu Wiindaawo wakapa bashali banu baNebukadinesa bwaami, bulemu, nkusu abulemu bwa bulelo bwabo.

¹⁹ Ono ceebo cakwaamba ayi wakabasumpula abuumbi, bantu ba mumishobo yoonse, bashikanda shipusenepusene abamumilaka yoonse bakalinga kubaloonda akubalemeka. Bashali banu abo bakalinga kucaya muntu uli woonse ngweenga kabasuni kucaya. Bakalinga kulekelela muntu uli woonse ngweenga kabasuni kulekelela. Bakalinga kusumpula uli woonse ngweenga kabasuni kusumpula alimwi bakalinga kubombya uli woonse ngweenga kabasuni kubombya.

²⁰ Sombi ndibakatalika kulisumpula, kuba beshicimpamya alimwi beshilunkutwe bakakushikwa pacuuna ca bwaami akuswa pamusena wa bulemu.

²¹ Kuswawaawo bakabatandaanya kuswa pakati ka bantu alimwi maano abo akasanduka kuba abunyama. Bakekala ambongolo sha muluundu akunoolya bwiisu anga niŋombe alimwi mume kuswa kwiculu wakalinga kubatontosha. Kuswawaawo bakasumina ayi Mwaami Lesa wa kwiculu Wiindaawo ngomwaami pamalelo a bantu alimwi ngooapa kubantu abo mbwaasuni.

²² “Sombi mwebo nobaBeloshasa nobana babo tamukwe kulibombyaawo nakubi kwaamba ayi mulishi cikani coonse ici.

²³ Ncakwiila mwebo mwakalisumpula akulwana Mwaami Lesa wa kwiculu. Mwakatuma bantu kumuletela nkomeshi shakaswa muŊanda yakwe. Lyalo mwebo, bacinenenene, bamakaanu alimwi abakasuwa banu mwakanwitaamo waini akulumbaisha balesa ba silifa, ba golodi, ba bulonse, ba nshimbi, ba shisamu alimwi aba mabwe abo batakonshi kubona, kunyumfwa nabi kwishiba cintu nabi comwi. Sombi tamukwe kulemeka Lesa uyo ucite buumi bwanu mumaansaakwe pantu pomwi anshemucita.

²⁴ Nceceeco Lesa ncaatumina lyaansa ilyo lyalemba malembo ayo.

²⁵ “Malembo alinga alembwa ngaaya: “MENE, MENE, TEKELI, PASINI.

²⁶ Maswi alaamba bobulya: “MENE, nkwaamba ayi Lesa wabelenga nshiku sha kulela kwanu, ono washishisha kumeelelesho.

²⁷ “TEKELI, nkwaamba ayi mwapiimwa pacakupimishaako akucanika ayi mulyuubite.

²⁸ “PASINI, nkwaamba ayi bulelo bwanu bwabaanishikwa akupekwa kubene Mediya alimwi abene Pesha.”

²⁹ Mpomunyaawo Beloshasa wakaamba ayi Danyelo afwalikwe shakufwala shilya shifubelafubela sha bwaami akufwalikwa ncetani ya golodi munshingo. Lyalo wakaambilishikwa ayi ngumuleli watatu mubwaami ubo.

³⁰ Mashiku eenka ayo Beloshasa mwaami wa bene Babiloni wakacaikwa.

³¹ Mpeeke Dalyasi mwine Mediya wakabwesa bwaami kaacite myaaka ili makumi osanwe amyaaka yobilo.