Danyelo 4 - Baibo Busansulushi Bwa Libuku Ili

Ciloto cabili ca mwaami Nebukadinesa

¹ Kuswa kuli ndime nemwaami Nebukadinesa kubantu bamumishobo yoonse, bashikanda shipusenepusene alimwi amumilaka yoonse mucishi ca panshi. Ndamwaansha noonse.

² Ndikondetwe abuumbi kumulwiita shitondesho sha nkumbu sha kwiculu ashaankamiko isho Lesa wa kwiculu Wiindaawo nshaancitila nebo.

³ Shitondesho sha nkusu sha kwiculu shakwe shilayoosha abuumbi. Shaankamiko isho nshaacita nshankusu shiindaawo. Bweene bwakwe, mbweene bwamuyayaya. Bulelo bwakwe bulaakunoolikobo kwalyoonse alyoonse.

⁴ Ndakalinga kwikalabo kabotu muŋanda yangu ya bwaami, kaandiibitebo akusangalala mukuswitilila kwangu.

⁵ Sombi ndakalota cintu ciloondesha akubona shili anga nshiloto shilensha boowa ndindakalinga kulete.

⁶ Aboobo ndakeeta beshikumpandaako maano boonse muBabiloni kwaamba ayi bese bandwiite ciloto ncindakalota mbocakalinga kwaamba.

⁷ Lyalo beshikusonda boonse, beshimampelampela, baloshi alimwi abasongo ba shintu shili mwiculu boonse ndibakaletwa, ndakabalwiita ciloto cangu, sombi bakaalilwa kunsansulwita ciloto ico.

⁸ Kuswawaawo Danyelo uyo wiitwa ayi Beloteshasa, liina lya lesa wangu wakesa. Mushimu wa balesa basalalite uli muli nguwe. Lyalo ndakamulwiita ico ncendakalota. Ndakamwaambila ayi,

⁹ “Beloteshasa omunene wa basongo boonse, ndishi ayi mushimu wa balesa basalalite uli muli ndiwe alimwi ayi uleshiba shishisitwe shoonse. Ciloto cangu nceeci, ndwiite mbocaamba.

¹⁰ “Ndindakalinga kulete ndakabona cisamu cilaamfu abuumbi pakati ka cishi ca panshi mucili anga nciloto.

¹¹ Cisamu ico cakakula abuumbi kushika mwiculu mwiine. Bantu boonse mucishi ca panshi bakalinga kucibona.

¹² Cakalinga kucite matewu abotu abuumbi alimwi cakacata shisepo shiinji cakukwanisha bantu boonse mucishi. Banyama bamuluundu bakalinga kookeshesha mucimfule ca ncinco. Bayuni bakalinga kuyaka shiinswa mumisampi ya ncico alimwi shilengwa shoonse shuumi shakalinga kulya shisepo sha ncico.

¹³ “Ono kaanciyeeya pacili anga nciloto ico, ndakabona shinkombe usalalite keesa kuswa kwiculu.

¹⁴ Shinkombe uyo wakoolobesha ayi, ‘Amutimbule cisamu ico, amusaboole misampi ya ncinco, amucipulule matewu akusoweela shisepo sha ncico. Amulengeshe banyama kucica kuswa munshaancico alimwi abayuni kuulukaamo.

¹⁵ Sombi mushiye cishiki panshi kacaangitwe ncetani ya nshimbi abulonse cinoolibo muluundu alimwi mubwiisu. “ ‘Mume aumutontoshe alimwi eekale muluundu pantu pomwi abanyama ba mumo.

¹⁶ Anyaikwe kalango kakwe ka buntu akupekwa kalango ka bunyama kushikila myaaka yosanwe amyaaka yobilo ikeende.

¹⁷ Beshinkombe basalalite mbobaambilisha kupingula uko kwaamba ayi bantu boomi boonse beshibe ayi Mwaami Lesa Shinkusu shoonse ngoocite nkusu pamalelo a bantu alimwi ngooapa kubantu bali boonse mbwaasuni. Ncakwiila ulapa bantu balibombya kweendelesha malelo ayo.’

¹⁸ “Lyalo Mwaami Nebukadinesa wakaamba ayi, ‘Anu ici nceciloto ncendakalota. Ono webo Beloteshasa, ndwiite mbocaamba ciloto ici, mukwiinga taaku nabi womwi pakati ka basongo bali mubulelo bwangu weenga wacisansulula. Sombi webo inga wacisansulula ceebo mushimu wa baLesa basalalite uli muli ndiwe.’ ”

Danyelo mbwaakasansulula ciloto

¹⁹ Ono Danyelo uyo wiitwa ayi Beloteshasa wakakankamana abuumbi pacikani ico cakwaalilwa kwaambaawo. Aboobo mwaami Nebukadinesa wakamwaambila ayi, “Beloteshasa, ciloto ico abusansulushi bwa ncico butakuloondeshi, sobwe.” Mpomunyaawo Beloteshasa wakakumbula ayi, “Nobaami bangu, nicabota ciloto ici abusansulushi bwa ncico kashaamba pabalwani banu kuteshi ndimwe, sobwe.

²⁰ Cisamu ncemwakabona, ico cakakula abuumbi kushika mwiculu mwiine, ico bantu boonse mucishi ca panshi ncebakalinga kubona,

²¹ ico cakalinga kucite matewu abotu abuumbi alimwi cakalinga kucata shisepo shiinji cakukwanisha bantu boonse mucishi, ico cakalinga kucite cimfule umo banyama bamuluundu mobakalinga kookeshesha alimwi ico cakalinga kucite misampi umo bayuni mobakalinga kuyaka shiinswa,

²² mwebo nobaami ndimwe cisamu ico! Mwebo mwasumpuka akushimpa. Kusumpuka kwanu kwatolelela cakushikabo amwiculu mwiine alimwi bwaami bwanu bulikumenebo cishi ca panshi coonse.

²³ “Nobaami, mwebo mwakabona shinkombe usalalite keesa kuswa kwiculu akwaamba ayi, ‘Amutimbule cisamu ico akucinyonyoola. Sombi mushiye cishiki panshi kacaangitwe ncetani ya nshimbi abulonse. Mucileeke cinoolibo muluundu, mubwiisu amiyanda ya ncico keeli mubulongo. Mume aulokele pali nguwe, eekale anga mbanyama bamuluundu kushikila myaaka yosanwe amyaaka yobilo ikeende.’

²⁴ “Nobaami, anu cili anga nciloto ici cilaamba bobulya alimwi nceeci Mwaami Lesa wa kwiculu Wiindaawo ncaamba pali ndimwe nkambo:

²⁵ Mulaakutandaanishikwa kuswa pakati ka bantu akuya mukwikala abanyama bamuluundu. Mulaakunoolya bwiisu anga niŋombe alimwi mume kuswa kwiculu ulaakunoomutontosha. Cilaakuba boobo kushikila myaaka yosanwe amyaaka yobilo ikeende. Kuswawaawo ndyeshi mukasumine ayi Mwaami Lesa wa kwiculu Wiindaawo ngomwaami pamalelo a bantu alimwi ngooapa kubantu abo mbwaasuni.

²⁶ Ico shinkombe ncaamba ayi cisamu citimbulwe akushiyabo cishiki cilaamba ayi bulelo bwanu bulaakubooshekwa mumaansaanu mwaakumana kusumina ayi Lesa wa kwiculu ngoolela panshi.

²⁷ Paceebo ceeco nobaami amukonkele nsheshi mulwiiteeko. Amuleke kucita shibiibi akutalika kucita shiluleme alimwi musanduke kuswa kububi akutalika kuba ankuumbu kubaabo balyatililwa. Lyalo mpashi mulaakutolelela kuya ciswitilila.”

Ciloto mbocakacitika cancinencine

²⁸ Shintu shoonse ishi shakacitika kumwaami Nebukadinesa.

²⁹ Ono ndipakeendabo myeenshi likumi amyeenshi yobilo, mwaami Nebukadinesa kaaendaana peculu lya ŋanda ya bwaami ya cishi ca Babiloni,

³⁰ wakalyaamboosha ayi, “Amubone kukomena ndabala inene ya Babiloni iyo njendakayaka kutondesha nkusu shangu shoonse, bulemu bwangu alimwi abwaami!”

³¹ Kaacilyaamboosha, kwakanyumfwika liswi kalyaamba kuswa kwiculu ayi, “Omwaami Nebukadinesa, kutika nsheentooyanda kwaamba. Bulya wanyaikwa nkusu shako sha bwaami.

³² Ulaakutandaanishikwa kuswa pakati ka bantu akuya mukwikala abanyama bamuluundu. Ulaakunoolya bwiisu anga niŋombe kwamyaaka yosanwe amyaaka yobilo. Kuswawaawo ulaakusumina ayi Mwaami Lesa wa kwiculu Wiindaawo ngomwaami pamalelo a bantu alimwi ayi ngooapa kubantu abo mbwaasuni.”

³³ Mpomunyaawo isho shakaambwa pali Nebukadinesa shakacitika cancinencine peenka apo. Nebukadinesa wakatandaanishikwa kuswa pakati ka bantu bamwi boonse akutalika kunoolyabo bwiisu anga niŋombe. Mume wakalinga kumutontosha kushikila misusu yakwe yakalaampa anga ngamapepe a mumbankwashi, aalo maala akwe anga ngamaala akwe cikupwi.

Nebukadinesa mbwaakalumbaisha Lesa

³⁴ Mwaami Nebukadinesa wakaamba ayi, “Myaaka yosanwe amyaaka yobilo ndiyakeenda, nebo neNebukadinesa, ndakeenamuka. Maano angu akaboolaamo. Lyalo ndakalumba Lesa wa kwiculu Wiindaawo. Ndakalemeka akulumbaisha Lesa uyo muumi kwalyoonse alyoonse. “Bulelo bwakwe, mbulelo bwamuyayaya. Bweene bwakwe bulaakunoolikobo kwalyoonse alyoonse.

³⁵ Kuli nguwe bantu boonse ba mucishi balabonekabo anga taaku mbobabete. Lakwe uleendelesha baanjelo ba kwiculu pantu pomwi abantu ba mucishi ca panshi. Taaku muntu weenga wamukasha kucita cintu, nabi kumwiipusha ayi, ‘Wacitilanshi bobulya?’

³⁶ “Maano angu ndyaakaboolaamo, bulemu bwangu, bwaami alimwi abulemu bwa bulelo bwangu bwakaboolela. Beshikumpandaako maano abacinenenene bangu bakantambula akumboosha pacuuna cangu ca bwaami. Lyalo ndakasumpuka kwiinda mbondakalinga pakataanshi.

³⁷ “Paceebo ceeco nebo neNebukadinesa ndalumbaisha akulemeka Mwaami wa Kwiculu mukwiinga shoonse nshaacita nshibotu alimwi nshila shakwe shoonse shililuleme. Lakwe ulakonsha kubombya baabo balisumpula.”