Danyelo 3 - Baibo Busansulushi Bwa Libuku Ili

Nebukadinesa mbwaakaambila bantu boonse kulambila cibumbwabumbwa ca golodi

¹ Bumwi bushiku Nebukadinesa wakabumbisha cibumbwabumbwa ca golodi cakalinga kucite mamita ali 27 kuya mwiculu alimwi amamita ali 3 mubufwaafwi mubunene. Cibumbwabumbwa ico cakabikwa muliwesa lya Dula mucishi ca Babiloni.

² Lyalo mwaami wakaambila bacinenenene bakwe boonse ayi babungane, nkokwaamba ayi banaabaami, beendeleshi, beshikupandaako maano, beshikusunga maali, boomboloshi, beshinkuta abacinenenene bamwi boonse ba mucishi. Bantu boonse abo bakalinga kweelete kwisa mukusekelela cibumbwabumbwa cakeemika Nebukadinesa.

³ Bacinenenene abo boonse ndibakesa mukusekelela cibumbwabumbwa ico, bakeemikana kunembo lya ncinco.

⁴ Lyalo ushikwaambilisha wakoolobesha aliswi lyapeculu ayi, “Nobantu bamumishobo yoonse, bashikanda shipusenepusene abamumilaka yoonse amukutike!

⁵ Na munyumfwe kulila kwa mapeenga, pesule munyumfwe mitoolilo, tunkobele, tulumbu tunene atuniini alimwi akulila kwa shakulisha shimwi shoonse, mulyeelete kufukama akulambila cibumbwabumbwa ca golodi cakeemika mwaami Nebukadinesa.

⁶ Muntu uli woonse uyo weshi akabule kucita boobo, ciindi ceenka ico ulaakuwaalwa mumunyumbi mutoonyaka mulilo uyoosha.”

⁷ Lyalo ndibakanyumfwa kulila kwa mapeenga ashakulisha shimwi isho, bantu boonse bamumishobo yoonse, bashikanda shipusenepusene amumilaka yoonse bakafukama akulambila cibumbwabumbwa cakeemika mwaami Nebukadinesa.

Babye Danyelo botatwe mbobakapekwa mulandu ceebo cakutanyumfwila

⁸ Kuswawaawo bene Babiloni bamwi bakatalika kupa milandu baJuda.

⁹ Bakaambila mwaami Nebukadinesa ayi, “Nobaami, kamweendela buumi!

¹⁰ Nobaami, mwebo mwabika mulawo wakwaamba ayi na munyumfwe mapeenga, pesule munyumfwe mitoolilo, tunkobele, tulumbu tunene atuniini alimwi akulila kwa shakulisha shimwi shoonse, mulyeelete kufukama akulambila cibumbwabumbwa ico ca golodi

¹¹ alimwi ayi uyo weshi akabule kufukama akulambila, ulaakuwaalwa mumunyumbi utoonyaka mulilo uyoosha.

¹² Ono Shadileki, Mishaki alimwi aAbedinego, baJuda bamwi abo mbomwakalengesha kuba bacinenenene mucishi ca Babiloni, tabakwe kumunyumfwila. Bantu aba batookaka kulambila balesa banu nabi cibumbwabumbwa ca golodi ncemwakeemika.”

¹³ Nebukadinesa wakakalala abuumbi ndyaakanyumfwa makani ayo akubambila ayi balete basankwa abo botatwe kuli nguwe.

¹⁴ Mpeeke wakeepusha basankwa abo ayi, “Shadileki, Mishaki alimwi aAbedinego, sa ncakwiila mutookaka kulambila balesa bangu nabi kulambila cibumbwabumbwa ca golodi ico ncendakeemika?

¹⁵ Ono bulya na mukanyumfwe mapeenga, pesule mukanyumfwe mitoolilo, tunkobele, tulumbu tunene atuniini alimwi akulila kwa shakulisha shimwi shoonse, mukafukame akulambila cibumbwabumbwa. Ono na mukabule kucita boobo, ciindi ceenka ico mulaakuwaalwa mumunyumbi mutoonyaka mulilo uyoosha. Sa mutooyeeya ayi kuli lesa weshi akamupulushe kuswa mumaansaangu?”

¹⁶ Shadileki, Mishaki aAbedinego bakakumbula mwaami ayi, “Nobaami baNebukadinesa, tatweelete kuliimikanina pamakani aya, sobwe.

¹⁷ Na mukatuwaale mumunyumbi mutoonyaka mulilo uyoosha, Lesa uyo ngotulambila ulakonsha kutufuna kuswa mumulilo uyo. Ncakwiila nobaami, ulaakutufuna kuswa mumaansaanu.

¹⁸ Nabi wabula kucita boobo, nobaami mulyeelete kwishiba ayi teshi tukasebenselewo balesa banu nabi kulambila cibumbwabumbwa ca golodi ncemwakeemika.”

Babye Danyelo botatwe mbobakapekwa mulandu wakucaikwa

¹⁹ Mpomunyaawo Nebukadinesa wakakalala abuumbi pali Shadileki, Mishaki aAbedinego. Ncakwiila ciwa cakwe cakasanduka ceebo ca bukali. Lyalo wakalwiita basebenshi bakwe ayi babike mulilo mumunyumbi akulengeshaamo kulungula kwiinda mbomuba lyoonse mankanda ali osanwe aobilo.

²⁰ Mpeeke wakaambila bashilumamba beendaawo nkusu mulikoto lyakwe lya bashilumamba ayi baange Shadileki, Mishaki aAbedinego akubawaala mumunyumbi mutoonyaka mulilo uyoosha.

²¹ Aboobo bakabaanga kabafwete mingaanjo, matangaasa, kubikaawo ashisani shakufwala kumitwi ashakufwala shabo shimwi shoonse akubawaala mumunyumbi uyo.

²² Ono mukwiinga mwaami wakakonkomosha kwaamba ayi munyumbi ulengeshekwe kulungula abuumbi, mulilo uyo wakatenta bashilumamba abo bakatola Shadileki Mishaki aAbedinego.

²³ Mpomunyaawo basankwa botatwe abo kabaangitwe cankusu, bakawita mumunyumbi utoonyaka mulilo uyoosha.

²⁴ Kuswawaawo Nebukadinesa wakanyamuka ceebo cakukankamana akwiipusha bacinenenene bakwe ayi, “Sa teshi basankwa botatwe mbotwaanga akubawaala mumunyumbi umu?” Abalo bakakumbula ayi, “Ncakwiila nobaami mbotwacita ubo.”

²⁵ Lyalo mwaami wakeepusha ayi, “Ino ceebonshi ntoobona basankwa bone batokweendaana mukati mumunyumbi? Tabaangitwe alimwi batooboneka anga tabatoopyaawo. Muntu wane pakati kabo utooboneka anga ngumwaana wa balesa.”

Basankwa botatwe mbobakaangululwa akusumpulwa

²⁶ Kuswawaawo Nebukadinesa wakasena pamulyango wa munyumbi akwiita ayi, “Shadileki, Mishaki, Abedinego, nobasebenshi ba Mwaami Lesa wa kwiculu Wiindaawo, amuswe!” Lyalo bakaswa ciindi ceenka ico.

²⁷ Banaabaami boonse, beendeleshi, beshikupandaako maano abacinenenene bamwi boonse ba mucishi bakabungana kweebela basankwa botatwe abo batakwe kupyaawo kumulilo. Misusu yabo taikwe kubabuka, shakufwala shabo tashikwe kupya alimwi pamibili yabo tepakalingawo bweema bwa bwiishi.

²⁸ Lyalo mwaami wakaamba ayi, “Aalumbaishikwe Lesa wakwe Shadileki, Mishaki awakwe Abedinego! Wakatuma munjelo wakwe kwaamba ayi afune basebenshi bakwe. Bakacinka manungo muli nguwe akusuula mulawo wangu nemwaami. Bakalinga kulibambite kufwa kwiinda kusebensela akulambila lesa umwi, sombibo Lesa wabo.

²⁹ “Ono bulya ndabika mulawo wakwaamba ayi muntu wa mushobo uli woonse, cikanda ca mushobo uli woonse nabi wa mumulaka uli woonse weshi akanyanshe Lesa wakwe Shadileki, Mishaki alimwi awakwe Abedinego, ulaakucaikwa mukutimbulwa shipimpitapimpita. Ayalo ŋanda yakwe ilaakupwayoolwa cakubabo matongo. Ncakwiila taaku lesa nabi womwi weenga wafuna bobulya.”

³⁰ Mpomunyaawo mwaami Nebukadinesa wakasumpula Shadileki, Mishaki aAbedinego mukubapa shuuna sha peculu mucishi ca Babiloni.