Danyelo 2 - Baibo Busansulushi Bwa Libuku Ili

Ciloto cakwe Nebukadinesa

¹ Mumwaaka wabili wa bwaami bwakwe, Nebukadinesa wakalota ciloto ico cakamupensha abuumbi mumoyo cakwaamba ayi taakalinga koona tulo.

² Lyalo wakeeta beshimampelampela, beshikusonda, baloshi alimwi abasongo ba shintu shili mwiculu kwaamba ayi bese bamusansulwite ciloto ico. Ndibakashika, bakeemikana kunembo lya mwaami.

³ Mpeeke mwaami wakabaambila ayi, “Ndapenshekwa abuumbi mumoyo ceebo ca ciloto ncendalota. Ndisuni kwaamba ayi nshibe mbocaamba.”

⁴ Boonse bakakumbula mu mulaka wa ciAlamaiki ayi, “Kamweendela buumi lyoonse nobaami! Amutulwiite mbomwalota, lyalo ndyeshi tumusansulwite mbocaamba.”

⁵ Mpomunyaawo mwaami wakabaambila ayi, “Miyeeyo yangu njakwaamba ayi mwebo mundwiite ciloto ico alimwi ambocaamba. Na mubule kucita boobo ntoomulengesha kutimbulwa tupanshapansha alimwi akulengesha maandaanu kuba matongo.

⁶ Sombi na mundwiite ciloto mbocalinga alimwi ambocaamba, ntoomupa shipo alimwi ashilambu abulemu buunji. Ono amundwiite ciloto mbocalinga alimwi ambocaamba.”

⁷ Mpomunyaawo boonse bakakumbula alimwi ayi, “Nobaami amutulwiitebo ciloto mbocalinga, lyalo tutoomulwiita mbocaamba.”

⁸ Ndibakaamba boobo, mwaami wakaamba ayi, “Bweenka mbondalinga kuyeeya! Ndishi ayi mutoocita boobo kwaamba ayi ciindi kaciya buya mukwiinga mwebo mwabona ayi miyeeyo yangu njakwaamba ayi,

⁹ na mubule kundwiita ciloto cangu mbocalinga ntoomupa mulandu womwi. Mwebo noonse mwasuminishanya kumbeca ayi mpashi shintu shitooba kabotu. Ono bulya amundwiite ciloto mbocalinga, lyalo ntooshiba ayi anu inga mwakonsha kundwiita mbocaamba.”

¹⁰ Kuswawaawo basongo bakaamba ayi, “Taaku muntu pacishi ca panshi weenga wacita caamba mwaami! Taaku mwaami ucite nkusu abulemu buli buyani wakeepushaawo kale cintu ca mushobo uyu kubeshimampelampela, beshikusonda, alimwi abasongo ba shintu shili mwiculu bakwe.

¹¹ Nobaami mwatwiipusha makani ayumu abuumbi. Taaku muntu nabi womwi weenga wakonsha kumulwiita ciloto canu, sombibo balesa. Balesa abo tabakali pakati ka bantu, sobwe.”

¹² Ici cintu cakakalasha mwaami abuumbi. Aboobo wakapa mulawo ayi basongo boonse ba mucishi ca Babiloni bacaikwe.

¹³ Ncakwiila wakapa mulawo ayi boonse abo bacaikwe kubikaawo Danyelo ababye.

Lesa wabonesha Danyelo ciloto mbocaamba

¹⁴ Ono Alyoki mutanjilili wa beshikulindilila mwaami ndyaakaya mukucaya basongo abo, Danyelo wakamwiipusha cabusongo acamaano ayi,

¹⁵ “Ino ceebonshi mwaami wapa mulawo uyumu wa mushobo uyo?” Lyalo Alyoki wakalwiita Danyelo makani oonse mbwaakalinga.

¹⁶ Danyelo ndyaakanyumfwa makani ayo wakaya kuŋanda ya mwaami akumusenga ayi amupe ciindi kwaamba ayi amusansulwite ciloto ico.

¹⁷ Lyalo Danyelo wakaboolela kuŋanda yakwe kuya mukulwiita babye, nkokwaamba ayi Ananiya, Mishaelo alimwi aAsaliya.

¹⁸ Wakabaambila kwaamba ayi basenge nkumbu kuli Lesa wa kwiculu ayi abasansulwite cintu ico cishisitwe. Wakacita boobo kwaamba ayi lakwe ababye batacaikwi pantu pomwi abeshikupandaako maano bamwi ba muBabiloni.

¹⁹ Ono mashiku ayo eenka cintu ico cishisitwe cakayubululwa kuli Danyelo mucili anga nciloto. Lyalo Danyelo wakalumbaisha Lesa wa kwiculu

²⁰ mukwaamba ayi, “Aalumbaishikwe Lesa kwalyoonse alyoonse, Ncakwiila ulicite busongo ankusu shiinji.

²¹ Ulasandula nshiku ashiindi sha mumwaaka. Ulabika bantu pabwaami alimwi akubakushaawo. Ulapa busongo amaano akunyumfwisha shintu.

²² Ulayubulwita shintu shishisitwe. Ulishi shintu shoonse shili mumunshinshe, alimwi lakwe ulekala mumumuni.

²³ NobaLesa ba bamashali bangu bakulukulu, ndamulumba akumulumbaisha. Mwebo mwampa busongo alimwi ankusu. Mwambonesha cintu ico ncetwamusenga. Ncakwiila mwatubonesha ciloto ca mwaami.”

Danyelo mbwaakaambila mwaami ciloto akumusansulwita

²⁴ Kuswawaawo Danyelo wakaya kuli Alyoki uyo wakaambila kumwaami ayi aye acaye basongo ba mwaami. Danyelo wakamwaambila ayi, “Utacayi bantu abo. Ntole kumwaami, nje nkamusansulwite ciloto cakwe.”

²⁵ Mpomunyaawo Alyoki wakatola Danyelo kumwaami akumwaambila ayi, “Nobaami, ndacaana musankwa womwi pakati ka basha bene Juda uyo ukonsha kumusansulwita ciloto canu mbocaamba.”

²⁶ Mwaami wakeepusha Danyelo uyo wakalinga kwiitwa liina lya Beloteshasa ayi, “Sa inga wandwiita ncindakalota ambocaamba?”

²⁷ Danyelo wakakumbula ayi, “Nobaami, taaku muntu musongo nabi musongo wa shintu shili mwiculu, shimampelampela nabi mukamwaami weenga wamupandulwita cishisitwe ico ncemweepusha.

²⁸ Sombi kuli Lesa wa kwiculu uyo uyubulula shishisitwe. Lesa wamutondesha mwebo nobaNebukadinesa isho sheshi shikacitike kunembo. Ono ntoomulwiita ciloto canu alimwi ashili anga nshiloto isho nshemwakabona pabulo bwanu.

²⁹ “Nobaami, ndimwakalinga kulete pabulo bwanu, mwakalota sheshi shikacitike kunembo, alakwe Lesa uyo ubonesha shishisitwe, wakamubonesha shoonse sheshi shikacitike.

³⁰ Ono cishisitwe ico cayubululwa kuli ndime kuteshi ayi nebo ndicite busongo kwiinda bantu bamwi boonse, sombi ayi mwebo, nobaami, mwishibe ciloto canu mbocaamba akunyumfwisha nshemwalinga kuyeeya.

³¹ “Nobaami, ndimwakalangilisha, mwakabona cibumbwabumbwa cinene abuumbi, ico cakalinga kubekabeka abuumbi, ciloondesha kucilangilisha.

³² Mutwi wa ncico wakapangwa agolodi wine wine, ntiti alimwi amaansa shakalinga sha silifa, lifumo alimwi amabelo shakalinga sha bulonse.

³³ Myeendo ya ncico yakalinga ya nshimbi ashalo shimpanta shakalinga sha nshimbi isenkene abulongo bwakutenta.

³⁴ Ndimwakalinga kulangilisha mwakabona libwe ilyo lyakatimbulwa kukalundu, sombi kuteshi amaansa a muntu. Libwe ilyo lyakooma cibumbwabumbwa kushimpanta shakabumbwa anshimbi alimwi abulongo akushipwayoola.

³⁵ Kuswawaawo nshimbi, bulongo, bulonse, silifa alimwi agolodi shakapwayooka akubabo anga mbuungu pamusena wakulupwitaawo ciindi ca cilimo. Muuwo wakapuupa akutola shoonse kutashiyaawo nabi comwi. Sombi libwe ilyo lyakooma cibumbwabumbwa lyakaba kalundu kanene abuumbi akwisusha cishi coonse ca panshi.

³⁶ “Nobaami, ici nceciloto canu, ano bulya ntoocisansulula kuli ndimwe.

³⁷ Mwebo nobaami muli baami ba bamaami. Lesa wa kwiculu wakamupa bulelo, nkusu shoonse alimwi abulemu.

³⁸ Wakamulengesha kuba muleli wa bantu boonse, banyama alimwi abayuni boonse. Anu mutwi wa golodi uleemikanina ndimwe.

³⁹ “Kuswa kubulelo bwanu, bulelo bumwi bulaakubuka. Bulelo ubo teshi bukanokweelene nkusu abwaanu. Kuswa boobo kulaakwisa bulelo bwatatu ubo bwakeemikaninwa abulonse. Bulelo ubo bulaakulela cishi coonse ca panshi.

⁴⁰ Lyalo kulaakwisa bulelo bwane ubo bweshi bukabe buyumu anga ninshimbi. Nshimbi ilapwayoola akutyoloola shintu shoonse. Ono bweenka nshimbi mbweepwayoola shintu shoonse, bulelo ubo bulaakupwayoola akulyatilila malelo amwi oonse ataanshi.

⁴¹ Ono mwakabona akwaamba ayi shimpanta alimwi atukumo shakalinga sha nshimbi isenkene abulongo bwakutenta. Ico cilaamba ayi bulelo ubo bulaakunoopanseene. Nakubi boobo bulaakunooli buyumuuko ceebo ca nshimbi iliimo.

⁴² Bweenka shimpanta mboshakalinga sha nshimbi isenkene abulongo bwakutenta, bulelo ubo bulaakuba buyumu mushipansha shimwi alimwi butacite nkusu mumwi.

⁴³ Bweenka mbomwakabona nshimbi keesenkene abulongo, mbweeke ubo abalo bantu ba mubulelo ubo balaakunoosenkenesenkene alimwi teshi bakacatanewo pantu pomwi bweenka nshimbi mbweenga teecatani kabotu abulongo.

⁴⁴ “Muciindi ca bamaami abo Lesa wa kwiculu ulaakuleta bwaami ubo bweshi bukabule kumana. Teshi bukakomweewo, sombi bulaakunyonyoola malelo amwi ayo oonse akulela kwalyoonse alyoonse.

⁴⁵ Mwakabona libwe mbolyakakomoka kuswa pakalundu lyeenkabo kwakubula amuntu wakalikomona ambolyakapwayoola cibumbwabumbwa cakabumbwa cakapangwa anshimbi, bulonse, bulongo bwakutenta, silifa alimwi agolodi. Nobaami, Lesa wiindaawo bulemu utoomulwiita sheshi shikacitike kunembo. Ndamulwiita bweenka mbomwakalota alimwi akumulwiita mbocaamba cakutashiyaawo nabi comwi.”

Mwaami mbwaakalambula Danyelo

⁴⁶ Lyalo mwaami Nebukadinesa wakafukama cakushisha ciwa panshi kunembo lyakwe Danyelo mukumulemeka. Mpeeke wakaamba ayi milambu ibengwe kuli nguwe akumupa shipo.

⁴⁷ Kuswawaawo mwaami Nebukadinesa wakaambila Danyelo ayi, “Ndushinisho Lesa wako nguLesa wa balesa, nguMwaami wa bamaami alimwi nguLesa uyubulula shishisitwe. Ndaamba boobo ceebo wacikonsha kunjubulwita shishisitwe ishi.”

⁴⁸ Mpomunyaawo wakabika Danyelo pacuuna capeculu mubulelo bwakwe akumupa shipo shiinji. Wakamupa buleli bwa cishi ca Babiloni alimwi akwaamba ayi abe munene wa basongo boonse.

⁴⁹ Lyalo kweelana akusenga kwakwe Danyelo, mwaami wakalengesha Shadileki, Mishaki aAbedinego kuba bacinenenene mucishi ca Babiloni. Sombi Danyelo lakwe wakacaala kaasebensela kuŋanda ya kubwalo.