Danyelo 12 - Baibo Busansulushi Bwa Libuku Ili

Ciindi ca kumeelelesho

¹ Mpeeke munjelo uyo wakalinga kufwete nsalu iteshimite wakaamba ayi, “Paciindi ico Mikaeli munjelo munene uyo ulama bene mishaanu ulaakunyamuka. Kulaakuba ciindi ca mapensho ico citana kubonekawo kale kuswa kumatalikilo amishobo kushikila asunu. Nakubi boobo paciindi ico, bene mishaanu boonse bacite meena alembetwe mulibuku lyakwe Lesa, balaakupulushikwa.

² Bantu baanji baanji abo boona mubulongo bwa cishi ca panshi balaakubuka. Bamwi balaakubukila kuba abuumi butamaani, sombi bamwi balaakubukila kulenshekwa nsoni akuba cintu ceelete kushibulukwa kwalyoonse alyoonse.

³ Basongo balaakunoobala bweenka butuba mwiculu, abo batanjilila bantu baanji mubululami, balaakunoobala anga ninyenyeenshi kwalyoonse alyoonse.”

⁴ Kuswawaawo wakandwiita ayi, “Ono webo Danyelo cala libuku ili akalamatila wakeshibilo kushikila kumeelelesho aciindi. Baanji balaakuya uku akooku kuya mukufusha busongo.”

⁵ Mpeeke ndakalanga akubona bamwi bobilo kabeemfwi kunembo lyangu. Womwi wakalinga kwiimfwi kuloombe lumwi aumwi kaaimfwi kuloombe lumwi lwa mulonga uyo.

⁶ Lyalo womwi pakati ka bantu abo wakeepusha wooyo wakalinga kufwete shakufwala sha nsalu iteshimite uyo wakalinga kwiimfwi peculu lya maanshi a mumulonga ayi, “Citooba ciindi cilaamfu buyani, shintu ishi shiloondesha kashitana kucitika cancinencine?”

⁷ Munjelo uyo wakalinga kufwete shakufwala sha nsalu iteshimite alimwi uyo wakalinga kwiimfwi peculu lya maanshi wakatambika maansa obilo oonse kwiculu. Lyalo ndakamunyumfwa kaashomesha cakulumbila muliina lyakwe Lesa waLyoonse alyoonse ayi, “Ciindi ico cilaakuba ca myaaka yotatwe amusa. Mapensho eshi akese pabantu bakwe Lesa aakumana, shintu shoonse ishi shilaakwiinda.”

⁸ Ndakanyumfwa nshaakaamba, sombi nshikwe kushinyumfwisha. Mpeeke ndakeepusha ayi, “Nkambo, anu shintu shoonse ishi shilaakweela buyani.”

⁹ Alakwe wakakumbula ayi, “Danyelo, nyamuka unooya. Maswi aya ngabushishi alimwi alyeelete kunooli abushishi kushikila kumeelelesho aciindi.

¹⁰ Bantu baanji balaakusalashikwa, kulengeshekwa kubula tumpenda akuboteshekwa cakumaninina, sombi bamucita shibi balaakutolelela kuba bamucita shibi. Taaku mucita shibi nabi womwi weshi akanyumfwe, sombi basongo balo balaakunyumfwa.

¹¹ “Kuswa paciindi ico kubenga milambu ya bushiku abushiku yaakukashikwa kushikila paciindi Cintu cilya Ciloondesha ndyeshi cikeemikwe, palaakwiinda nshiku shili 1,290

¹² Ulicite coolwe muntu uyo ulindilila akushika kumeelelesho a nshiku shili 1,335.

¹³ “Ono webo Danyelo, koshomeka kushikila kumeelelesho aciindi. Lyalo ulaakufwa, sombi ulaakubuka alimwi akutambula cilambu cako kumeelelesho aciindi.”