Danyelo 11 - Baibo Busansulushi Bwa Libuku Ili

¹ “Mumwaaka wakutaanguna wa bwaami bwakwe Dalyasi mwine Mediya, ndakamucafwa akumutabilila.”

Bulelo bwa bene Ijipiti abwa bene Silya

² Mpeeke munjelo uyo wakaamba ayi, “Ono ntookulwiita lushinisho. Bamaami bamwi botatwe balaakuboneka mucishi ca Pesha. Pesule mwaami wane ulaakubakonkela. Lakwe ulaakuba mubile kwiinda mbabo boonse. Aakuba abulemu kwiinda mububoni bwakwe, ulaakuyungoola bantu boonse ayi balwane bulelo bwa bene Gilisi.

³ “Lyalo mwaami shinkusu shiinji ulaakuboneka. Lakwe ulaakulela bulelo bunene abuumbi akucita cili coonse nceenga kaasuni.

⁴ Pesule lyakuba ankusu shiinji, bulelo bwakwe bulaakubaanikamo shipansha shone. Lyalo bamaami abo bateshi bamulunyungu lwakwe balaakunoolela mumusena wakwe. Sombi teshi bakabe ankusu sheelene ankusu shakwe. Ncakwiila bulelo bwakwe bulaakunyaikwa kuli nguwe akupekwa kubamwi.

⁵ “Mwaami wa bene Ijipiti ulaakuba ankusu shiinji. Sombi umwi pabamatanjilili ba bashilumamba bakwe ulaakwiindaawo kuba nkusu pali nguwe. Lakwe ulaakulela bulelo bunene abuumbi.

⁶ Paakwiinda myaaka iinji, mwaami wa bene Ijipiti ulaakusuminishanya amwaami wa bene Silya ayi banoomucafwa munkondo. Mwaami wa bene Ijipiti ulaakweebesha mwanaakwe kumwaami wa bene Silya. Sombi kusuminishanya uko teshi kukayewo kulaale. Lyalo mwanakashi uyo, ibaye, mwanaakwe alimwi abasebenshi abo bakayaakwe, boonse balaakumana kucaikwa.

⁷ Ono shikamukowa womwi wa mwanakashi uyo ulaakuba mwaami. Mwaami uyo ulaakulwana likoto lya bashilumamba lya mwaami wa bene Silya. Ulaakwinjila muciyubilo cabo akubakoma.

⁸ Ulaakubwesa shikoshanyo sha balesa babo ashintu sha golodi asilifa shakabengwa kubalesa abo akushitola kucishi ca Ijipiti. Paakwiinda myaaka iinji ya luumuno,

⁹ mwaami wa bene Silya ulaakulwana cishi ca Ijipiti, sombi ulaakukakatishikwa kuboolela kucishi cine mishaabo.

¹⁰ “Baana basankwa ba mwaami wa bene Silya balaakulibambila kuya kunkondo akubunganya likoto lya bashilumamba linene. Likoto lya bashilumamba ilyo lilaakunyonyoola cakupyanga anga ngamaanshi asefuka atakoonshi kushinkilwa. Lilaakushika akuciyubilo ca bulelo bwa bene Ijipiti.

¹¹ Mwaami wa bene Ijipiti ulaakuya mubukali bwakwe akulwana mwaami wa bene Silya akucata busha likoto linene lya bashilumamba bakwe.

¹² Mwaami wa bene Ijipiti ulaakulisumpula abuumbi ceebo cakukoma kwakwe alimwi aceebo ca bashilumamba baanji abo mbweshi akacaaye. Sombi teshi akatolelele kukoma.

¹³ “Mwaami wa bene Silya ulaakuboolela kumishaabo akubunganya likoto lya bashilumamba linene liinda litaanshi. Paakwiinda myaaka iinji, ulaakuya mukulwana alikoto linene lya bashilumamba licite shilwanisho shoonse sheelete.

¹⁴ Kuswawaawo bantu baanji balaakwaashukila mwaami wa bene Ijipiti. Bene mishaanu Danyelo beshilunkutwe balaakwaashukila mwaami uyo mukucitika cancinencine kwa cili anga nciloto ico, sombi balaakukomwa.

¹⁵ Lyalo mwaami wa bene Silya ulaakuyaka citunta cakutantaawo pakulwana kushinguluka ndabala icite lilinga akwiikoma. Bashilumamba bene Ijipiti teshi bakatolelele kulwana. Bashilumamba beendaawo kucishiba kulwana pakati kabo balaakubula nkusu shakwiimikana.

¹⁶ Mwaami wa bene Silya uyo weshi akabalwaane ulaakucita cili coonse ncaasuni. Taaku muntu nabi womwi weshi akakonshe kumulwana. Ulaakwikala muCishi Cakashomeshekwa alimwi cishi ico coonse kacili mumaansaakwe.

¹⁷ “Mwaami wa bene Silya ulaakulibambila kuya mukulwana alikoto lyakwe lya bashilumamba lyoonse. Ono ulaakusuminishanya amwaami wa bene Ijipiti ayi banoocafwana munkondo. Ulaakweebesha mwanaakwe kumwaami wa bene Ijipiti ayi akome bulelo bwakwe. Nakubi boobo muyeeyo wakwe teshi ukaswitilile.

¹⁸ Pesule ulaakulwana mishobo ili muloombe lwa lweenge akukoma iinji pakati ka njiyo. Sombi mutanjilili wa bashilumamba muswamashi ulaakumukoma akumanisha kulisumpula kwakwe. Munshila iyo musebaanyo uyo ulaakuboola pamubili wakwe mwiine.

¹⁹ Kuswawaawo ulaakuboolela kushiyubilo sha cishi cine mishaabo, sombi ulaakukomwa alimwi ayo alaakuba ngomeelelesho akwe.

²⁰ “Mumusena wakwe kulaakuba mwaami weshi akatume shikusonkesha mucishi ico kwaamba ayi afushe bubile mucishi cakwe. Nakubi boobo mwaami uyo ulaakucaikwa kwaakwiindabo ciindi ciniini. Teshi akacaikwe ceebo ca bukali bwa muntu nabi munkondo.”

Bulelo bwa bubi bwa bene Silya

²¹ Munjelo uyo wakatolelela kusansulula ayi, “Bwaami bwakwe bulaakupyanikwa amuntu uteelete kuba mwaami. Muntu uyo ulaakulwana bulelo ubo bantu boonse ba mumo kabaliibite alimwi ulaakuba mwaami kwiinda mububeshi.

²² Ulaakucaya likoto lya bashilumamba linene abuumbi pantu pomwi amupailishi munene wakwe Lesa.

²³ Cipangano caakumana kupangwa anguwe, teshi akashomeke kucipangano ico. Lyalo ulaakuba ankusu shakulela kaacitebo bantu baniini.

²⁴ Kuswawaawo ulaakulwana shishi shicite bubile buunji kashiliibite alimwi ulaakukonsha kucita shintu isho baishi nabi bamashali bakwe bakulukulu nshebatakwe kucitaawo. Lyalo ulaakubaanya buboni ubo mbweshi akasaale munkondo kubantu bakwe. Pesule ulaakupanga muyeeyo wakukonsha kulwana mandabala acite malinga, sombi cilaakucitikabo kwaciindi ciniini.

²⁵ “Pesule ulaakubunganya likoto linene lya bashilumamba ayi alwane mwaami wa bene Ijipiti. Alakwe mwaami wa bene Ijipiti ulaakulibambila kumulwana alikoto lya bashilumamba baanji, sombi ulaakumwaalilwa ceebo ulaakwiindwa kumaano.

²⁶ Beshikumupandaako maano abo balya shakulya shibotu sha mwaami, balaakumuwisha. Likoto lyakwe lya bashilumamba lilaakumana kunyonyoolwa. Ncakwiila bashilumamba bakwe baanji balaakumana kucaikwa.

²⁷ Lyalo bamaami bobilo abo bakwikala akulya pantu pomwi kabacite miyeeyo ibiibi akubecana. Sombi taaku ceshi cikaswitilile ceebo meelelesho alaakucitika paciindi cibambitwe ico ceshi cikanoocili kunembo.

²⁸ Mwaami wa bene Silya ulaakuboolela kumishaabo abuboni buunji ubo mbweshi akasaale, sombi kaacisuni kunyonyoola kupaila kwa bantu bakwe Lesa. Ulaakucita mbuli mbwaasuni akuboolela kumishaabo.

²⁹ “Mukuya kwanshiku, mwaami uyo ulaakuya mukulwana cishi ca Ijipiti alimwi, sombi ciindi ico shintu shilaakumweendela bumbi.

³⁰ Kuswa kulubasu lwa kumbo bene Loma balaakwisa mumaato mukulwana, aboobo ulaakuloonda. “Lyalo ulaakuboolaamo kaakalalite abuumbi akuya mukweelesha kunyonyoola kupaila kwa bantu bakwe Lesa bashomeka. Sombi ulaakunyumfwila nkumbu abo bakasuula kupaila uko.

³¹ Bashilumamba bakwe bamwi beshi bakanoocite shilwanisho balaakuya mukulengesha Ŋanda yakwe Lesa kutanoosalalite. Balaakukasha akubenga milambu ya bushiku abushiku. Mpeeke balaakwiimika Cintu cilya Ciloondesha.

³² Kwiinda mukucenjeeka kwa kwaamba maswi abotu, ulaakuyungoola bantu abo bakasuula kale kupaila kwabo, sombi abo bashoma Lesa wabo balaakumukakila cankusu.

³³ “Bamatanjilili basongo balaakulwiitako baanji pakati ka bantu abo. Sombi kwaciindi ciniini bamatanjilili abo bamwi balaakucaikwa munkondo, bamwi kutentwa, bamwi kupambwa buboni akuwaalwa muntolongo.

³⁴ Bantu abo balaakucafwikwa paniini muciindi cabo ca mapensho, sombi baanji beshi bakabe kulubasu lwabo teshi bakanooshomeka.

³⁵ Bamwi pakati ka basongo balaakupenga, kwaamba ayi baboteshekwe cakumaninina akulengeshekwa kubula kampenda kushikila kumeelelesho, ee, kuciindi ico cakabamba mwaami Lesa.

³⁶ “Mwaami wa bene Silya ulaakucita cili coonse ncaasuni. Ulaakulisumpula akulipa bulemu kwiinda pabalesa boonse alimwi ulaakucobola aLesa Wiindaawo pabalesa boonse. Ulaakucita boobo kushikila ciindi ca bukali bakwe Lesa cikeende mukwiinga Lesa ulaakucita ceenka ico ncaakayeeya.

³⁷ Mwaami uyo ulaakusuula balesa ba bamashali bakwe bakulukulu akusuula lesa uyo banakashi ngobasunishi. Ulaakucita boobo ceebo ulaakulipa bulemu kwiinda balesa boonse.

³⁸ Sombi ulaakunoolambila lesa washiyubilo. Ulaakunoobenga golodi, silifa, mabwe a makwebo alimwi ashipo shuulwa maali aanji kuli lesa uyo bamashali bakwe bakulukulu mbobatakwe kulambilaawo.

³⁹ Ulaakukoma shiyubilo shiyumu abuumbi kwiinda mukucafwikwa alesa mweensu uyo. Ulaakupa bulemu buunji kubaabo beshi bakanoosuminisha bwaami bwakwe. Ncakwiila ulaakunoobapa shuuna sha peculu akubapako shipansha sha cishi ayi ncilambu.

⁴⁰ “Ono meelelesho a mwaami wa bene Silya aakuba pafwaafwi, mwaami wa bene Ijipiti ulaakumulwana, sombi alakwe ulaakulwana mwaami uyo ankusu shakwe shoonse mukusebensesha shikoci sha nkondo, maaki amaato anene aanji. Ulaakulwana shishi shiinji akunyonyoola cakupyanga anga ngamaanshi asefuka kuswa mumulonga.

⁴¹ Ulaakulwana acishi cakashomeshekwa akucaya shuulu ashuulu sha bantu, sombi bene Edomu, bene Moabu abamatanjilili bakacaala muAmoni balaakufunwa kuswa mumaansaakwe.

⁴² Mwaami wa bene Silya ulaakulwana shishi shiinji kubikaawo aca Ijipiti.

⁴³ Ulaakubwesa buboni bushisitwe bwa cishi ca Ijipiti, nkokwaamba ayi golodi, silifa ashintu sha ncico shimwi sha makwebo. Ulaakulwana akukoma cishi ca Libya aca Sudani.

⁴⁴ Ono nkombe sheshi shikaswe kulubasu lwa kwicwe akumatwa shilaakumuloondesha. Lyalo ulaakunyamuka kaakalalite abuumbi ayi akalwaane cabukali buyoosha akucaya bantu baanji.

⁴⁵ Ulaakuyaka amatente akwe a bwaami pakalundu apo pali Ŋanda yakwe Lesa. Sombi ulaakufwa kwakubula nabi womwi uko umucafwa.”