Danyelo 10 - Baibo Busansulushi Bwa Libuku Ili

Cili anga nciloto cakwe Danyelo kuMulonga wa Tigilisi

¹ Mumwaaka watatu wa bwaami bwakwe Sailasi mwaami wa bene Pesha, Danyelo uyo wakalinga kwiitwa ayi Beloteshasa wakayubulwitwa makani kuswa kuli Lesa. Makani ayo akalinga alushinisho alimwi akalinga kwaamba pankondo iyoosha. Makani ayo akesa kuli nguwe mucili anga nciloto.

² Paciindi ico nebo neDanyelo ndakoongumana kwansondo shotatwe.

³ Nshikwe kulyawo shakulya shibotu nabi kulyawo nyama nabi kunwawo waini nabi kunanawo mafuta kushikila nsondo shotatwe ndishakeenda.

⁴ Ono pabushiku bwa makumi obilo anshiiku shone bwa mweenshi wakutaanguna wa mwaaka, ndakalinga kwiimfwi kuloombe lwa Mulonga unene wa Tigilisi.

⁵ Ndakeenamuka akubona muntu wakalinga kufwete shakufwala sha nsalu iteshimite alimwi alamba wa golodi wiine wiine kaaimfwi kunembo lyangu.

⁶ Mubili wakalinga kuboneka anga ngamabwe amakwebo eetwa ayi kilisolaiti. Ciwa cakwe cakalinga kubeka anga ngamabeebe a mfula. Meenso akwe akalinga kunyaka anga ngumulilo. Maansaakwe amyeendo yakwe shakalinga kuboneka anga ngubulonse wafulwa. Liswi lyakwe lyakalinga kunyumfwika anga nciyobeyobe ca likoto linene lya bantu.

⁷ Nebo neDanyelo ndimebo neenka ndakabona cili anga nciloto ico. Bantu mbondakalingaabo taaku ncebakabonaawo, nakubi boobo bakaloonda abuumbi cakwaamba ayi bakacica kuya mukuyuba.

⁸ Aboobo ndakacaala neenka kaanjebela cili anga nciloto ico cikankamika. Nkusu shangu shoonse shakamana alimwi ciwa cangu cakasanduka abuumbi kuboowa cakwaamba ayi taaku muntu weenga wakonsha kwinshiba.

⁹ Ndindakanyumfwa liswi lyakwe, ndakawa panshi cakufubama akuwisuka apo.

¹⁰ Lyalo lyaansa lyakancata akunengeshe kwiimikana bukalaba mwaana. Ndakalinga kucitutuma.

¹¹ Munjelo wakaŋambila ayi, “Danyelo, webo ulalemekwa abuumbi pameenso akwe Lesa. Nyamuka akukutikisha nsheshi nkwaambile. Nebo ndatuumwa kuli ndiwe.” Ndyaakamana kwaamba boobo, ndakanyamuka kaancitutuma.

¹² Lyalo wakaŋambila ayi, “Danyelo utaloondi. Lesa wakanyumfwa mupailo wako kuswabo bushiku butaanshi ubo mbowakayeeya kulibombya kunembo lya Lesa wako kwaamba ayi ube amaano akunyumfwishisha shintu. Anu nebo ncendatuminwa kuli ndiwe ceebo ca mipailo yako yakumbulwa.

¹³ Munjelo munene wa bulelo bwa bene Pesha wakandwana kwanshiku makumi obilo abushiku bomwi. Lyalo Mikaeli, munene womwi wa baanjelo, wakesa mukuncafwa mukwiinga muPesha ndakalinga ndacaalamobo neenka.

¹⁴ Ono ndesa mukukulengesha kunyumfwisha ceshi cikacitike kubene mishaanu kunembo. Ici ncili anga nciloto caamba pashintu sheshi shikacitike kunembo.”

¹⁵ Ndyaakaŋambila boobo, ndakakotamika mutwi akulanga panshi kwakubula anceeŋambaawo.

¹⁶ Lyalo munjelo uyo wakalinga kuboneka anga ngumuntu, wakatambika lyaansa lyakwe akunkumya kumilomo, lyalo ndakatalika kwaamba. Mpomunyaawo ndakamwaambila, “Nkambo, cili anga nciloto ici canengesha kubula nkusu abuumbi, aboobo nshikoonshi kucileka kututuma.

¹⁷ Nebo ndibo anga ngumusha wiimfwi kunembo lya mwaami wakwe. Ono nkambo, inga ndakonsha buyani kwaambaanu? Nshicite nkusu alimwi akuyoya citooyuma.”

¹⁸ Mpeeke munjelo uyo wakancata alimwi, lyalo nkusu shangu shakaboolaamo.

¹⁹ Kuswawaawo wakaŋambila ayi, “Cileke kuloonda. Webo ulalemekwa abuumbi pameenso akwe Lesa. Aboobo utalisukami nabi kuloonda cintu cili coonse.” Ndyaakaamba boobo ndakeendaawo kuyuma akwaamba ayi, “Nkambo amundwiitebo nshemweelete kwaamba ceebo mwanengesha kuba ankusu.”

^20-21 Aboobo wakaamba ayi, “Sa ulishi ncendesita kuli ndiwe? Ndesa mukukuyubulwita shilembetwe muLibuku lya Lushinisho. Ono bulya ntooboolela kuya mukulwana munjelo munene shikulama bene Pesha. Kuswawaawo munjelo munene shikulama bene Gilisi ulaakuboneka. Taaku weelete kuncafwa, sombibo Mikaeli munjelo munene shikulama bene Isilaeli.