Danyelo 1 - Baibo Busansulushi Bwa Libuku Ili

MAKANI AKWE DANYELO ABABYE ( 1:1—6:28 ) Bacikula bwangu mbobakatolwa kuli Nebukadinesa

¹ Mumwaaka watatu wa bwaami bwakwe Jeoiyakimu mwaami wa bene Juda, Nebukadinesa mwaami wa bene Babiloni wakaya mukulwana ndabala ya Jelusalemu akwiishinguluka.

² Mwaami Lesa wakaaba Jeoiyakimu mwaami wa bene Juda mumaansaakwe Nebukadinesa pantu pomwi ashintu shimwi shamakwebo sha muŊanda yakwe Lesa. Shintu ishi wakashitola kuŋanda yakwe lesa wakwe kuBabiloni akushibika muŋanda yakusungilaamo buboni.

³ Kuswawaawo mwaami Nebukadinesa wakalwiita Ashipenasi uyo wakalinga wacinenenene munene mubwaami bwakwe ayi asale bacikula bwangu basankwa kuswa kubene Isilaeli abo bakesa busha. Basankwa abo balyeelete kuba bana ba baami alimwi abana ba bacinenenene.

⁴ Bacikula bwangu abo balyeelete kuba bantu batacite kampenda nabi komwi mumibili yabo, baboneka kabotu, bacenjete, bacite lushibo, beeite alimwi bacite nkusu shakusebensa muŋanda ya mwaami. Ashipenasi wakapekwa mulimo wakubeeisha kulemba akubelenga mulaka wine Babiloni.

⁵ Mwaami wakapa mulawo ayi bushiku abushiku balyeelete kupekwa shakulya sheelene asheesho shipekwa kuli nguwe alimwi awaini bweenka mbuli wakubwalo. Baakumana kwiiya myaaka yotatwe, balyeelete kutalika kusebensa muŋanda ya mwaami.

⁶ Pakati ka babo bakasalwa pakalinga basankwa bene Juda, nkokwaamba ayi Danyelo, Ananiya, Mishaelo alimwi aAsaliya.

⁷ Wacinenenene munene uyo wakabapa meena amwi. Danyelo wakatumbwa ayi Beloteshasa, Ananiya wakatumbwa ayi Shadileki, Mishaelo wakatumbwa ayi Mishaki aAsaliya wakatumbwa ayi Abedinego.

⁸ Sombi Danyelo wakayeeya ayi taakoonshi kulilengesha kutasala kweelana aMilawo mukulya shakulya shakubwalo akunwa waini wa mwaami. Aboobo wakasenga Ashipenasi ayi na inga wamusuminisha kutanoolyako shakulya isho.

⁹ Lyalo Lesa wakalengesha Ashipenasi kunyumfwila Danyelo nkumbu alimwi aluse.

¹⁰ Sombi Ashipenasi wakaambila Danyelo ayi, “Nebo ntooloonda mwaami wangu uyo wakapa mulawo pashakulya shako ashakunwa. Ceebo na nkabone ayi webo wanyanga kwiinda bashanyoko bacikula bwangu bamwi boonse ulaakunsutulaako mutwi.”

¹¹ Lyalo Danyelo wakaya kuli shikulindilila uyo Ashipenasi ngwaakabika kunoomulindilila pantu pomwi aAnaniya, Mishaelo alimwi aAsaliya.

¹² Wakamwaambila ayi, “Twamusenga sobasebenshi banu ayi mweeleshe kunootupabo bucisa alimwi amaanshi akunwa kwanshiku likumi.

¹³ Kuswawaawo amukatweelanye mibili abacikula bwangu abo balya shakulya shakubwalo akucitila swebo sobasebenshi banu kweelana ambweshi mukabone.”

¹⁴ Aboobo wakasumina kucita kweelana ambobakasenga.

¹⁵ Ciindi ndicakakwana, basankwa abo bone bakaboneka kwiina abuumbi alimwi akuba ankusu kwiinda babo bakalinga kulya shakulya shakubwalo.

¹⁶ Lyalo shikulindilila uyo wakacileka kubapa shakulya shibotu shakubwalo akutalika kunoobapabo bucisa alimwi amaanshi.

¹⁷ Lesa wakabapa lushibo amaano akunyumfwisha shintu sha malembo oonse akwiiya. Kuswawaawo wakapa Danyelo maano akusansulula shili anga nshiloto alimwi ashilotobo.

¹⁸ Myaaka yotatwe iyo yakaamba mwaami ndiyakakwana, Ashipenasi wakatola bacikula bwangu basankwa abo boonse kuli Nebukadinesa.

¹⁹ Lyalo mwaami wakabandikaabo boonse akucana ayi taaku wakeelana aDanyelo, Ananiya, Mishaelo alimwi aAsaliya. Aboobo bakatalika kusebensela mwaami.

²⁰ Mumakani oonse a busongo amaano akunyumfwisha shintu ayo mwaami ngaakabeepusha, wakacana kwaamba ayi balo bakalinga kucite busongo ciine kwiinda beshimampelampela abeshikusonda bali mubwaami bwakwe boonse.

²¹ Lyalo Danyelo wakasebensa muŋanda ya mwaami kushikila Sailasi mwaami wa bene Pesha wakakoma cishi ca Babiloni.