Ciyubululo 21 - Baibo Busansulushi Bwa Libuku Ili

Liculu lipya alimwi acishi cipya

¹ Kuswawaawo ndakabona liculu lipya alimwi acishi ca panshi cipya mukwiinga liculu litaanshi alimwi acishi citaanshi shakamana, alwalo lweenge lwakashimingana.

² Ndakabona andabala inene isalalite ya Jelusalemu keeswa kwiculu kuli Lesa. Yakalinga kubambitwe, anga ngumwanakashi utokweebwa uyo walibambila kuya kuli ibaye.

³ Mpeeke ndakanyumfwa liswi lyakoolobeshekwa kuswa kucuuna ca bwaami ayi, “Ono musena wakwe Lesa waba pakati ka bantu! Ulaakunookalaabo, abalo balaakuba bantu bakwe. Lesa mwiine ulaakunooli ambabo alimwi ulaakuba Lesa wabo.

⁴ Ulaakubakunkumuna minsonshi yoonse. Lufu teshi lukabeeko alimwi. Teshi kukabe buumba, kulila nabi kunyumfwa kucisa, mukwiinga shintu shikulukulu shoonse shashimingana.”

⁵ Mpomunyaawo ukala pacuuna ca bwaami wakaamba ayi, “Ono bulya shintu shoonse ntooshipanga cipya!” Wakandwiita alimwi ayi, “Ulembe shintu ishi mukwiinga maswi aya alyeelete kushomwa alimwi ngalushinisho.”

⁶ Wakatolelela kuŋambila ayi, “Ono camana! Nebo ndime Matalikilo alimwi aMamanino, mutaanshi alimwi awakweelaako. Uyo woonse unyumfwite nyotwa, ndaakumusuminisha kunwa mukantupu ka maanshi apa buumi kwakubula kulipila.

⁷ Uyo woonse eshi akakome, ulaakutambula cipo ici kuswa kuli ndime. Ndaakuba Lesa wakwe, alakwe ulaakuba mwanaangu.

⁸ Sombi boowa, batashomi, basuni kucita shibiibi, bacayi, bafuule, baloshi, balambila shibumbwabumbwa alimwi ababeshi boonse, musena wabo ndweenge lwa mulilo alimwi asalufa. Ulu ndolufu lwabili.”

Jelusalemu ipya

⁹ Umwi munjelo pabaabo bali bosanwe abobilo bakalinga kucite mbale shifongomene shili shosanwe ashobilo, isho shakalinga kuswite myaalu yamamanino ili yosanwe ayobilo, wakesa mukundwiita ayi, “Kosa nkuboneshe mwanakashi uyo weshi akeebwe kuMwanaambelele.”

¹⁰ Mpomunyaawo Mushimu Usalashi wakantanjilila, alakwe munjelo uyo wakantola peculu pakalundu kanene kalaamfu. Lyalo wakambonesha ndabala inene isalalite ya Jelusalemu keeswa kwiculu kuli Lesa.

¹¹ Yakalinga kubeka ceebo ca bulemu bwakwe Lesa. Ndabala inene iyi yakalinga kubekabo anga ndibwe lyamakwebo libeka abuumbi, ee, anga ndibwe lya maanshi.

¹² Yakalinga kushingulukitwe alubumbu lunene alimwi lulaamfu. Lubumbu ulu lwakalinga kucite milyango ili likumi ayobilo umo mwakalinga baanjelo likumi abobilo bakalinga kulindililaamo. Pamilyango iyi, pakalinga kulembetwe meena a mikowa ya bene Isilaeli ili likumi ayobilo.

¹³ Mumbasu shoonse shili shone mwakalinga milyango yotatwe yotatwe. Kwicwe kwakalinga yotatwe, kumalenge yotatwe, kumatwa yotatwe alimwi akwalo kumbo yotatwe.

¹⁴ Lubumbu lwa ndabala iyi lwakalinga kuyakitwe palwiimbi lwa mabwe ali likumi aobilo apo pakalinga kulembetwe meena a batumwi ba Mwanaambelele bali likumi abobilo.

¹⁵ Munjelo uyo wakalinga kwaamba anebo, wakalinga kucite kasako kacipimo ka golodi, kakupimishaako ndabala inene ilya, milyango ya njiyo alimwi alubumbu.

¹⁶ Ndabala inene iyi, yakalinga kweelene moonsebo, nkokwaamba ayi mubulaamfu amubufwaafwi yakalinga kweelene. Munjelo uyo wakapimisha kasako kakwe kalya kakupimisha akucana ayi ndabala inene ilya yakalinga kucite makilomita ali 2,400 mubulaamfu, mubufwaafwi alimwi akulaampa kuya mwiculu, moonse yakalinga kweelene.

¹⁷ Lyalo munjelo uyo wakapima lubumbu akucana ayi lwakalinga kulaampa mamita ali 60 kweelana acipimo cakasuminishikwa.

¹⁸ Lubumbu ulu lwakalinga lwa mabwe amakwebo abeka abuumbi, alimwi ayalo ndabala inene yakalinga ya golodi wiine wiine, kaibeka anga ndigilasi.

¹⁹ Mabwe a lwiimbi lwa lubumbu lwa ndabala inene iyo akaboteshekwa amabwe amakwebo apusenepusene. Libwe lyakutaanguna mulwiimbi ulu lyakalinga lya libwe lyamakwebo libeka abuumbi, lyabili lyakalinga kuboneka anga ndiculu, lyatatu lyakalinga lyamabalamabala, lyane ndyaemalodi,

²⁰ Lyasanu lyakalinga lifubela, lyasanu alyomwi lyakalinga lisalala pyu, lyasanu aobilo lyakalinga kukoshenye agolodi, lyasanu aotatwe lyakalinga kuboneka anga ndituntuulwa libishi, lyasanu aone lyakalinga lyacibobo, lyalikumi lyakalinga litubatuba, lyalikumi alyomwi lyakalinga kukoshenye aliculu, lyalikumi aobilo lyakalinga lifubelafubela.

²¹ Mpeeke milyango yakalinga ya mabwe amakwebo ali likumi aobilo, mulyango womwi awomwi wakalinga wa libwe lyamakwebo lyomwi. Nshila ya mundabala inene iyo yakalinga ya golodi iine iine ibeka anga ndigilasi.

²² Mundabala inene iyo, nshikwe kubona Ŋanda yakwe Lesa, mukwiinga ŋanda ya njiyo nguMwaami Lesa Shinkusu shoonse mwiine alimwi aMwanaambelele.

²³ Mundabala inene momunya umo tamuyandiki lisuba nabi mweenshi kwaamba ayi shimunikileemo ceebo bulemu bwakwe Lesa mbobumunikaamo alimwi Mwanaambelele njelampi ya mumo.

²⁴ Lyalo bantu ba mishobo yoonse balaakweenda mumumuni wa njiyo, abalo bamaami ba mucishi ca panshi balaakuleta bubile bwabo mundabala inene iyo.

²⁵ Milyango ya njiyo ilaakunoocalukitebo bushiku boonse, teshi ikanoocalwaawo mukwiinga teshi kukanooshiyaawo uko.

²⁶ Bulemu abubile bwa bantu ba mishobo yoonse bulaakuletwa mundabala inene iyo.

²⁷ Sombi mundabala inene iyo teshi mukenjile cintu citasalalite nabi comwi, nabi bantu boonse bacita shintu shilensha nsoni nabi babeshi. Mulaakwinjilabo baabo bacite meena alembetwe mulibuku lya buumi lya Mwanaambelele.