Ciyubululo 2 - Baibo Busansulushi Bwa Libuku Ili

Nkalata yakalembelwa coonde ca kuEfeso

¹ “Mutanjilili wa kucoonde ca kuEfeso, umulembele ayi, “Aya ngamakani aamba wooyo ucite nyenyeenshi shili shosanwe ashobilo mulyaansa lyalulyo alimwi weenda pakati ka shakubikaawo malampi sha Golodi shili shosanwe ashobilo.

² Utokwaamba ayi, ‘Milimo yako ndiishi ambuli mboosebensa cankusu alimwi akutaboola pesule ceebo ca mapensho. Ndishi alimwi kwaamba ayi inga toolangibo bamucita shibi. Abo balibanda ayi mbatumwi, wakabeelesha akucana ayi mbabeshi.

³ Watolelela kupenshekwa ceebo ca ndime alimwi tookwe kutyongola, sobwe.

⁴ Sombi ndicite litongooshi pali ndiwe ceebo toonsuni bweenka mbowakalinga kunsuni kataanshi.

⁵ Ono ibaluka mbuli mbowakalinga kootana kuwa! Ulyeelete kusanduka kuswa kushibiibi shako akutalika kwikala buumi mbowakalinga kucite pakutaanguna. Ono na ubule kusanduka kuswa kushibiibi shako, ndaakwisa kuli ndiwe mukukusha cakubikawo lilampi cako pamusena wa ncico.

⁶ Sombi bubotu bwako mbwakwaamba ayi ulipatite micito ya bene Nikolayi, bweenka mboonjipatite anebo.’

⁷ “Uyo ucite matwi, aanyumfwe sheesho Mushimu Usalashi nshootokwaambila shoonde! “Uyo eshi akakome bubi, ndaakumusuminisha kulya shisepo sha kucisamu cipa buumi cili kuMusena ukondelesha wakwe Lesa.

Nkalata yakalembelwa coonde ca kuSimeena

⁸ “Mutanjilili wa kucoonde ca kuSimeena, umulembele ayi, “Aya ngamakani aamba wooyo uli ngoMatalikilo alimwi aMamanino uyo wakafwa akuba abuumi.

⁹ Utokwaamba ayi, ‘Mapensho ako ndyeeshi alimwi ndishi kwaamba ayi uli mukandu, nakubi boobo uli mubile. Ndishi shoonse shibiibi nshebakubekesha bantu abo balibanda ayi mbaJuda kabateshi mbabo, sombi mbamulikoto lyakwe Satana.

¹⁰ Utaloondi mapensho eshi akakucitikile. Nyumfwa! Mubiibi ulaakumusunka kwiinda mukulengesha bamwi ba mulikoto lyako ayi bawaalwe muntolongo alimwi ulaakupenshekwa abuumbi kwanshiku shili likumi. Koshomeka kuli ndime, nabi bakakucaileewo, lyalo ndaakukupa mushini wa buumi butamaani.’

¹¹ “Uyo ucite matwi, aanyumfwe sheesho Mushimu Usalashi nshootokwaambila shoonde! “Uyo eshi akakome bubi, lufu lwabili teshi lukamukumyeewo.

Nkalata yakalembelwa coonde ca kuPegamamu

¹² “Mutanjilili wa kucoonde ca kuPegamamu umulembele ayi, “Aya ngamakani aamba wooyo ucite mupeeni ukolete koonse koonse.

¹³ Utokwaamba ayi, ‘Ndishi nkookala. Ulekala kumusena Satana nkwaaendelesha. Ulashomeka kuli ndime alimwi tookwe kusowa lushomo lwako muli ndime nabi paciindi Antipasi, kamboni wangu ushomeka, ndyaakacaikwa. Wakacaikwa kumusena nkomunya kwikala Satana.

¹⁴ “ ‘Sombi ndicite matongooshi amwi pali ndiwe ceebo mulikoto lyanu muli bamwi bakonkela kwiisha kwakwe Balamu. Lakwe wakeeisha Balaki bwakulengesha bene Isilaeli kubisha kwiinda mukubanyengelela ayi balye shakulya shakabengwa kushibumbwabumbwa alimwi akucita bufuule.

¹⁵ Mbweekoobo awebo ulicite bantu bakonkela kwiisha kwa bene Nikolayi.

¹⁶ Ono sanduka kuswa kushibiibi shako. Na ubule kusanduka, ndaakwisabo onoono kuli ndiwe mukulwana abantu abo amupeeni uswa mumulomo wangu.’

¹⁷ “Uyo ucite matwi, aanyumfwe sheesho Mushimu Usalashi nshootokwaambila shoonde! “Uyo eshi akakome bubi, ndaakumupa mana ashisitwe. Ndaakumupa alibwe lituba apo mpweshi pakanoolembetwe liina lipya ilyo muntu woonse ndyaateshi, sombibo wooyo weshi akalitambule.

Nkalata yakalembelwa coonde ca kuTiyatila

¹⁸ “Mutanjilili wa kucoonde ca kuTiyatila umulembele ayi, “Aya ngamakani aamba Mwanaakwe Lesa, ucite meenso aboneka anga ngumulilo utoonyaka alimwi ashimpanta shibekabeka anga ngubulonse waswabo mukufulwa.

¹⁹ Utokwaamba ayi, ‘Milimo yako yoonse ndiishi. Lusuno lwako, kushomeka kwako, kusebensa kwako alimwi akutaboola pesule kwako, shoonse ndishishi. Ndishi akwaamba ayi bulya utoosebensa cankusu kwiinda pakutaanguna.

²⁰ Sombi ndicite litongooshi pali ndiwe ceebo mwanakashi uyo Jesebelo, ulibanda ayi ngumulaluki wakwe Lesa, ulamulangabo. Kwiinda mukwiisha kwakwe, ulabalengesha kubisha ndyaabanyengelela ayi banoocita bufuule akulya shakulya shakabengwa kushibumbwabumbwa.

²¹ Ndakamupa ciindi cakwaamba ayi asanduke kuswa kushibiibi shakwe, sombi taasuni kucileka bufuule bwakwe.

²² Ono ndaakulengesha kwaamba ayi akaciiswe alimwi abo boonse mbwaakacitaabo bufuule, ndaakulengesha ayi bakapenshekwe abuumbi, sombibo na basanduke kuswa kushibiibi nshebakacita anguwe

²³ alimwi ndaakucaya bana bakwe boonse. Lyalo shoonde shoonse shilaakwishiba ayi ndimeenshi shili mumyoyo alimwi amiyeeyo ya bantu boonse. Ndaakupa muntu woonse mulikoto lyanu kweelana amilimo yakwe.

²⁴ “ ‘Sombi mwebo nobamwi noonse nomuli muTiyatila nomutakwe kukonkela kwiisha kubiibi uku, nomutakwe kwiiya sheesho bamwi nshebakalinga kwiita ayi Shishisitwe shiine shakwe Satana, teshi muleemye kwiinda mukumupa mulasho aumwi, sobwe.

²⁵ Sombi muyumebo mukukonkela sheesho nshemucite kale, kushikila nkese.

²⁶ Uyo eshi akakome bubi akutolelela kukonkela kuyanda kwangu kushikila kumamanino, ndaakumupa nkusu shakweendelesha mishobo yoonse ya bantu.

²⁷ Ulaakuyeendelesha amusako wa ceela alimwi akwiinyonyoola anga ninongo yapwaika. Ndaakumupa nkusu shakweendelesha bweenka mbuli sheesho nshendakatambula kuswa kuli baTa.

²⁸ Ndaakumupa anyenyeenshi iitwa ayi ntanda.’

²⁹ “Uyo ucite matwi, aanyumfwe sheesho Mushimu Usalashi nshootokwaambila shoonde.