Ciyubululo 16 - Baibo Busansulushi Bwa Libuku Ili

Mbale shifongomene sha bukali bwakwe Lesa

¹ Mpomunyaawo ndakanyumfwa liswi lyakoolobeshekwa kubaanjelo bosanwe abobilo kuswa muŊanda yakwe Lesa ayi, “Kamuya mukapukwite bukali bwakwe Lesa ubo buli mumbale shifongomene shosanwe ashobilo mucishi ca panshi!”

² Munjelo mutaanshi wakaya wapukwita shakalinga mumbale yakwe ifongomene mucishi ca panshi. Mpeeke bantu abo bakalinga kulembetwe keshibilo ka munyama alimwi abaabo bakalambila cibumbwabumbwa cakwe bakatumbwa shilonda shilensha boowa, shicisa abuumbi.

³ Lyalo munjelo wabili wakapukwita shakalinga mumbale yakwe ifongomene mulweenge. Maanshi oonse akababo anga mbulowa bwa mufu. Mpeeke shoonse shilengwa sha mulweenge shakafwa.

⁴ Munjelo watatu wakapukwita shakalinga mumbale yakwe ifongomene mumilonga alimwi amutuntupu twa maanshi. Mpeeke maanshi aya akasanduka bulowa.

⁵ Pesule, ndakanyumfwa munjelo weendelesha maanshi kaamba ayi, “Mwacita ciluleme pakoombolosha mwebo Nomusalalite, nomuliiwo alimwi nomushi mukabeewo!

⁶ Mukwiinga bantu bakatila bulowa bwa bashomi alimwi abalaluki bakulukulu, nceceeco ncemwabapeta bulowa ayi banwe. Cilibo kabotu ceebo batambula cibeelete!”

⁷ Kuswawaawo ndakanyumfwa liswi kuswa kucipaililo lyakwaamba ayi, “NoBaami baLesa Beshinkusu shoonse! Ncakwiila koombolosha kwanu nkwalushinisho alimwi kuliluleme!”

⁸ Lyalo alakwe munjelo wane wakapukwita shakalinga mumbale yakwe ifongomene palisuba. Mpomunyaawo lyakasuminishikwa kutenta bantu mukwiinga lyakalungula abuumbi.

⁹ Aboobo kulungula kwakabatenta abuumbi. Mpeeke bakacobola Lesa ucite nkusu shakuleta myaalu ili bobulya. Nakubi boobo tabakwe kusanduka kuswa kushibiibi shabo kwaamba ayi bamulumbaishe.

¹⁰ Munjelo wasanu alakwe wakapukwita shakalinga mumbale yakwe ifongomene pacuuna ca bwaami ca munyama uyo. Lyalo cishi cakwe coonse cakaba mumunshinshe alimwi bantu bakatalika kuluma milaka yabo ceebo cakucisa.

¹¹ Mpomunyaawo bakacobola Lesa uli kwiculu ceebo cakucisa alimwi ashiloonda. Sombi tabakwe kusanduka kuswa kumicito yabo ibiibi.

¹² Alakwe munjelo wasanu awomwi wakapukwita shakalinga mumbale yakwe ifongomene paMulonga unene wa Yufuletisi. Mulonga uyu wakayuma kwaamba ayi bamaami ba kwicwe bacane pakwiinda.

¹³ Kuswawaawo ndakabona bashikaswa botatwe bakalinga kuboneka anga mbabombwe. Bashikaswa aba bakalinga kuswa mumulomo wa shinshimwe, mulomo wa munyama alimwi awa mulaluki mubeshi.

¹⁴ Aba mbobashikaswa bacita shaankamiko. Bashikaswa botatwe aba balaya kubamaami boonse ba mucishi ca panshi mukubayobolola kwaamba ayi bakalwaane pabushiku bunene bwakwe Lesa Shinkusu shoonse.

¹⁵ “Amunyumfwe! Ntoosa anga ngumwiipi! Ulicite coolwe uyo ushiite kaalama shakufwala shakwe kuloonda kunyumfwa nsoni na weenda matakosha mubantu!”

¹⁶ Mpeeke bashikaswa abo bakabunjika bamaami kumusena wiitwa ayi Amagedoni muciEbulu.

¹⁷ Munjelo wasanu abobilo alakwe wakapukwita shakalinga mumbale yakwe ifongomene mumuuwo. Mpomunyaawo liswi lyakoolobeshekwa kuswa pacuuna ca bwaami muŊanda yakwe Lesa kwiculu ayi, “Cacitika ono!”

¹⁸ Lyalo kwakaba kubeka kwa mfula, shiyobeyobe, shilulumo alimwi acitentanshi cinene abuumbi. Takuna kubawo kale citentanshi ca mushobo wooyu kuswabo kumalengelo a muntu. Cakabica kwiinda pashitentanshi shimwi shoonse.

¹⁹ Ndabala inene yakapasukamo shipansha shotatwe, mpeeke mandabala anene a mushishi shoonse akanyonyooka. Lesa wakeebaluka ndabala inene ya Babiloni akulengesha ayi inwe waini wa munkomeshi ya bukali bwakwe.

²⁰ Lyalo nsumbu shoonse shakashimingana, atwalo tulundu toonse tatukwe kubonekaawo alimwi.

²¹ Mabwe a mfula anene anene akalokela bantu. Lyomwi lyakalinga kulema mpashi makilogilamu ali 50. Mpeeke bantu bakacobola Lesa ceebo ca mwaalu wa mabwe a mfula uyo mukwiinga cakeendaawo kubica.