Ciyubululo 13 - Baibo Busansulushi Bwa Libuku Ili

Banyama bobilo

¹ Kuswawaawo, ndakabona munyama kaaswa mumaanshi. Wakalinga kucite meeca likumi alimwi amitwi yosanwe ayobilo. Ono kulwiica lomwi alomwi kwakalinga mushini alimwi akwalo kumutwi womwi awomwi kwakalinga liina lyamucobwe kuli Lesa.

² Munyama uyo wakalinga kuboneka anga ngushiluwe. Shimpanta shakwe shakalinga anga nsha suntwe munene. Awalo mulomo wakalinga anga ngwa nkalamu. Mpomunyaawo shinshimwe uyo wakapa munyama uyu nkusu shakwe, cuuna cakwe ca bwaami alimwi ankusu shakwe shakweendelesha shoonse.

³ Kumutwi umwi wa munyama kwakalinga kuboneka anga kuli cipwaloonda, sombi cipwaloonda ico cakamana. Bantu boonse mucishi ca panshi bakakankamana abuumbi pamunyama uyu, mpeeke bakamukonkela.

⁴ Bantu boonse bakalambila shinshimwe uyo mukwiinga wakapa munyama uyo nkusu shakwe. Alakwe munyama bakamulambila, kabaamba ayi, “Ngani uli anga ngumunyama uyu? Ngani weenga walwanaakwe?”

⁵ Munyama uyu wakasuminishikwa kwaamba maswi akulisumpula akucobola Lesa. Wakasuminishikwa akuba ankusu shakweendelesha kwamyeenshi ili makumi one alimwi ayobilo.

⁶ Mpomunyaawo wakatalika kucobola Lesa, liina lyakwe, musena ngweekalaako alimwi abaabo boonse bekala kwiculu.

⁷ Munyama ngomunya uyo wakasuminishikwa kulwana abashomi akubakoma. Wakapekwa ankusu shakweendelesha mikowa yoonse, mishobo yoonse, milaka yoonse alimwi abantu bacite shikanda shipusenepusene.

⁸ Bantu boonse bekala mucishi ca panshi balaakulambila munyama uyu, kukushakobo baabo bacite meena akalembwa mulibuku lya boomi cishi kacitana kulengwa, ee, mulibuku lilya lya Mwanaambelele wakacaikwa.

⁹ “Uyo ucite matwi, aanyumfwe!

¹⁰ Uyo woonse weelete kwaangwa, ulaakwaangwa cancinencine, alakwe uyo weelete kucaikwa kumupeeni, ulaakucaikwa kumupeeni mbomunya ubo. Nkokwaamba ayi ncibotu bashomi boonse kutaboola pesule akushomeka.”

¹¹ Kuswawaawo ndakabona munyama aumwi wakaswa mucishi ca panshi. Wakalinga kucite meeca obilo ali anga nga mbelele alimwi wakalinga kwaamba anga ngushinshimwe.

¹² Munyama uyu wakasebensesha nkusu shinene sha munyama mutaanshi ceebo ca nguwe. Wakakakatisha bantu ba mucishi ca panshi boonse ayi balambile munyama mutaanshi uyo wakalinga kucite cipwaloonda cakamana.

¹³ Munyama wabili uyu wakacita shaankamiko shinene abuumbi. Wakalengesha ayi mulilo uswe kwiculu akulokela pacishi ca panshi bantu boonse kabeebela.

¹⁴ Mpeeke wakabeca bantu boonse ba mucishi ca panshi kwiinda mushaankamiko nshaakasuminishikwa kucita ceebo ca munyama mutaanshi. Munyama uyu wakabaambila ayi bapange cibumbwabumbwa cakubonesha bulemu kumunyama uyo wakabuka ndyaakalinga wayaswa mupeeni.

¹⁵ Munyama wabili uyu wakasuminishikwa kupa buumi kucibumbwabumbwa ca munyama mutaanshi uyo, kwaamba ayi cinokwaamba alimwi akucaya baabo boonse beenga bakaka kumulambila.

¹⁶ Wakakakatisha bantu boonse, bantubo abalemekwa, babile abakandu, basha alimwi abaangulukite kwaamba ayi babikwe keshibilo kumaansa alulyo nabi pankumo.

¹⁷ Taaku muntu wakalinga kukonsha kuula nabi kuulisha kaatacite keshibilo ako. Keshibilo ako kakalinga ndyeliina lya munyama mutaanshi nabi nambala iimikanina liina lyakwe.

¹⁸ Apa palisunikwi busongo. Uyo woonse ucite maano inga weshiba nambala ya munyama uyu nceipandulula mukwiinga ileemikanina liina lya muntu. Nambala ya munyama uyu ngu 666.