Ciyubululo 10 - Baibo Busansulushi Bwa Libuku Ili

Munjelo wakalinga kucite libuku liniini

¹ Kuswawaawo, ndakabona aumwi munjelo shinkusu kaaswa kwiculu. Wakalinga kupilite mulikumbi, kumutwi wakwe kwakalinga kushingulukite nkongolo. Ciwa cakwe cakalinga kubala anga ndisuba alimwi myeendo yakwe yakalinga anga njimyaalamyaala ya mulilo.

² Wakalinga kucite libuku liniini licalukite mulyaansa. Mpeeke mweendo wakululyo wakalinga kulyatite palweenge, awalo wakucipiko koolyatite petala.

³ Lyalo wakoolobesha muliswi lyakanyumfwika anga nkubuluma kwa nkalamu. Ndyaakamana koolobesha, shilulumo shili shosanwe ashobilo shakanyumfwika.

⁴ Shilulumo ishi ndishakanyumfwika, ndakalinga kusuni kulemba, sombi ndakanyumfwa liswi kuswa kwiculu lyakwaamba ayi, “Utayubululi sheesho shilulumo shili shosanwe ashobilo nsheshaamba. Utashileembi, sobwe!”

⁵ Lyalo munjelo uyo ngondakabona umwi mweendo kaalyatite palweenge apamusena pataapu maanshi, wakatambika lyaansa kwiculu

⁶ akulumbila muliina lyakwe Lesa muumi kwalyoonse alyoonse, wakalenga liculu, cishi ca panshi, lweenge alimwi ashintu shoonse shiliimo. Munjelo wakaamba ayi, “Ciindi ono camana!

⁷ Sombi na munjelo wasanu abobilo akalishe lupeenga lwakwe, Lesa ndyeshi akacite kubamba kwakwe kwa bushishi kweelana ambwaakalwiita basebenshi bakwe, balaluki bakulukulu.”

⁸ Mpomunyaawo liswi ilyo ndindakalinga ndanyumfwa kuswa kwiculu, ndakalinyumfwa alimwi ayi, “Koya ukabwese libuku liniini licalukite mulyaansa lya munjelo wiimfwi palweenge alimwi apetala.”

⁹ Aboobo ndakaya kumunjelo uyo, akumusenga ayi ampe libuku liniini lilya. Lakwe wakaŋambila ayi, “Libwese ulilye. Mulifumo litoolula, sombi mukanwa litoobotabo anga mbuuci.”

¹⁰ Ndakabwesa libuku liniini lilya mulyaansa lyakwe akulilya. Ncakwiila lyakanyumfwika anga mbuuci mukanwa, sombi ndindakalimina, lyakalula mulifumo.

¹¹ Mpomunyaawo ndakalwiitwa ayi, “Ulyeelete kushimikila makani akwe Lesa alimwi aamba shashishi shiinji, mishobo iinji, milaka iinji alimwi abamaami baanji.”