Boomboloshi 9 - Baibo Busansulushi Bwa Libuku Ili

Abimeleki

¹ Kuswawaawo Abimeleki mwanaakwe Gidyoni wakaya kuShekemu uko kwakalinga kwikala beshikamukowa ba banyina boonse akubaambila ayi

² beepushe bene Shekemu ayi, “Ncili cibotu kuli ndimwe kulelwa abaana bakwe Gidyoni basankwa boonse bali makumi osanwe aobilo nabi kulelwa kumuntu womwi? Mulyeelete kwishiba kwaamba ayi nebo mbulowa bomwi andimwe.”

³ Lyalo bantu aba bakambila bantu ba kuShekemu makani aya. Mpeeke boonse bakasala kukonkela Abimeleki ceebo ngushikamukowa wabo.

⁴ Kuswawaawo bakamupa maali makumi osanwe a silifa kuswa kuŋanda yakalinga kulambililwaamo Baali Beliti. Maali ayo wakaapa bantu batanyumfwi, bataaku mbobabete, kwaamba ayi bamukonkele.

⁵ Mpomunyaawo wakaya kuŋanda ya baishi kuOfula uko nkwaakaya mukucaya bamakwabo, bana bakwe Gidyoni bali makumi osanwe aobilo palibwe lyomwi. Sombibo Jotamu eenka ngowakacaala mukwiinga wakacica akuya mukuyuba.

⁶ Lyalo bantu ba kuShekemu akuBeti Milo bakabungana pantu pomwi kucisamu ca mubanga pafwaafwi alibwe lilaamfu kuShekemu. Lyalo bakabika Abimeleki pabwaami.

⁷ Ono Jotamu ndyaakanyumfwa boobo, wakaya paKalundu ka Gelisimu akoolobesha ayi, “Amunyumfwe mwebo nobantu ba kuShekemu, kwaamba ayi alakwe Lesa amunyumfwe.

⁸ Bumwi bushiku shisamu shakabungana kwaamba ayi shisale mwaami wa nshisho. Mpeeke shakaambila cisamu ca olifi ayi, ‘Ba mwaami wesu.’

⁹ Acalo cisamu ico cakakumbula ayi, ‘Sobwe, inga shikoonshi kucileka kukusha mafuta ayo asebenseshekwa mukupa bulemu balesa bamwi alimwi abantu kwaamba ayi mwebo muleele.’

¹⁰ “Lyalo shisamu shakaambila mukuyu ayi, ‘Kwesa ube mwaami wesu.’

¹¹ Awalo mukuyu wakakumbula ayi. ‘Sobwe, inga shikoonshi kucileka kucata shisepo shibotu shamise kwaamba ayi mwebo muleele.’

¹² “Kuswawaawo shisamu shakaambila munyansa ayi, ‘Kwesa ube mwaami wesu.’

¹³ Sombi walo munyansa wakakumbula ayi, ‘Sobwe, inga shikoonshi kucileka kucata minyansa ikusha waini uyo usangalasha balesa bamwi abantu kwaamba ayi mwebo muleele.’

¹⁴ “Cakweelaako shisamu shoonse shakaambila muumfwa ayi, ‘Kwesa webo ube mwaami wesu.’

¹⁵ Sombi muumfwa wakakumbula ayi, ‘Na ncakwiila mulisuni ayi mbe mwaami wanu, amwise mookeshe mucimfule cangu. Na mukake, ingayi mulilo utooswa kumiyanda yangu akutenta shisamu sha sida sha kuLebanoni.’ ”

¹⁶ Mpomunyaawo Jotamu wakatolelela kwaamba ayi, “Sa mwakacita cintu cakushomeka alimwi ciluleme pakusala Abimeleki ayi abe mwaami wanu? Sa mwakacita cintu cibotu kuli Gidyoni abamuŋanda yakwe kweelana amilimo yakwe mboyakalinga kweelete?

¹⁷ Amwiibaluke kwaamba ayi bata bakamulwanina. Bakabika buumi bwabo mumaansaabo kwaamba ayi bafune ndimwe kubene Midyani.

¹⁸ Ono sunu mwabukila bamuŋanda yabo. Mwacaya bana babo basankwa bali makumi osanwe aobilo palibwe lyomwi. Lyalo Abimeleki uyo wakashalwa kumusebenshi wabo mwamubika pabwaami kuShekemu, ceebobo cakwaamba ayi ngushikamukowa wanu.

¹⁹ Anu na mutooyeeya kwaamba ayi ncemwacita sunu kuli Gidyoni abamuŋanda yakwe cabota, amusangalale aAbimeleki. Alakwe asangalale muli ndimwe.

²⁰ Sombi na tabwishi, mulilo ubilime kuswa kuli Abimeleki akutenta bantu ba kuShekemu boonse alimwi aba kuBeti Milo. Alimwi mulilo ubilime kuswa kubantu ba kuShekemu aba kuBeti Milo utente Abimeleki.”

²¹ Mpomunyaawo Jotamu wakacica akuya mukwikala kuBiya mukwiinga wakaloonda Abimeleki munene wakwe.

²² Abimeleki wakalela cishi ca Isilaeli myaaka yotatwe.

²³ Kuswawaawo Lesa wakatuma muuya ubiibi uyo wakalengesha bene Shekemu kupata Abimeleki. Lyalo bakamubukila.

²⁴ Ici cakacitika mukupilusha cibiibi cakacita Abimeleki pakucaya bana bakwe Gidyoni bali makumi osanwe aobilo, alimwi akubene Shekemu abo bakamucafwaako kubacaya.

²⁵ Lyalo bene Shekemu bakabika bantu bamwi peculu lya tulundu kwaamba ayi kababelamina Abimeleki. Bantu abo bakalinga kwipila muntu uli woonse weenda. Mpeeke Abimeleki wakashibishikwa makani ayo.

²⁶ Mpeeke Gaalu mwanaakwe Ebedi wakalongela kuShekemu abamakwabo. Abalo bantu ba kuShekemu bakamushoma.

²⁷ Bantu abo bakalinga kunooya kumyuunda yabo mukuleta minyansa akupanga waini. Bakalinga kutola kuŋanda yakulambililamo lesa wabo uko nkobakalinga kusekelela. Ndibakalinga kulya akunwa bakalinga kucobola Abimeleki.

²⁸ Mpomunyaawo Gaalu mwanaakwe Ebedi wakaamba ayi, “Anu swebo tuli bantu mushobonshi sobamuShekemu? Ino Abimeleki ngani uyo ngotutookonkela? Sa teshi mwanaakwe Gidyoni? Alakwe Sebulu ulanyumfwila milawo yakwe. Amukonkele mushali wanu mukulukulu Amo, mushali wa cipani canu?

²⁹ Nendalinga ndime nentanjilila bantu aba, naakwiinga Abimeleki ndakamutandabo kalekale. Naakwiinga ndakamwaambila ayi, ‘Bunganya bashilumamba bako baanji, wise tulwane!’ ”

³⁰ Ono Sebulu mweendeleshi wa ndabala inene iyo ndyaakanyumfwa maswi akwe Gaalu ayo, wakakalala abuumbi.

³¹ Mpomunyaawo cabushishi wakatuma beshinkombe kuli Abimeleki kuAluma ayi bakamucenjeshe ayi, “Gaalu mwanaakwe Ebedi abamakwabo bali kuShekemu uko nkobatokwaambila bantu ayi bamubukile.

³² Anu munyamuke mashiku mwebo abashilumamba banu mwise muyube mumyuunda.

³³ Ono macuunsacuunsa palya paswita lisuba mwise mulwane bamundabala kabateengashite. Gaalu abashilumamba bakwe na baswe kwaamba ayi bamulwane, mukabalwaane ankusu shanu shoonse.”

³⁴ Aboobo Abimeleki abashilumamba bakwe boonse bakanyamuka mashiku kuya mukuyubilila pansengwe lya ndabala ya Shekemu kabali mumakoto one.

³⁵ Lyalo Abimeleki abashilumamba ndibakabona Gaalu wesa kumwinjililo wa ndabala bakayubuluka mpobakalinga kuyubite.

³⁶ Ono Gaalu ndyaakababona, wakaambila Sebulu ayi, “Langa, mbalya bantu batookunkuluka tulundu.” Sebulu wakakumbula ayi, “Nshimfulebo shilya sha tulundu, teshi bantu, sobwe.”

³⁷ Sombi Gaalu wakabooshaawo ayi, “Langa, mbantu balya batookunkuluka tulundu. Limwi likoto litooswita kunshila ya cisamu ca mubanga ca beshikusonda.”

³⁸ Mpomunyaawo Sebulu wakamwaambila ayi, “Kwaamba ono mbowaamba lyoonse. Te ndiwe wakalinga kutwaambila ayi, ‘Ceebonshi ncetukonkelela Abimeleki?’ Sunu besa mbowakalinga kunyansha, balwane we, tukubone.”

³⁹ Lyalo Gaalu wakatanjilila bantu ba kuShekemu ayi balwane Abimeleki.

⁴⁰ Mpeeke Abimeleki wakatandaanya Gaalu. Bantu bakwe Gaalu baanji bakacisikwa ndibakalinga kucica akuwa nshila yoonse kushikila akumwinjililo unene wa ndabala iyo.

⁴¹ Kuswawaawo Abimeleki wakaboolela kuAluma. Alakwe Sebulu wakatandaanya Gaalu abamakwabo boonse kuswa mundabala ya Shekemu akubakasha kwikalaako.

⁴² Ono bushiku bwakaboolaawo Abimeleki wakashibishikwa ayi bantu ba kuShekemu bapangana kuya kumyuunda.

⁴³ Mpeeke wakapansaanya bashilumamba bakwe mumakoto otatwe. Lyalo bakayuba mumyuunda akubalindilila. Ono ndyaakababona kabaswa mundabala, wakanyamuka akubalwana.

⁴⁴ Mpeeke Abimeleki alikoto ndyaakalingaalyo bakaya mukulindilila kumwinjililo unene wa ndabala. Sombi makoto amwi obilo akaya mukulwana bakalinga mumyuunda akubacaya boonse.

⁴⁵ Anu bushiku ubo boonse Abimeleki lyakamupililabo kaalwana bantu bamundabala iyo. Wakeekoma akucaya bantu boonse bakalinga kwikalaamo akumwaya maandaabo oonse. Kuswawaawo wakasanseela mwiinyo mundabala iyo yoonse.

⁴⁶ Ono bantu ba kuŋanda ilaamfu ya kuShekemu ndibakanyumfwa shakacitika, bakacicila kulilinga lya kuŋanda yakulambililaako Baali Beliti kuya mukuyubila nkuko.

⁴⁷ Lyalo Abimeleki wakalwiitikwa ayi bantu abo bayuba kuŋanda yakulambililaako iyo.

⁴⁸ Mpomunyaawo wakatanta paKalundu ka Salimoni abashilumamba bakwe boonse. Mpeeke wakabwesa keembe, watimbula lukuni akulubika pacifushi. Kuswawaawo wakaambila bashilumamba bakwe ayi bafwambaane kucita bweenka ubo.

⁴⁹ Aboobo bashilumamba boonse bakatimbula nkuni akukonkela Abimeleki. Bakashibunjika kuŋanda iyo akwiitenta. Lyalo bantu boonse bakalinga muŋanda ilaamfu ya kuShekemu bakafwa. Mwakafwa bantu bali mpashi 1,000 basankwa abanakashi.

⁵⁰ Kuswawaawo Abimeleki wakaya kuTebesi akushinguluka ndabala inene iyo akwiibwesa.

⁵¹ Ono kwakalinga ŋanda ilaamfu iyumu abuumbi mundabala umo basankwa abanakashi boonse mobakacicila. Bakalipingilila mukati akutanta kuciluli.

⁵² Abimeleki ndyaakashika wakaya kumwinjililo wa ŋanda iyo kwaamba ayi aiteente.

⁵³ Sombi mwanakashi umwi wakamuloshela libwe lyakupelelaawo pamutwi wakwe akupwaya katuutu.

⁵⁴ Mpomunyaawo Abimeleki wakeeta shikumunyamwita shakulwanisha akumwaambila ayi, “Bwesa mupeeni wako uncaaye, ceebo bantu inga batalika kwaamba ayi, ‘Wakacaikwa kumwanakashi.’ ” Aboobo wakamuyasa, wafwa.

⁵⁵ Ono bene Isilaeli ndibakabona ayi Abimeleki wafwa, boonse bakaboolela kumishaabo.

⁵⁶ Munshila iyo Lesa mbwaakapilushila Abimeleki cibiibi ncaakacitila baishi pakucaya bamakwabo bali makumi osanwe aobilo.

⁵⁷ Lesa wakapilushisha cibiibi abantu ba kuShekemu kweelana amaswi akwe Jotamu mwanaakwe Gidyoni ngaakaamba ndyaakabashingana.