Boomboloshi 8 - Baibo Busansulushi Bwa Libuku Ili

Kukomwa kwa bene Midyani kwakweelaako

¹ Bene Efuleemu bakatongookila Gidyoni ayi, “Ceebonshi tookwe kutwiita pakuya mukulwana bene Midyani? Ino wakacitilanshi boobo?” Bene Efuleemu bakatongooka abuumbi pacikani ico.

² Alakwe wakabakumbula ayi, “Nebo ncendakonsha kucita taciindi ncemwakacita. Sa tamwishi kwaamba ayi mulimo uniini ngomwasebensa mwebo nobene Efuleemu uleendawo bulemu pawooyo wacita bamucipani cakwe Abiyesa boonse?

³ Lesa wakaaba baami ba bene Midyani Olebu aSebu mumaansaanu. Ino nebo ndakacitanshi kwiinda ndimwe?” Ndibakanyumfwa boobo bakoomuna.

⁴ Kuswawaawo Gidyoni abantu bakwe bali 300 bakasubuka Mulonga wa Joodani. Nabi bakalinga kulemete, bakatolelela kuya butandaanya bene Midyani.

⁵ Ndibakashika kuSakoti, wakaambila bantu bekalaako ayi, “Amupeko bantu bangu shinkwa. Balema abuumbi alimwi tuciya citandaanya Seba aSalimuna baami ba bene Midyani.”

⁶ Sombi bacinenenene ba bene Sakoti bakakaka akwaamba ayi, “Sa Seba aSalimuna wabacata kale cakwaamba ayi tupe shinkwa bashilumamba bako?”

⁷ Lyalo Gidyoni wakabaambila ayi, “Ncibotu, ono na Mwaami Lesa akaabe Seba aSalimuna mumaansaangu, ndaakumukwipisha misako ya myuumfwa ituba aya mukona ya muluyanga.”

⁸ Mpomunyaawo Gidyoni wakaya kuPenuwelo, uko akwalo wakasenga cakulya. Sombi abalo bakamukumbula bweenka mbuli bantu ba kuSakoti.

⁹ Abalo wakabaambila ayi, “Ndaakumana kukoma, ndaakwisa nkamwaye ŋanda yanu ilaamfu iyi.”

¹⁰ Muciindi ico Seba aSalimuna bakalinga kundabala ya Kaliko abashilumamba babo bali 15,000 abo bakacaalaawo. Bashilumamba babo bali 120,000 kabali bacaikwa kale.

¹¹ Lyalo Gidyoni wakeenda nshila yakalinga kwiinda kweela luyanga, kwicwe lya Noba aJogibeya. Mpeeke wakalwana bene Midyani kabatalibambiteewo.

¹² Bamaami bobilo ba bene Midyani, Sebo aSalimuna bakacica. Sombi Gidyoni wakabatandaanya akubacata. Lyalo bashilumamba babo boonse bakacica.

¹³ Kuswawaawo Gidyoni mwanaakwe Joashi wakeenda mumwinjililo wa kuElesi ciindi ndyaakalinga kuswa kunkondo.

¹⁴ Ono uko wakacata musankwa wa kuSakoti akumwiipusheepusha. Musankwa uyo wakalembela Gidyoni meena a bamaloba alimwi abacinenenene ba kuSakoti bali 77.

¹⁵ Mpomunyaawo Gidyoni wakaya kubantu ba kuSakoti akubaambila ayi, “Sa muleebaluka ndimwakaka kupa shinkwa bashilumamba bangu bakalinga kulemete akunjipusha ayi, ‘Sa Seba aSalimuna wabacata kale cakwaamba ayi tupe shinkwa bashilumamba bako?’ Ono mbaaba.”

¹⁶ Lyalo wakakwipa bantu abo amisako ya myuumfwa ituba aya mikona ya muluyanga.

¹⁷ Kuswawaawo wakaya kuPenuwelo akuwisha ŋanda yabo ilaamfu. Mpeeke wakacaya basankwa boonse bamundabala inene iyo.

¹⁸ Mpeeke wakeepusha Seba aSalimuna ayi, “Ino bantu mbomwakacaya kuTabo bakalinga kuboneka buyani?” Abalo bakakumbula ayi, “Bakoshenye amwebo, nkokwaamba ayi bakalinga kuboneka anga mbanaabaami mbuli mbomuboneka mwebo.”

¹⁹ Lyalo Gidyoni wakabaambila ayi, “Mwaamba kabotu. Bantu abo mbamakwesu, mbana babo bama. Ono neenga tamukwe kubacaya, ntooshomesha cakulumbila ayi bweenka mbocibete lushinisho ayi Mwaami Lesa ngumuumi, naakwiinga anebo nshimucaiiwo, sobwe.”

²⁰ Mpomunyaawo wakaambila Jeta mwanaakwe wakwiiya ayi, “Koya ubacaaye.” Sombi lakwe wakaloonda kunyamuna mupeeni ayi abacaaye ceebo wakalinga mwanike.

²¹ Mpeeke Seba aSalimuna bakamwaambila ayi, “Amunyamuke mwise mutucaaye mwebo nobeene nobanene.” Aboobo Gidyoni wakabacaya akubwesa shakalinga kufweete ngamela shabo munshingo.

²² Kuswawaawo bene Isilaeli bakaambila Gidyoni ayi, “Mube baami besu, mwebo abamulunyungu lwanu mukwiinga mwatufuna kubene Midyani.”

²³ Alakwe Gidyoni wakabakumbula ayi, “Nshikoonshi kumulela, nebo nabi mwanaangu. Mwaami Lesa mwiine ngweshi akamuleele.”

²⁴ Wakatolelela akwaamba ayi, “Ntoomusengabo cintu comwi. Womwi awomwi alete masikiyo ngwaakabwesa kubalwani besu.” Ono munshiku isho bene Ishimaeli bakalinga kufwala masikiyo a golodi bweenka mbuli bantu bamwi bakalinga kwikala muluyanga.

²⁵ Abalo bakakumbula ayi, “Ee tutoomupa.” Bakayala cisani panshi, lyalo womwi awomwi wakabikaawo masikiyo ngwaakasaala.

²⁶ Masikiyo a golodi ayo akalema makilogilamu ali 20 kutabikilako shakulibotesha shimwi, nshebakalinga kufwala munshingo ashisani shifubelafubela shakalinga kufwala bamaami ba kuMidyani nabi ntenshi shakalinga kufwala ngamela.

²⁷ Lyalo Gidyoni wakapanga efodi kusebensesha golodi uyo akwiibika mundabala yakwe ya Ofula. Mpeeke bene Isilaeli boonse bakacileka kulambila Lesa akutalika kulambila efodi iyo. Efodi iyo yakaba koose kuli Gidyoni abamuŋanda yakwe.

²⁸ Munshila iyo bene Midyani bakakomwa kubene Isilaeli cakutabayeeyelawo kubalwana tubili. Lyalo mucishi cabo mwakaba luumuno kwamyaaka makumi one, nkokwaamba ayi kushikila Gidyoni ndyaakafwa.

Kufwa kwakwe Gidyoni

²⁹ Paciindi ici Gidyoni mwanaakwe Joashi wakaya mukwikala kumishaabo.

³⁰ Gidyoni wakalinga kucite baana basankwa makumi osanwe aobilo ceebo wakalinga kweebete banakashi baanji.

³¹ Ono wakalinga kucite kasuwa kuShekemu uyo wakamushalila mwaana musankwa wakalinga kwiitwa ayi Abimeleki.

³² Ndikwakeenda nshiku shiinji Gidyoni wakacembela akufwa. Bakamubika mucuumbwe ca baishi ba Joashi kuOfula ndabala ya bamucipani cakwe Abiyesa.

³³ Gidyoni ndyaakafwa, bene Isilaeli bakacileka kulambila Mwaami Lesa akutalika kulambila baBaali. Bakasandula Baali Beliti kuba lesa wabo.

³⁴ Ncakwiila bakacileka kusebensela Mwaami Lesa wabo uyo wakabafuna kubalwani babo boonse abo bakalinga kubashingulukite.

³⁵ Alimwi tabakwe kulumba bamuŋanda yakwe Gidyoni pashintu shibotu shoonse nshaakabacitila.