Boomboloshi 7 - Baibo Busansulushi Bwa Libuku Ili

Gidyoni mbwaakakoma bene Midyani

¹ Ono macuunsacuunsa Jelubaali, nkokwaamba ayi Gidyoni, abashilumamba bakwe boonse bakaya mukuyaka misumba kulubasu lwa Kantupu ka Alodi. Ayalo misumba ya bene Midyani yakalinga kumatwa lyabo kufwaafwi aKalundu ka Mole.

² Mpeeke Mwaami Lesa wakaambila Gidyoni ayi, “Bantu mbooli abo bafulisha kwaamba ayi ngabe bene Midyani mumaansaabo mukwiinga bene Isilaeli inga batalika kulilumbaisha ayi bakoma kwiinda munkusu shabo beene. Munshila iyo inga tabalumbaishi ndime.

³ Anu ubaambile kwaamba ayi, ‘Uyo woonse ucite boowa, abooleeko.’ ” Munshila iyo Gidyoni wakabasunka. Lyalo bali 22,000 bakaboolaako, sombi bali 10,000 balo bakacaala.

⁴ Sombi Mwaami Lesa wakaambila Gidyoni alimwi ayi, “Bantu aba bacili baanji. Ono batole kumaanshi uko nkweshi nkusalulwitemo nemwiine. Na ndaamba ayi uyu ulyeelete kuya andiwe, akaye. Ono na ndaamba ayi uyu taaelete kuya andiwe, atakayi.”

⁵ Mpomunyaawo Gidyoni wakabatola boonse kumaanshi uko Mwaami Lesa nkwaakamwaambila ayi, “Upansaanye uyo woonse weshi abwese maanshi mumaansaakwe akunwa mbuli kabwa kubaabo beshi baakunamine.”

⁶ Bali 300 bakalinga kubwesa maanshi mumaansaabo akunwa mbuli kabwa. Ono boonse bacaala bakaakunamina.

⁷ Lyalo Mwaami Lesa wakaambila Gidyoni ayi, “Ndaakukufuna abantu bali 300 abo banwa maanshi mbuli kabwa alimwi ndaakwaaba bene Midyani mumaansaako. Ono aba bamwi baambile baboolelebo kundabala.”

⁸ Aboobo Gidyoni wakabaambila boonse abo ayi baboolelebo kundabala, sombi wakacaashabo bali 300 abo bakabwesa shakulya amapeenga shakashiya babyaabo. Misumba ya bene Midyani yakalinga munkunamo ya kalundu mucinyika.

⁹ Mashiku eenka ayo Mwaami Lesa wakaambila Gidyoni ayi, “Amubuke, mulwane abali mumisumba ilya ceebo ndabaaba kale mumaansaako.

¹⁰ Ono na waloonda, utaangune kuya kumisumba yabo aPula musebenshi wako.

¹¹ Na unyumfwe nsheshi banokwaamba utooyuminishikwa kubalwana.” Aboobo wakanyamuka amusebenshi wakwe kuya kufwaafwi amisumba ya balwani bakwe abo.

¹² Bene Midyani, bene Amaleki amishobo imwi yoonse yakwicwe bakalinga kubungene mucinyika kabali baanji anga ninsoshi. Bakalinga kucite ngamela shiinji mbuli museese wa muloombe lwa lweenge.

¹³ Ono Gidyoni ndyaakashika kufwaafwi amisumba, wakanyumfwa muntu umwi kaalwiita mubye ciloto cakwe ayi, “Ndalota shinkwa wa bale walinga kukunkulukila kumisumba yesu. Wooma musumba womwi. Mpomunyaawo musumba uyo wawa panshi akumwayuluka.”

¹⁴ Mubye ndyaakanyumfwa boobo wakakumbula ayi, “Taaku cimwi, nguGidyoni mwine Isilaeli, mwanaakwe Joashi utootulwana. Mwaami Lesa waaba bene Midyani abashilumamba boonse mumaansaakwe.”

¹⁵ Ono Gidyoni ndyaakanyumfwa ciloto ico abupandulushi bwa ncico, wakalambila Lesa. Kuswawaawo wakaboolela kumisumba ya bene Isilaelinyina akubaambila ayi, “Amubuke! Mwaami Lesa waaba bene Midyani mumaansaanu!”

¹⁶ Lyalo wakapansaanya bantu bakwe bali 300 mumakoto otatwe akupa muntu womwi awomwi lupeenga anongo shakalinga kucite lilampi mukati.

¹⁷ Wakabaambila ayi, “Amunangilishe. Mucite nceshi ncite ndashika kufwaafwi amisumba.

¹⁸ Na nebo alimwi abaabo mboondi abo na tulishe mapeenga, amwebo mulishe bweenka kushinguluka misumba akoolobesha ayi, ‘Ngumupeeni wa Mwaami Lesa awakwe Gidyoni!’ ”

¹⁹ Ono Gidyoni abaabo bali 100 mbwaakalinga abo ndibakashikabo kweela misumba bakacana beshikulindilila bamwi ndibakotolwa akwisa bambi pakati ka mashiku. Bakalisha mapeenga akupwaya nongo nshebakalinga kucite mumaansa.

²⁰ Aalo makoto amwi obilo akacita bweenka ubo. Bakacata malampi kucipiko, mapeenga kululyo akoolobesha ayi, “Ngumupeeni wa Mwaami Lesa awakwe Gidyoni!”

²¹ Mpeeke bakeemikana kabashingulukite misumba. Sombi balo balwani babo bakacica kabaya bulila.

²² Boonse ndibakalisha mapeenga ali 300, Mwaami Lesa wakalengesha balwani babo kutalika kucayana beene abeene. Bakacicila kuBeti Shita kulubasu lwa kuSelela kuya mukushika kundabala ya Abelo Mewola kufwaafwi akuTabati.

²³ Lyalo bamumukowa wakwe Nafutali, Asha, abene Manase boonse bakeetwa kwaamba ayi batandaanye bene Midyani.

²⁴ Mpomunyaawo Gidyoni wakatuma beshinkombe mucishi coonse catulundu ca Efuleemu kuya mukwaamba ayi, “Kamwisa tulwane bene Midyani. Mushinkile shito sha Joodani asha tulonga toonse kuya mukushika kuBeti Bala.” Aboobo bene Efuleemu bakacita bweenka ubo.

²⁵ Bakacata bamaami bobilo ba bene Midyani Olebu aSebu. Olebu bakamucaila kulibwe lya Olebu. Alakwe Sebu wakacailwa mucilindi cakutyaninamo minyansa cakwe Sebu. Bakatolelela kuya butandaanya bene Midyani. Kuswawaawo bakaleta mutwi wakwe Olebu awakwe Sebu kuli Gidyoni uyo wakalinga kwicwe lya Joodani.