Boomboloshi 6 - Baibo Busansulushi Bwa Libuku Ili

Gidyoni

¹ Ono bene Isilaeli bakabisha alimwi pameenso a Mwaami Lesa. Aboobo Mwaami Lesa wakabaaba mumaansa a bene Midyani kwamyaaka yosanwe ayobilo.

² Bene Midyani bakalinga kucite nkusu kwiinda bene Isilaeli. Aboobo bene Isilaeli bakalinga kuyuba mushimfwengo, shilingo amisena imwi ishiteme mutulundu.

³ Ono bene Isilaeli na bashangabo shishango shabo, bene Midyani, bene Amaleki alimwi abantu bakwicwe bakalinga kwisa mukubalwana.

⁴ Bakalinga kuyaka misumba yabo kuIsilaeli akunyonyoola shishango kuya mukushika kuGasa. Taaku cintu ciyoya ncebakashiila bene Isilaeli, nkokwaamba ayi mbelele, ŋombe nabi mbongolo shoonse bakatola.

⁵ Bakalinga kuletelela shifubwa shabo amatente. Bakalinga baanji mbuli cisoshi cakwaamba ayi cakalinga ciyumu kubelenga bantu abo nabi kubelenga angamela shabo. Bakanyonyoola cishi ndibakesa.

⁶ Ncakwiila bene Midyani bakapensha bene Isilaeli abuumbi. Aboobo bakalilila Mwaami Lesa ayi abacaafwe.

⁷ Ono bene Isilaeli ndibakalilila Mwaami Lesa ayi abacaafwe ceebo ca bene Midyani,

⁸ wakabatumina mulaluki wakabaambila ayi, “Mwaami Lesa, Lesa wa bene Isilaeli waamba ayi, ‘Ndakamukusha muIjipiti cishi cabusha.

⁹ Ndakamufuna kubene Ijipiti. Ndakamufuna akubaabo bamwi bakalinga kumupensha. Ndakabatanda kunembo lyanu akumupa cishi cabo.’

¹⁰ Ndakamwaambila ayi, ‘Ndime Mwaami Lesa, Lesa wanu, mutakalambili balesa ba bene Amoli bene cishi umo momushiite.’ Sombi tamukwe kunyumfwila, sobwe.”

¹¹ Mpomunyaawo munjelo wa Mwaami Lesa wakesa akwikala munshaamubanga kuOfula. Mushi uyu wakalinga wakwe Joashi mwine Abiyesa. Ono Gidyoni mwanaakwe Joashi ndyaakalinga kulupula witi mucilindi cakutyaninamo minyansa kuloondesha bene Midyani,

¹² Munjelo wa Mwaami Lesa wakaboneka kuli nguwe akumwaambila ayi, “Mwaami Lesa uli andiwe, webo oshinkusu utacite boowa.”

¹³ Mpeeke Gidyoni wakamukumbula ayi, “Nkambo, na Mwaami Lesa uli aswebo, ino ceebonshi mapensho aya oonse atootucitikila? Bamashali besu bakulukulu bakatwaambila ayi Mwaami Lesa wakacita shaankamiko ndyaakabakusha muIjipiti. Ino bulya shili kuli? Ncakwiila Mwaami Lesa watufutatila akutwaaba mumaansa a bene Midyani.”

¹⁴ Lyalo Mwaami Lesa wakamulwiita ayi, “Koya ankusu shako shoonse nshiwakapekwa ukafune bene Isilaeli kuswa mumaansa a bene Midyani. Sa te ndime ntookutuma?”

¹⁵ Alakwe Gidyoni wakakumbula ayi, “Ino nebo nkambo, inga ndafuna buyani bene Isilaeli? Amubone cipani cangu ncecitacite nkusu pashipani sha mumukowa wakwe Manase. Alimwi nebo ndime ntacindeme mubamuŋanda ya bata.”

¹⁶ Mpomunyaawo Mwaami Lesa wakamwaambila ayi, “Ndaakunooli andiwe, ulaakubacaya bene Midyani boonse cakufwambaana anga ngumuntu womwibo.”

¹⁷ Gidyoni wakakumbula ayi, “Na ncakwiila mwamfwita nkumbu amumboneshe citondesho cakwaamba ayi nshome ayi ndimwe Baami baLesa.”

¹⁸ Mutaswiiwo kushikila muletele mulambu wa cakulya. Mwaami Lesa wakakumbula ayi, “Koya ulancana.”

¹⁹ Mpomunyaawo Gidyoni wakaya kuŋanda mukuteleka mwanaampongo acimaande ca fulaulo ukwana makilogilamu ali likumi. Nyama wakaibika mumutaanga, musushi walo wakaubika mukanongo akuleta kunembo lya munjelo wa Mwaami Lesa munshaacisamu ca mubanga.

²⁰ Lyalo munjelo wakwe Lesa wakamwaambila ayi, “Bwesa nyama acimaande ushibike palibwe ili akushitileela musushi.” Gidyoni wakacita ubo.

²¹ Mpomunyaawo munjelo wa Mwaami Lesa wakatondeka nkoli njaakalinga kucite mulyaansa lyakwe akwiishisha panyama acimaande. Mpeeke mulilo wakaswa mulibwe akutenta nyama iyo acimaande. Kuswawaawo munjelo wakashimingana.

²² Lyalo Gidyoni wakeshiba ayi ncakwiila ngumunjelo wa Mwaami Lesa akwaamba ayi, “NoBaami baLesa Beshinkusu shoonse, ncakwiila ndabona munjelo wanu ameenso angu.”

²³ Sombi Mwaami Lesa wakamwaambila ayi, “Luumuno lube awebo, utaloondi ceebo teshi ufweewo.”

²⁴ Mpomunyaawo Gidyoni wakayaka cipaililo ca Mwaami Lesa pa musena uyu, akucitumba ayi, “Mwaami Lesa ngwa luumuno.” Asunu nkocili kuOfula ndabala ya bamucipani cakwe mumukowa wa bene Abiyesa.

²⁵ Mpeeke mashiku eenka ayo Mwaami Lesa wakaambila Gidyoni ayi, “Tola mucende wa baiso ucite myaaka yosanwe ayobilo. Umwaye cipaililo ca baiso ncebapaililawo Baali. Utimboole cikoshanyo cakwe Ashela, lesa mwanakashi cili kulubasu lwa ncico.

²⁶ Wamana kucita boobo, unjakile cipaililo cibotu, nebo neMwaami Lesa, Lesa wako, peculu lya ceeci nceshi umwaye. Pesule ndyeshi ubwese mucende uyo akumutenta wakabumbulu ayi ngumulambu wakutenta. Cikoshanyo cakwe Ashela nceshi utimboole cibe nshenkuni.”

²⁷ Aboobo Gidyoni wakabwesa basebenshi bakwe bali likumi akucita kweelana abwakaamba Mwaami Lesa. Taakwe kucita mulimo uyu malumwi, sombi wakoocita mashiku mukwiinga wakalinga kuloonda beshikamukowa alimwi abantu ba mundabala.

²⁸ Ono bantu bamundabala ndibakabuka macuunsa, bakacana cipaililo cakwe Baali, lesa wabo camwaikwa, cikoshanyo cakwe Ashela catimboolwa, alimwi mucende watentelwa pacipaililo ico cakayakwa.

²⁹ Aboobo bakeepushanya ayi, “Anu ngani wacita ceeci?” Lyalo bakeepusheepusha akucana ayi nguGidyoni mwanaakwe Joashi ngowakacicita.

³⁰ Mpomunyaawo bakaambila Joashi ayi. “Leta mwanaako tumucaaye ceebo wamwayulula cipaililo cakwe Baali akutimboola cikoshanyo cakwe Ashela calinga palubasu lwa ncico.”

³¹ Sombi Joashi wakabaambila ayi “Nkokwaamba ayi mwebo mutoofuninina Baali? Ino mutoomufunininanshi? Woonse uyo utoomufuninina ulaakucaikwa kabutana kuca ciilo. Na ncakwiila Baali ngulesa amumuleeke alifuune mwiine ceebo ncipaililo cakwe camwayululwa.”

³² Kuswa bushiku ubo Gidyoni wakalinga kwiitwa ayi Jelubaali, nkokwaamba ayi “Amumuleeke Baali amulwaane,” ceebo ncipaililo cakwe camwayululwa.

³³ Mpeeke bene Midyani boonse abene Ameleki pantu pomwi abantu boonse bakwicwe bakabungana pomwi, basubuka Mulonga wa Joodani akuyaka misumba yabo muCinyika ca Jesiliilu,

³⁴ Mpomunyaawo Mushimu wa Mwaami Lesa wakesa pali Gidyoni. Aboobo wakalisha lupeenga kwiita bamucipani cakwe Abiyesa ayi bamukonkele.

³⁵ Wakatuma beshinkombe kucishi coonse ca bene Manase ayi bese bamukonkele. Akwalo kumukowa wakwe Asha, Sebuluni aNafutali wakatumako beshinkombe. Lyalo abalo bakesa mukumucafwa.

³⁶ Mpeeke Gidyoni wakaambila Mwaami Lesa ayi, “Na ncakwiila mulaakusebensesha ndime kufuna Isilaeli kweelana ambomwaamba,

³⁷ ntoobika booya bwa mbelele palubansa lwakulupwitawo witi. Ono na nkacane mume kubooya panshi kapataapu, lyalo ndaakwishiba ayi ncalushinisho mulaakufuna bene Isilaeli kwiinda muli ndime kweelana ambomwakaamba.”

³⁸ Aboobo cakacitika. Macuunsacuunsa ndyaakabuka, wakatyana booya ubo akukushako maanshi akasula mbale ifongomene.

³⁹ Mpomunyaawo Gidyoni wakaambila Lesa ayi, “Mutankalalili sobwe, nsenge cakweelaako. Amunsuminishe kweelesha alimwi pabooya. Ntoosenga ayi kubooya kutabi mume, sombi panshi palo poonse patontole kumume.”

⁴⁰ Mashiku ayo Lesa wakacita bweenka ubo. Booya bwakalinga buyumu, sombi panshi pakatontola kumume.