Boomboloshi 5 - Baibo Busansulushi Bwa Libuku Ili

Lwiimbo lwakwe Debola aBalaki

¹ Ono pabushiku ubo mbobakakoma, Debola aBalaki mwanaakwe Abinoamu bakeemba lwiimbo ulu.

² “Ono bamatanjilili bene Isilaeli ndibatanjilila, abalo bantu ndibalyaaba cakusangalala, Mwaami Lesa aalumbaishikwe.

³ Amukutike mwebo nobamaami, munyumfwe mwebo nobeendeleshi. Nebo ntokwiimbila mwaami Lesa, ntokwiimbila Mwaami Lesa, Lesa wa bene Isilaeli.

⁴ “NoBaami baLesa, ndimwakaswa kuSiya, ncakwiila ndimwakaswa kucishi ca Edomu, cishi cakatenkaana, mfula yakaloka, Ee maanshi akaswa mumakumbi.

⁵ Tulundu twakatenkaana kunembo lya Mwaami Lesa, Lesa wa kuSinayi, ee kunembo lya Mwaami Lesa, Lesa wa kuIsilaeli.

⁶ “Munshiku shakwe Shamuga mwanaakwe Anati, ncakwiila munshiku shakwe Jaelo, mumikwakwa mwakoomunabo tontolo, Beshikweenda bakalinga kwiinda tushila mbali.

⁷ Mishi yakafwa muIsilaeli, kushikila mwebo baDebola ndimwakesa, Mwakesa mbuli bashali banakashi muIsilaeli.

⁸ Ciindi bantu ndibakasala balesa beensu, ayalo nkondo yakabashikila. Tekwakalinga kuboneka lisumo nabi buta pakati ka bantu bali 40,000 ba kuIsilaeli.

⁹ Moyo wangu uli pabamatanjilili bene Isilaeli, uli pabantu bakalyaaba cakusangalala. Aalumbaishikwe Mwaami Lesa.

¹⁰ “Kamuya mukaluule, nomutanta pambongolo shituba, mwebo nomwikala pashakwikalaawo pashifubwa amwebo nomweenda amyeendo.

¹¹ Amukutike maswi a beshikwiimba kumikalo. Uko nkobatokwiimba pakukoma kwa Mwaami Lesa, kukoma kwa bashilumamba bene Isilaeli. Lyalo bantu ba Mwaami Lesa bakeenda kuswa mumishi yabo.

¹² “Amunyamuke baDebola, amunyamuke, amunyamuke, mwiimbe lwiimbo. Katiya amwebo nobaBalaki, amutanjilile mbomwakacata munkondo, nobaBalaki nobana babo baAbinoamu.

¹³ “Lyalo bashomeka bakesa kubatanjilili babo, bantu ba Mwaami Lesa bakesa mukulwana beshinkusu.

¹⁴ Bakesa mucinyika kuswa kuEfuleemu, pesule lya bamumukowa wakwe Benjameni. Bamatanjilili ba bashilumamba bakaswa kuMakiya kuSebuluni nkokwakaswa bakalinga kucite nkoli sha butanjilili.

¹⁵ Bamatanjilili ba mukowa wakwe Isaka bakesa aDebola Ncakwiila bamumukowa wakwe Isaka bamwi bakesa aBalaki. Bakamukonkela akunjila mucinyika. Sombi bene Lubeni bakalinga kucite miyeeyo yobilo. Tabakwe kwishiba ncebakalinga kweelete kucita.

¹⁶ Ceebonshi ncebakacaalila kumisumba yabo ambelele? Sa nkwaamba ayi banookutikabo miloshi yakwiita mbelele? Ncakwiila bene Lubeni bakalinga kucite miyeeyo yobilo. Tabakwe kwishiba ncebakalinga kweelete kucita.

¹⁷ Bene Gilyadi bakacaala kwitala lya Joodani, abalo bene Dani bakacaala kumaato. Bene Asha bakekala kweela lweenge, Ndushinisho bakekalabo kushito shabo.

¹⁸ Sombi bene Sebuluni bakabika buumi bwabo mumaansaabo, Abene Nafutali abalo bakaya mukulwana patulundu.

¹⁹ “Bamaami bakesa akulwana nkondo, ncakwiila bamaami ba kuKenani bakalwana kuTaanaki kufwaafwi akantupu ka Megido, sombi tabakwe kusaalawo silifa nabi cimwi cili coonse.

²⁰ Mwiculu, ashalo nyenyeenshi shakalwana, ee shakalwana Sisela kashili munshila ya nshisho.

²¹ Mukuuku wa maanshi muLweenge lwa Kishoni, wakabatola boonse. Ncakwiila ngamaanshi eenda lubilo muMulonga wa Kishoni. Nebo ndaakweenda, ncakwiila ndaakweenda cankusu.

²² Lyalo minkiti ya maaki akalinga kucica yakanyumfwika Akalinga kwisa butambala abuumbi cakwaamba ayi inshi keelila.

²³ Munjelo wa Mwaami Lesa wakaamba ayi, ‘Amushingane Melosi abantu bekalaamo. Tabakwe kwisa mukucafwa Mwaami Lesa kulwana balwani bakwe beshinkusu.’

²⁴ “Jaelo mukaakwe Eba mwine Keni, abe acoolwe kwiinda banakashinyina boonse. Abe acoolwe kwiinda banakashinyina boonse bekala mumatente.

²⁵ Sisela wakasenga maanshi, sombi wakamupa mukupa, Wakamuletela mandili mumbale ifongomene ya bwaami.

²⁶ Wakabwesa mpoopo ya tente alyaansa lyacipiko, lyaansa lyakwe lyalulyo lyakabwesa nsando. Wakapwaya mutwi wakwe Sisela ansando iyo. Wakayasa akunyonyoola kapobe ka mutwi wakwe.

²⁷ Sisela wakafukama akuwa. Wakawita kumyeendo ya mwanakashi uyo. Ee kumyeendo yakwe wakafukama akuwa. Peenka apo wakatuntumana watula moyo.

²⁸ “Banyina Sisela bakasondela pambwelyo Bakacenceenta pamusena uyo akwaamba ayi, ‘Ceebonshi cikoci cakwe cacelwa kwisa? Ino shikoci shakwe shacelwa buyani kupola sunu?’

²⁹ Banakashi bakwe basongo bakamukumbula, alakwe mwiine wakalinga kulyaamboosha ayi,

³⁰ ‘Sa tabatokwaabana shintu nshibasaala? Sa te shilumamba womwi awomwi utoobwesa mwanakashi womwi nabi bobilo? Ee batoosalweeta Sisela shakufwala shibotu. Batoosaloola shakufwala shibotu shakaboteshekwa, shakufwala shibotu shakaboteshekwa sha munshingo yangu.’

³¹ “NoBaami baLesa, balwani banu boonse abalobe, sombi abo bamusuni babe anga ndisuba liswa cankusu.” Lyalo mucishi cabo mwakaba luumuno kwamyaaka makumi one.