Boomboloshi 4 - Baibo Busansulushi Bwa Libuku Ili

Debola aBalaki

¹ Ciindi Eyudi ndyaakafwa, bene Isilaeli bakabisha pameenso a Mwaami Lesa alimwi.

² Aboobo Mwaami Lesa wakabaaba mumaansa akwe Jabini mwaami wa bene Kenani wakalinga kulela muAsoli. Mutanjilili wa bashilumamba bakwe wakalinga kwiitwa ayi Sisela. Sisela wakalinga kwikala mundabala ya Alosheti Agoyimu.

³ Mwaami Jabini uyo wakalinga kucite shikoci sha nshimbi shili 900 alimwi wakalinga kweendelesha bene Isilaeli calunkutwe kwamyaaka makumi obilo. Paceebo ceeci bene Isilaeli bakalilila Mwaami Lesa ayi abacaafwe.

⁴ Muciindi ico Debola mulaluki mukaakwe Lapidoti ngowakalinga moomboloshi wa bene Isilaeli.

⁵ Debola wakalinga koomboloshesha munshaakapukupuku ka Debola pakati ka ndabala ya Lama aya Betelo mucishi ca tulundu ca Efuleemu. Bene Isilaeli nkobakalinga kuya uko mukupingulwa.

⁶ Bumwi bushiku Debola wakatuma nkombe kuli Balaki mwanaakwe Abinoamu uyo wakalinga kwikala kuKedeshi mucishi ca bene Nafutali. Mpeeke wakamulwiita ayi, “Mwaami Lesa, Lesa wa bene Isilaeli waamba ayi, ‘Koya kuKalundu ka Tabo abasankwa bali 10,000 kuswa kumukowa wakwe Nafutali awakwe Sebuluni.

⁷ Kuswawaawo ndaakulengesha Sisela mutanjilili wa bashilumamba bakwe Jabini kwisa mukukulwana kuMulonga wa Kishoni. Sisela ulaakunoocite shikoci abashilumamba bakwe, sombi ndaakumwaaba mumaansaako.’ ”

⁸ Lyalo Balaki wakakumbula ayi, “Na awebo ulaakuya anebo, ingayi ndaakuya. Ono na ukabule kuya, ingayi anebo teshi nkayeeko.”

⁹ Alakwe Debola wakakumbula ayi, “Ee tulaakuya soonse, sombi teshi kukalumbaishikwe ndiwe ayi wamukoma, ceebo Mwaami Lesa ulaakwaaba Sisela mumaansa a mwanakashi.” Mpomunyaawo Debola wakanyamuka akuya pantu pomwi aBalaki kuKedeshi.

¹⁰ Lyalo Balaki wakatumina nkombe mukowa wakwe Sebuluni awakwe Nafutali kwaamba ayi bayaakwe kuKedeshi. Basankwa bakamukonkela bakalinga 10,000. Debola alakwe wakayaakwe.

¹¹ Muciindi ico Eba mwine Keni wakashiya bene Keninyina bamulunyungu lwakwe Obabu mulamu wakwe Mose. Wakaya mukuyaka misumba yakwe kufwaafwi aKedeshi pafwaafwi amubanga wa kuSananimu.

¹² Ono Sisela ndyaakaambilwa ayi Balaki uli kuKalundu ka Tabo,

¹³ Wakeeta bashilumamba balwanina mushikoci shakwe sha nshimbi shili 900 abashilumamba bakwe bamwi boonse kuswa kuAlosheti Agoyimu akuya kuMulonga wa Kishoni.

¹⁴ Mpomunyaawo Debola wakaambila Balaki ayi, “Nyamuka, koya ceebo sunu mbobushiku Mwaami Lesa mbwaaba Sisela mumaansaako. Ncakwiila Mwaami Lesa utookutanjilila.” Aboobo Balaki wakakunkuluka kuswa paKalundu ka Tabo abashilumamba bakwe bali 10,000.

¹⁵ Lyalo Mwaami Lesa wakapilinganya Sisela, bashilumamba balwanina mushikoci alimwi abashilumamba bakwe bamwi boonse akubakoma. Mpomunyaawo Sisela wakasotoka kuswa mucikoci cakwe akucica.

¹⁶ Balaki lakwe wakatandaanya bashilumamba balwanina mushikoci abashilumamba bamwi boonse kuya mukushika kuAlosheti Agoyimu. Bashilumamba bakwe Sisela bakacaikwa boonse cakwaamba ayi taaku wakacaala.

¹⁷ Lyalo Sisela wakacicila kutente yakwe Jaelo mukaakwe Eba mwine Keni ceebo Jabini mwaami wa kuAsoli wakalinga kunyumfwana abamumukowa wakwe Eba mwine Keni.

¹⁸ Jaelo wakaswa akuya mukucingweeta Sisela akumwaambila ayi, “Amunjile nkambo, mutaloondi sobwe.” Aboobo wakenjila mutente alakwe Jaelo wakamufwekelesha.

¹⁹ Mpeeke Sisela wakaambila mwanakashi uyo ayi, “Mpewo maanshi nwe, ndafwa nyotwa.” Mwanakashi uyo wakacalula nkomwe ya cipaya mwakalinga mukupa, akumupa ayi anwe. Lyalo wakamufwekelesha alimwi.

²⁰ Kuswawaawo Sisela wakamwaambila ayi, “Wiimikane pamwinjililo wa tente. Ono na kwise muntu weshi eepushe ayi, ‘Sa kwesawo muntu kuno?’ umukumbule ayi, ‘Tau.’ ”

²¹ Mpomunyaawo Sisela wakoona ceebo cakulema. Sombi Jaelo mukaakwe Eba wakabwesa mpoopo ya kutente ansando akuya kuli Sisela kaya bubendelela. Mpeeke wakamupopa mpoopo pakapobe kumutwi kushikila yapila panshi, lyalo wakafwa.

²² Ono Balaki ndyaakesa, kwisa bukonkela Sisela, Jaelo wakamucinsha kunshila akumwaambila ayi, “Kwesa kuno, nkutondeshe muntu ngootooya bulangoola” Lyalo wakenjila akucana Sisela ulituntumene. Wakafwa ampoopo keepopetwe mumutwi.

²³ Bushiku ubo Lesa wakacafwa bene Isilaeli kukoma Jabini mwaami wa kuKenani.

²⁴ Bene Isilaeli bakalwana Jabini mwaami uyo wa bene Kenani cakutaboolawo pesule kushikila bamunyonyoola.