Boomboloshi 3 - Baibo Busansulushi Bwa Libuku Ili

Mishobo yakacaala mucishi ca Kenani

¹ Ncakwiila Mwaami Lesa wakashiyamo mishobo imwi mukwaamba ayi eeleshe bene Isilaeli abo batakwe kulwanawo nkondo kuKenani.

² Mwaami Lesa wakalinga kusuni kwiisha bamulunyungu lwa bene Isilaeli boonse kulwana nkondo, bunene bunene abo batana kulwanawo kale.

³ Mishobo yakalinga yacaala mucishi njeeyi. Baami bosanwe ba bene Filisiti, bene Kenani boonse, bene Sidoni, bene Ifi abo bakalinga kwikala kutulundu twa Lebanoni, kuswa kuKalundu ka Baali Emoni kushika mumwinjililo wa kuAmati.

⁴ Ncaakabalekela nkwaamba ayi abone na bene Isilaeli inga bakonkela milawo Mwaami Lesa njaakapa bamashali babo bakulukulu kwiinda muli Mose.

⁵ Aboobo bene Isilaeli bakekala pantu pomwi abene Kenani, bene Iti, bene Amoli, bene Pelisi, bene Ifi alimwi abene Jebusi.

⁶ Lyalo bene Isilaeli bakatalika kweebana amishobo iyo alimwi akulambila balesa babo.

Otiniyelo

⁷ Anu bene Isilaeli bakabisha pameenso a Mwaami Lesa, Lesa wabo. Bakamulubaako akutalika kulambila baBaali abaAshela.

⁸ Aboobo Mwaami Lesa wakakalalila bene Isilaeli akubaaba mumaansa a mwaami Kushani Lishataimu wa kuMesopotamya, uyo bene Isilaeli ngobakasebensela myaaka yosanwe ayotatwe.

⁹ Lyalo bene Isilaeli ndibakalilila Mwaami Lesa, wakabapa muntu uyo wakabafuna. Wakalinga kwiitwa ayi Otiniyelo mwanaakwe Kenasi mukwabo Kalebu.

¹⁰ Mushimu wa Mwaami Lesa wakesa pali nguwe. Aboobo wakaba moomboloshi wa bene Isilaeli akubatanjilila kuya kunkondo. Mpeeke Mwaami Lesa wakaaba Kushani Lishataimu mwaami wa kuMesopotamya mumaansa akwe Otiniyelo wamukoma.

¹¹ Lyalo mucishi cabo mwakaba luumuno kwamyaaka makumi one kushikila ciindi Otiniyelo mwanaakwe Kenasi ndyaakafwa.

Eyudi

¹² Ono bene Isilaeli bakabisha pameenso a Mwaami Lesa alimwi. Aboobo Mwaami Lesa wakalengesha Egiloni mwaami wa kuMoabu ayi eendeewo nkusu pali mbabo.

¹³ Lyalo wakapaankana abene Amoli alimwi abene Ameleki akulwana bene Isilaeli. Bakakoma bene Isilaeli akubwesa Jeliko, ndabala yabo inene ya tupukupuku.

¹⁴ Kuswawaawo bene Isilaeli bakasebensela Egiloni mwaami wa kuMoabu myaaka ili likumi amyaaka yosanwe ayotatwe.

¹⁵ Sombi bene Isilaeli ndibakalilila Mwaami Lesa, wakabapa muntu wakabafuna. Wakalinga kwiitwa ayi Eyudi mwanaakwe Gela wa mumukowa wakwe Benjameni uyo wakalinga kusebensesha cipiko. Bene Isilaeli bakapa Eyudi musonko ayi atolele mwaami Egiloni wa kuMoabu.

¹⁶ Mpomunyaawo Eyudi wakafula mupeeni wakalinga kukolete koonse koonse uyo wakalinga kulaampa masentimita ali 50 akuukwilika kuunshi lya shakufwala shakwe kulibelo lyalulyo.

¹⁷ Mpeeke wakatola musonko uyo kuli Egiloni mwaami wa kuMoabu. Mwaami uyo wakalinga kwiinite abuumbi.

¹⁸ Ono Eyudi ndyaakamana kupa musonko uyo, wakashindikila bantu bakalinga kunyamwite musonko ayi banooya.

¹⁹ Sombi lakwe wakaboolela kumabwe abesetwe kuGilugala akuya kumwaami Egiloni akwaamba ayi, “Nobaami, ndicite makani abushishi akumwaambila.” Mpomunyaawo mwaami wakaambila basebenshi bakwe ayi, “Amuswe, mutushiye sweenka.” Abalo bakaswa.

²⁰ Ono mwaami ndyaakekala eenka mucipinda cakwe citontola ca peculu, Eyudi wakaya kuli nguwe akwaamba ayi, “Nobaami, ndicite makani akaswa kuli Lesa akumwaambila.” Mwaami uyo ndyaakanyumfwa boobo, wakanyamuka.

²¹ Mpomunyaawo Eyudi wakakusha mupeeni alyaansa lyakwe lyacipiko kuswa kulibelo lyakwe lyalulyo akuyasa mwaami mulifumo.

²² Mupeeni wakapila woonse akupulila kwisule. Eyudi taakwe kuukwelaamo, mpeeke mafuta akaufwekelesha.

²³ Kuswawaawo Eyudi wakaswita pansengwe akucala shisasa sha cipinda ca peculu akupingaako.

²⁴ Ono ingayi asweewobo, basebenshi ba mwaami bakesa akucana kwaamba ayi kulipingitwe. Lyalo balo bakayeeya ayi mpashi mwaami utoolicafwa.

²⁵ Anu bakalindilila kushikila baba acaanka. Ndibakabona kwaamba ayi tatoocalulaako, bakapingululaako akucana mwaami wabo ulikampeme panshi wafwa.

²⁶ Ciindi ici ncebakalinga kulindilila, Eyudi wakaloboka. Wakeendila kumabwe abesetwe akulobokela kuSeila.

²⁷ Ono ndyaakashika kucishi ca tulundu ca Efuleemu, wakalisha lupeenga kwiita bene Isilaeli ayi baye mukulwana. Lyalo wakabatanjilila kukunkuluka tulundu.

²⁸ Mpeeke wakabaambila ayi, “Amunkonkele ceebo Mwaami Lesa waaba kale balwani banu bene Moabu mumaansaanu.” Bene Isilaeli bakamukonkela akuya mukushinkilila pamisena yakusubukila Mulonga wa Joodani pakuya kuMoabu. Lyalo taaku mwine Moabu wakakonsha kusubuka.

²⁹ Bushiku ubo bakacaya bene Moabu mpashi bali 10,000. Bantu abo bakacaikwa, mbantu bakalinga kucite nkusu abuumbi, alimwi taaku nabi womwi wakakonsha kucica.

³⁰ Bushiku ubo bene Isilaeli bakakoma bene Moabu. Lyalo mucishi cabo mwakaba luumuno kwamyaaka makumi osanwe aotatwe.

Shamuga

³¹ Ono moomboloshi wakaboolaawo Eyudi ndyaakafwa wakalinga kwiitwa ayi Shamuga mwanaakwe Anati. Musankwa uyo wakacaya bene Filisiti bali 600 kucakuculumishishako ŋombe. Alakwe mbwaakafuna bene Isilaeli ubo.