Boomboloshi 21 - Baibo Busansulushi Bwa Libuku Ili

Bamumukowa wakwe Benjameni bakacaala mbobakacaninwa banakashi

¹ Bene Isilaeli ndibakabungana kuMisipa bakashomesha cakulumbila kuMwaami Lesa ayi, “Taaku nabi womwi pakati kesu uyo weshi akeebeshe mwanaakwe kumwine Benjameni.”

² Mpeeke bene Isilaeli bakaboolela kuBetelo akwikala kunembo lya Mwaami Lesa kushika macolesha kabalila cakooloma alimwi cabuumba bunene.

³ Bakalinga kwaamba ayi, “NoBaami baLesa, baLesa ba bene Isilaeli, ceebonshi mukowa womwi pamikowa ya bene Isilaeli utooyanda kuloba?”

⁴ Mpeeke bushiku bwakaboolaawo bantu bakafuma kuyaka cipaililo akubenga milambu yakutenta alimwi aya bwanabwankashi.

⁵ Kuswawaawo bene Isilaeli bakeepushanya ayi, “Sa kuli likoto pakati ka mikowa ya bene Isilaeli litakwe kubungana kunembo lya Mwaami Lesa kuMisipa?” KuMisipa uko bakashomesha cakulumbila ayi muntu uli woonse utakwe kwisa kulibungano ilyo, ulyeelete kucaikwa.

⁶ Lyalo bene Isilaeli bakafwita nkumbu bene Benjameni bamakwababo akwaamba ayi, “Sunu mukowa womwi wakushikwaamo muIsilaeli.

⁷ Ino tutoocita buyani kwaamba ayi tubacanine banakashi bakweeba basankwa abo bacaala? Twakashomesha cakulumbila kuMwaami Lesa kwaamba ayi teshi tukeebesheko bana besu.”

⁸ Mpomunyaawo bakeepusha ayi, “Ino ndikotonshi pakati ka bene Isilaeli litakwe kubungana kunembo lya Mwaami Lesa kuMisipa?” Lyalo bakacana kwaamba ayi taaku nabi womwi wa kuJabeshi Gilyadi wakalingaako.

⁹ Bakabona boobo mukwiinga ndibakalinga kubelenga bashilumamba, cakacanika kwaamba ayi tepakalinga nabi womwi wa kuJabeshi Gilyadi.

¹⁰ Aboobo libungano lyakatumako bashilumamba bali 12,000 akubaambila ayi, “Kamuya mukacaaye bantu boonse ba kuJabeshi Gilyadi, kutashiyako banakashi nabi baana.

¹¹ Muye mucaye basankwa boonse alimwi abanakashi bakakumanaawo kale abasankwa.”

¹² Pabantu ba kuJabeshi Gilyadi, banakashi mbobakacana abo batana kukumanaawo kale abasankwa bakalinga 400. Mpeeke bakabatola kumisumba ya kuShilo, ndabala ili mucishi ca Kenani.

¹³ Mpeeke libungano lyoonse lyakatumya nkombe kubene Benjameni balya bakalinga kwikala kumwaandami wa Limoni kubalwiita ayi inkondo yamana.

¹⁴ Aboobo bene Benjameni bakapiluka. Lyalo bene Isilaeli bakababaanya banakashi balya batakwe kucaikwa kuJabeshi Gilyadi. Nakubi boobo bakayaila.

¹⁵ Bene Isilaeli bakanyumfwila nkumbu bene Benjameni ceebo Mwaami Lesa wakabapansaanya kubene Isilaelinyinaabo.

¹⁶ Lyalo bamaloba ba libungano lilya bakaamba ayi, “Ono bulya banakashi bene Benjameni mbobamana kufwa, tutoobacana kuli beshibeebwe kubasankwa aba bayaila?

¹⁷ Bene Benjameni bacaala balyeelete kuba abamulunyungu kwaamba ayi mukowa wabo utakaloobi.

¹⁸ Tatukoonshi kweebesha bana besu kuli mbabo ceebo twakashomesha cakulumbila ayi, ‘Aakashinganwe uyo woonse weshi akeebeshe mwanaakwe kumwine Benjameni.’ ”

¹⁹ Mpomunyaawo bakeebaluka ayi, “Te kuli kusekelela kucitika myaaka yoonse kwa Mwaami Lesa kuShilo?” Ono ndabala ya Shilo yakalinga kumatwa a Betelo, kumalenge a Lebona akwicwe lya mukwakwa uswa kuBetelo kuya kuShekemu.

²⁰ Lyalo bakaambila bene Benjameni ayi, “Kamuya muyube mumyuunda ya minyansa

²¹ akulindilila. Ono na bamyooye ba kuShilo bese mukushana pakusekelela, muyubuluke cakufwambaana mumyuunda ya minyansa akulicatila mwanakashi wa kuShilo akumutola kucishi canu.

²² Ono na bamaishiwabo nabi bamanandumishabo baakwisa mukututongookila, tulaakubakumbula ayi, ‘Amutunyumfwile nkumbu kwiinda mukutusuminisha kubatola ceebo tatukwe kubacanina banakashi ciindi ca nkondo ya kuJabeshi Gilyadi. Mwebo tamucite mulandu tau, ceebo teshi ndimwe mwakeebesha bana banu kubene Benjameni.’ ”

²³ Lyalo bene Benjameni bakacita bweenka ubo. Basankwa abo bakalicatila mwanakashi wakweeba pabanakashi abo bakalinga kushana. Lyalo bakaboolela kumishaabo kuya mukuyakulula mandabalaabo akwikalaamo.

²⁴ Paciindi ceenka ico bene Isilaeli bakaswaako kulya akuboolela womwi awomwi kumishaabo, nkokwaamba ayi kumukowa, kucipani, ncakwiila kucipansha cakwe ca cishi.

²⁵ Paciindi ico tekwakalingawo mwaami muIsilaeli. Aboobo muntu uli woonse wakalinga kucita kweelana ambwaasuni.