Boomboloshi 20 - Baibo Busansulushi Bwa Libuku Ili

Bene Isilaeli mbobakalibambila kuya mukulwana

¹ Mpomunyaawo bene Isilaeli boonse bakabungana kuswa mushishi shoonse, nkokwaamba ayi kuswa kuDani kuya mukushika kuBiyasheba alimwi akucishi ca Gilyadi. Bakabungana mbuli muntu womwi kunembo lya Mwaami Lesa kuMisipa.

² Bamatanjilili ba mikowa yoonse ya bene Isilaeli bakesa mukubungana pantu pomwi abantu bakwe Lesa bamwi. Kwakalinga bashilumamba bali 400,000 ba panshi balwanisha mipeeni.

³ Paciindi ceenka ico bene Benjameni bakanyumfwa ayi bene Isilaeli bamwi bali kuMisipa. Mpeeke bene Isilaeli bakeepusha mwine Lefi ulya ayi, “Tulwiite cintu ici cilensha nsoni mbocakacitika.”

⁴ Lyalo mwine Lefi, ibaye kasuwa uyo wakacaikwa, wakakumbula ayi, “Ndakashika akasuwa wangu kuGibiya mucishi ca bene Benjameni kwaamba ayi toonene nkuko.

⁵ Mpeeke bantu ba kuGibiya bakesa akushinguluka ŋanda mondakalinga mashiku. Bakalinga kusuni kuncaya. Ono ndibakaalilwa, bakacata kasuwa wangu akukumanaakwe cakumukakatisha kushikila wafwa.

⁶ Mpeeke ndakabwesa mubili wakwe akuutimboola mushipanshapansha isho nshendakatumina mikowa ili likumi ayobilo ya bene Isilaeli. Ndakacita boobo mukwiinga bantu aba bakacita cintu cibiibi, cilensha nsoni mucishi cino ca Isilaeli.

⁷ Ono mwebo nobene Isilaeli noonse nomuli waano mutooyeeya buyani pacikani ici?”

⁸ Mpomunyaawo bantu boonse bakanyamukila pomwi akwaamba ayi, “Taaku nabi womwi pakati kesu weshi aboolele kumishaabo.

⁹ Ono mbweshi tucite mbulya. Tutokuuma cisolo kwaamba ayi tubone beshi baye mukulwana Gibiya.

¹⁰ Kumikowa yoonse ya bene Isilaeli tunanoobwesa walikumi kwaamba ayi banoopa bashilumamba shakulya. Lyalo likoto lya bashilumamba lyaakushika kuGibiya mucishi ca bene Benjameni, balaakuboosha cishole ceebo cakucita cintu cilensha nsoni mucishi ca Isilaeli.”

¹¹ Aboobo bashilumamba boonse bakabungana pantu pomwi kwaamba ayi balwane ndabala inene iyo.

¹² Lyalo mikowa ya bene Isilaeli yakatuma beshinkombe mucishi coonse ca bene Benjameni mukubeepusha ayi, “Ino cintu cilensha nsoni ca mushobo uyu inga cacitika buyani pakati kanu?

¹³ Amwaabe bene Gibiya abo babiibi mumaanseesu kwaamba ayi tubacaaye akukusha malwesa aya mucishi ca Isilaeli. Sombi bene Benjameni bakakaka kunyumfwila bene Isilaelinyinaabo.”

¹⁴ Mpeeke bene Benjameni bakaswa mumandabala abo anene oonse akuya kuGibiya ayi bakalwane bene Isilaelinyinaabo.

¹⁵ Bushiku ubu bene Benjameni bakabunganya bashilumamba bali 26,000 beshikulwanisha mipeeni. Kwakalinga abamwi bashilumamba abo bakasalwa kuswa muGibiya bali 700.

¹⁶ Pakati ka likoto ili lya bashilumamba pakalinga beshicipiko bali 700 abo bakalinga kukonsha kufusa mabwe ashipaya shakuwaalisha mabwe akuuma nabibo mususu cakuteenshaawo.

¹⁷ Lyalo bene Isilaeli boonse kukushakobo bene Benjameni bakabunganya bashilumamba bali 400,000 beshikulwanisha mipeeni.

Bene Isilaeli mbobakalwana bene Benjameni

¹⁸ Mpomunyaawo bene Isilaeli bakanyamuka baya kuBetelo mukwiipusha Lesa ayi, “Ino mbaani pakati kesu beshi bataanguneko kulwana bene Benjameni?” Ono Mwaami Lesa wakabakumbula ayi, “Bene Juda mbweshi bataangune kuya.”

¹⁹ Bushiku bwakaboolaawo macuunsa bene Isilaeli bakabuka akuya mukuyaka misumba yabo pafwaafwi aGibiya.

²⁰ Kuswawaawo bakaya mukulwana bene Benjameni. Lyalo bene Isilaeli bakabika bashilumamba babo kumusena ulangite kuGibiya.

²¹ Bushiku ubo bene Benjameni bakaswa kuGibiya akucaya bashilumamba bene Isilaelinyinaabo bali 22,000.

^22-23 Lyalo bene Isilaeli bakaya mukulilila Mwaami Lesa kushika macolesha. Bakeepusha Mwaami Lesa ayi, “Sa tuboolele mukulwana bene Benjameni nakubi kwaamba ayi mbamakwabesu?” Mwaami Lesa wakabakumbula ayi, “Ee, kamuya mukabalwaane.” Mpeeke bene Isilaeli bakayuminishanya akubika bashilumamba babo alimwi kumusena weenka ngobakalingaako kataanshi.

²⁴ Aboobo bene Isilaeli bakaya babalwana alimwi.

²⁵ Abalo bene Benjameni bakaswa kuGibiya mukulwanaabo akucaya bashilumamba bene Isilaeli bali 18,000 beshikulwanisha amipeeni.

²⁶ Mpomunyaawo bene Isilaeli boonse, nkokwaamba ayi bashilumamba boonse bakaboolela kuBetelo alimwi kuya mukulilila Mwaami Lesa. Bushiku ubo bakalikasha kulya kushikila macolesha. Bakabenga milambu yakutenta aya bwanabwankashi.

^27-28 Ono libokoshi lya cipangano ca Mwaami Lesa lyakalinga kuBetelo munshiku isho. Fineyasi mwanaakwe Eliyasa, mwishikulu wakwe Aloni ngowakalinga kulilama. Lyalo bene Isilaeli bakeepusha Mwaami Lesa ayi, “Sa tuboolele mukulwana bene Benjameni nakubi kwaamba ayi mbamakwabesu na tucilekebo?” Mwaami Lesa wakabakumbula ayi, “Amuyebo ceebo ciilo ndaakumulengesha kubakoma.”

²⁹ Aboobo bene Isilaeli bamwi bakayuba kushinguluka ndabala inene ya Gibiya.

³⁰ Pabushiku bwatatu bakaya mukulwana bene Benjameni akubika bashilumamba babo bamwi kabalangite kuGibiya bweenka mbuli kataanshi.

³¹ Ono bene Benjameni ndibakaya mukulwanaabo, bakaya kulaale abuumbi andabala yabo. Bweenka mbuli lyoonse bakatalika kulwana akucayawo bene Isilaeli. Bakacaya bashilumamba bali 30 mumukwakwa wakalinga kuya kuBetelo amumukwakwa wakalinga kuya kuGibiya alimwi amuluundu loonse lwa kokulya.

³² Mpeeke bene Benjameni bakaamba ayi, “Tutoobakoma kweelana ambotubakoma nshiku shoonse.” Sombi abalo bene Isilaeli bakaamba ayi, “Atucicile palaaleeko kwaamba ayi baye kumikwakwa kutalamukite andabala yabo.”

³³ Ono ndibakashika kuBaali Tama bene Isilaeli abo bakalinga kucica bakeemikana. Mpomunyaawo bene Isilaeli balya bakalinga kuyubite bakayubuluka kumbo lya kuGibiya.

³⁴ Bashilumamba bali 10,000 abo bakasalwa pabene Isilaeli boonse bakaya mukulwana ndabala ya Gibiya. Aboobo kwakaba yakasuko. Paciindi ico bene Benjameni tabakwe kwishiba ayi kunyonyoolwa kulibo muliimfwa.

³⁵ Mpomunyaawo Mwaami Lesa wakakoma bene Benjameni kunembo lya bene Isilaeli. Bushiku ubo bene Isilaeli bakacaya balwani babo bali 25,100 balwanisha mipeeni.

³⁶ Lyalo bene Benjameni bakabona kwaamba ayi bakomwa. Ono bene Isilaeli bakabeca kucica kuswa kubene Benjameni ceebo bakalinga kucinkite manungo mubabyaabo abo bakalinga kuyubite kuGibiya.

Bene Isilaeli mbobakakoma bene Benjameni

³⁷ Mpeeke bantu abo bakalinga kuyubite bakayubuluka akumwaikila mundabala inene akutalika kulwana. Bakacaya bantu boonse bakalingaamo.

³⁸ Bene Isilaeli abo bakalinga kucica bakapangana abaabo bakalinga kuyubite ayi, “Na babone bwiishi kabusunta kuya mwiculu mundabala iyo,

³⁹ abo bakalinga kucica balyeelete kuboolela akuya mukulwana.” Bene Benjameni bakacaya bene Isilaeli bali 30 akwaamba ayi, “Ncakwiila, tutoobakoma kweelana ambotubakoma nshiku shoonse.”

⁴⁰ Ono bwiishi bwa keshibilo ndibwakasunta kuya mwiculu, Bene Benjameni bakacebukila mwisule akubona kwaamba ayi ndabala inene yoonse yapya.

⁴¹ Mpomunyaawo bene Isilaeli abo bakalinga kucica bakapiluluka akutalika kulwana. Aboobo bene Benjameni bakaloonda abuumbi ceebo bakabona calushinisho ayi kunyonyoolwa kwabo kwashikila.

⁴² Lyalo bakacica balulama nshila iya kuluyanga. Sombi abo bakalinga kucica bakabeensha, nakubi boobo bakabacaya mbene Isilaeli abo bakalinga kuswa mundabala yabo.

⁴³ Bene Isilaeli bakataatisha bene Benjameni, babatandaanya akubamaninabo limwi kubacaya cakutabafwitawo nkumbu tibili akwicwe lya Gibiya.

⁴⁴ Bene Benjameni bakacaikwa bakalinga 18,000. Boonse abo bakalinga bashilumamba beendaawo kucishiba kulwana.

⁴⁵ Lyalo bakacaalaawo bakalulama kumwaandami wa Limoni, sombi bali 5,000 bakacaikwa mumikwakwa. Bene Isilaeli bakatolelela kubatandaanya kushikila akuGidomu uko nkobakacailawo bali 2,000.

⁴⁶ Anu bene Benjameni bakacaikwa bushiku ubo bakalinga 25,000. Boonse aba bakalinga mbashilumamba beendaawo kucishiba kulwana.

⁴⁷ Sombi bali 600 balo bakacicila kumwaandami wa Limoni muluyanga uko nkobakekala myeenshi yone.

⁴⁸ Kuswawaawo bene Isilaeli bakaboolela kuya mukulwana abene Benjameni bamwi bakacaala mucishi cabo. Bakabacaya boonse, pantu pomwi ashifubwa shabo akunyonyoola shintu shoonse nshebakalinga kucana. Mandabala oonse mucishi ico bakaatenta.