Boomboloshi 2 - Baibo Busansulushi Bwa Libuku Ili

Munjelo wa mwaami Lesa mbwaakashika kuBokimu

¹ Mpeeke munjelo wa Mwaami Lesa wakaswa kuGilugala akuya kuBokimu uko nkwaakaya mukwaambila bene Isilaeli ayi, “Ndakamukusha kuIjipiti akumuleta mucishi ncendakashomesha bamashali banu bakulukulu. Ndakaamba alimwi ayi, ‘Teshi nkapwaaye cipangano ncendakapanga amwebo.

² Amwebo tamweelete kupanga cipangano abantu ba momuno. Mulyeelete kupwaya shipaililo shabo.’ Sombi mwebo tamukwe kunyumfwila mulawo wangu. Ino mwacitilaanshi bobulya?

³ Ono ntoomulwiita ayi bantu aba teshi mbataandeemo, sobwe. Balaakuba balwani banu alimwi balesa babo balaakuba anga ntoose kuli ndimwe.”

⁴ Mpeeke munjelo uyo ndyaakamana kwaamba maswi ayo kubene Isilaeli, bantu boonse bakalila cakoolobesha.

⁵ Lyalo musena uyo bakautumba ayi Bokimu, nkokwaamba ayi abo balila. Mpeeke bakabenga milambu kuMwaami Lesa uko kweenka.

Kufwa lwakwe Joshuwa

⁶ Ono Joshuwa ndyaakamana kupalanganya bantu, bene Isilaeli bakaya womwi awomwi mukubwesa cipansha ca cishi ca mukowa wakwe.

⁷ Lyalo bantu bakasebensela Mwaami Lesa munshiku shakwe Joshuwa shoonse amunshiku sha bamaloba boonse abo bakatolelela kwikala Joshuwa ndyaakafwa. Nkokwaamba ayi boonse abo bakabona shaankamiko isho Mwaami Lesa nshaakacitila bene Isilaeli.

⁸ Ono Joshuwa mwanaakwe Nani musebenshi wa Mwaami Lesa wakafwa kacite myaaka ili 110.

⁹ Wakabikwa mucipansha ca cishi ca mukowa wakwe kuTimunati Sela, mucishi ca tulundu ca Efuleemu kumatwa a Kalundu ka Gaashi.

¹⁰ Ono bamulishalane ili lyoonse ndibakamana kufwa, kwakesa lishalane limwi ilyo lyatakalinga kwishi Mwaami Lesa anshaakacitila bene Isilaeli.

Bene Isilaeli mbobakacileka kulambila Mwaami Lesa

¹¹ Mpeeke bene Isilaeli bakabisha pameenso a Mwaami Lesa ceebo bakatalika kusebensela baBaali.

¹² Bakasuula Mwaami Lesa, Lesa wa bamashali babo bakulukulu uyo wakabakusha mucishi ca Ijipiti. Bakatalika kulambila balesa ba mishobo iyo yakalinga kubashingulukite. Aboobo bakakalasha Mwaami Lesa.

¹³ Nkokwaamba ayi bakacileka kulambila Mwaami Lesa akutalika kusebensela baBaali abaAshitaloti.

¹⁴ Aboobo Mwaami Lesa wakabaaba mumaansa a beshikusaala, abo bakasaala shintu shabo, akubalwani babo abo bakalinga kubashingulukite cakwaamba ayi bakaalilwa kulifuna.

¹⁵ Anu lyoonse na baya mukulwana, Mwaami Lesa wakalinga kubalengesha kukomwa kweelana ambwaakashomesha. Aboobo bakapenga abuumbi.

¹⁶ Mpomunyaawo Mwaami Lesa wakabapa boomboloshi abo bakabafuna kubeshikusaala abo.

¹⁷ Sombi balo tabakwe kunyumfwila boomboloshi abo. Bene Isilaeli bakacileka kushomeka kuMwaami Lesa mukulambila balesa beensu. Bamashali babo bakulukulu bakalinga kukonkela akunyumfwila milawo ya mwaami Lesa. Sombi balo bakaalilwa kucita boobo.

¹⁸ Anu ciindi coonse Mwaami Lesa ncaakalinga kubapa moomboloshi, Mwaami Lesa wakalinga kumucafwa akufuna bene Isilaeli kubalwani babo ciindi coonse ca buumi bwa moomboloshi uyo. Mwaami Lesa wakalinga kubanyumfwila nkumbu ceebo bakalinga kutongela mumaansa a baabo bakalinga kubapensha akubalyatilila.

¹⁹ Lyalo na moomboloshi uyo wafwa, bakalinga kuboolela kumicito yabo ikulukulu akunoobisha kwiinda bamashali babo bakulukulu. Nkokwaamba ayi bakalinga kulambila akusebensela balesa beensu. Ncakwiila bakakakatila munshila shabo shibiibi mubushicimpamya bwabo.

²⁰ Mpeeke Mwaami Lesa wakakalalila bene Isilaeli akwaamba ayi, “Bantu aba bakaka kukonkela cipangano ncendakapa bamashali babo bakulukulu mukutanyumfwila.

²¹ Aboobo teshi nkabatandilemo mushobo uli woonse wakashiya Joshuwa ndyaakafwa.

²² Anu munshila iyi ndaakubeelesha akubona na balaakunookonkela nshila shangu kweelana abwakalinga kucita bamashali babo bakulukulu.”

²³ Aboobo Mwaami Lesa wakalekela mishobo iyo mucishi ca Kenani. Taakwe kwiitandaamo cakufwambaana mukuyaaba mumaansa akwe Joshuwa.