Boomboloshi 19 - Baibo Busansulushi Bwa Libuku Ili

Mwine Lefi akasuwa wakwe

¹ Munshiku isho tekwakalinga mwaami muIsilaeli. Ono kwakalinga mwine Lefi wakalinga kwikala mucishi ca tulundu ca Efuleemu. Wakasuna mwanakashi wa kuBetileemu mucishi ca Juda ayi abe kasuwa wakwe.

² Bumwi bushiku mwanakashi uyo wakaambana amusankwa mwine Lefi uyo. Lyalo wakaya kuli baishi kuBetileemu mucishi ca Juda uko nkwaakaya mukwikala myeenshi yone.

³ Mpeeke mwine Lefi uyo wakanyamuka wamukonkela kwaamba ayi amukombelele akumuboosha kumishaabo. Wakaya amusebenshi wakwe alimwi ambongolo shobilo. Ono ndyaakashika kulya, mwanakashi uyo wakamwinjisha muŋanda. Abalo bapongoshi bakwe bakamutambula camaansa obilo.

⁴ Baishi mwanakashi bakasenga mukwe wabo ayi ekalekaleeko. Aboobo wakekalako nshiku shotatwe. Nkokwaamba ayi wakalinga kulya akoona kweenka uko.

⁵ Ndibwakaca macuunsacuunsa bushiku bwane bakafuma kulibambila ayi babooleleemo. Sombi baishi mwanakashi bakaambila mukwe wabo ayi, “Tanansha amulye, ndyeshi mucane nkusu shakweenda.”

⁶ Basankwa bobilo abo bakekala balya. Mpeeke bapongoshi bakaambila mukwe wabo ayi, “Sa inga tamoonibo asunu, musangalaleewo?”

⁷ Muntu uyo ndyaakaamba ayi anooya, bapongoshi bakwe bakamukasha, alimwi bushiku ubo wakoona.

⁸ Ndibwakaca pabushiku bwasanu, wakafuma kubuka ayi anooya, sombi bapongoshi bakwe bakamukasha ayi, “Amutaangune mulye, mulaya macolesha.” Aboobo basankwa abo bobilo bakekala balya.

⁹ Ono musankwa uyo, kasuwa wakwe alimwi amusebenshi wakwe ndibakaamba ayi banyamuke, bapongoshi bakwe bakamwaambila ayi, “Bona lisuba lyaya kale, Amoonebo. Kutooshiya onoono, amwikalebo mulisangalashe. Ciilo inga mwafuma kubuka kuya kumishaanu.”

¹⁰ Sombi bushiku ubo musankwa uyo taakwe kusumina koona. Wakanyamuka akulanga kuJebusi, nkokwaamba ayi Jelusalemu. Wakalinga kucite mbongolo shobilo shicite shakwikalaawo. Kasuwa wakwe wakalingaakwe.

¹¹ Ndibakashika pafwaafwi akuJebusi, lisuba lyakalasha. Mpomunyaawo musebenshi wakaambila mwaami wakwe ayi, “Sa inga tatupambukili mundabala ya bene Jebusi kwaamba ayi tukoone mumo?”

¹² Sombi lakwe wakamukumbula ayi, “Tatukoonshi kuya mukoona mundabala ya baswamashi. Atwindililebo tuye kuGibiya.

¹³ Tiya tukoonene kuGibiya nabi kuLama.”

¹⁴ Mpomunyaawo bakeendilila akuya mukushika kuGibiya, mucishi ca bene Benjameni, lisuba ndilyakalinga kwipilabo.

¹⁵ Bakapetukila nkuko kwaamba ayi baye boone. Bakenjila mukati mundabala akuya mukwikala kulubansa lwakupumuninaako, sombi taaku nabi womwi wakabatambula ayi abatole kuŋanda yakwe mukoona.

¹⁶ Ono kabacili waawo kwakapola mucembele musankwa umwi kaaswita kumuunda macolesha. Muntu uyo wakalinga kwikala mucishi ca tulundu ca Efuleemu alimwi wakalinga ngumweensu muGibiya. Bene cishi ico bakalinga mbene Benjameni.

¹⁷ Ono mucembele uyo ndyaakabona mwine Lefi uyo kaashiite mulubansa lwa mundabala wakamwiipusha ayi, “Ino waswita kuli? Alimwi utooya kuli?”

¹⁸ Mwine Lefi uyo wakakumbula ayi, “Twaswita kuBetileemu mucishi ca Juda. Tutooya kulaamfu kucishi ca tulundu ca Efuleemu uko nkotwikala. Ndakalinga ndaya kuBetileemu, ono bulya ntooboolela kumisheesu. Sombi kuno taaku wantambula ayi ngoneeko.

¹⁹ Sobasebenshi banu tulicite kale bwiisu bwa mbongolo shesu alimwi acakulya cesu sobeene, nebo, mwanakashi alimwi amusankwa ngoondi akwe. Tulicite shiyandika shoonse kulekabo kwakoona.”

²⁰ Mpeeke mucembele uyo wakabaambila ayi, “Kuŋanda yangu ndamutambula ayi moone. Ntoomupa lucafwo loonse ndomusuni kwaamba ayi mutooni mulubansa muno.”

²¹ Aboobo wakabatola kuŋanda yakwe akusanina mbongolo shabo. Abalo beensu bakasamba kumyeendo, lyalo wakabapa cakulya.

²² Ono kabacilya akulisangalasha, bakabonabo bantu babiibi bamundabala iyo, bashinguluka ŋanda bakonkoonsha kucisasa akwaambila mucembele mwine ŋanda ayi, “Kusha mweensu wako pansengwe tucitaakwe nkwela.”

²³ Mpeeke mwine ŋanda wakaswita pansengwe akubaambila ayi, “Tau, nobamakwesu, mutaciti cintu cilensha nsoni ca mushobo uyo. Muntu uyo ngumweensu wangu.

²⁴ Nebo ndicite mwaana mooye utana kukumanaawo amusankwa alimwi akasuwa wa mweensu wangu. Ntoomukushisha bulya onoono. Inga mwacitaabo cili coonse ncemusuni. Ono mutaciti cintu cilensha nsoni ca mushobo uyo kumusankwa uyu.”

²⁵ Sombi bantu aba bakakaka kunyumfwila mucembele uyo. Aboobo mwine Lefi uyo wakashindikila kasuwa wakwe pansengwe. Abalo bakakumanaakwe cakumukakatisha mashiku oonse kushikila bwaca. Ono ndikwakatubatubabo bakamuleka.

²⁶ Mwanakashi uyo wakaya mukuwita mumulyango wa ŋanda umo mwakalinga ibaye. Wakekala apo kushikila lisuba lyaswa.

²⁷ Ono ibaye ndyaakabuka, wakacalula cisasa kwaamba ayi atolelele alweendo lwakwe, wakabona kasuwa wakwe kaalete pamulyango, maansa kacite kucisasa.

²⁸ Mpomunyaawo wakamwaambila ayi, “Buka katiya.” Sombi lakwe taakwe kumukumbulaawo, sobwe. Mpeeke wakatantika mubili wakwe pambongolo akutalika lweendo lwakuya kumishaabo.

²⁹ Ono ndyaakashika kumishaabo, wakenjila muŋanda akukusha cibeshi. Lyalo wakatimboola mubili wa kasuwa wakwe uyo mushipansha shili likumi ashobilo, akutuma cipansha comwi acomwi kumukowa womwi awomwi wa bene Isilaeli.

³⁰ Lyalo boonse bakabona makani aya bakaamba ayi, “Ca mushobo uyu tacina kucitikawo kale kuswabo bene Isilaeli ndibakaswa mucishi ca Ijipiti. Atuciyeeye akwishiba ncetweelete kucita pacikani ici.”