Boomboloshi 18 - Baibo Busansulushi Bwa Libuku Ili

Mika amukowa wa bene Dani

¹ Paciindi ico tekwakalinga mwaami muIsilaeli. Bantu ba mumukowa wa bene Dani bakalinga kuyandoola musena wakwikalaako ceebo balo kabatana kuba acipansha cabo mucishi ca bene Isilaeli.

² Mpomunyaawo bene Dani bakatuma basankwa bosanwe bashiite myoyo kuswa kuSola aEshitaoli kwaamba ayi bakasense cishi akubona mbuli mbocibete. Bantu abo bakabaambila ayi, “Kamuya mukasense cishi cilya.” Ono ndibakashika kucishi ca tulundu ca Efuleemu bakapolela kuŋanda yakwe Mika akoonaako bushiku bomwi.

³ Kabacili waawo bakeshiba mulaka wa mwine Lefi uyo akuya mukumwiipusha ayi, “Ino utoocitanshi kuno? Anu ngani wakakuleta kokuno?”

⁴ Lakwe wakakumbula ayi, “Ndicite cipangano aMika. Wakanjisha ncito ya bupailishi.”

⁵ Lyalo bakamwaambila ayi, “Twiipushisheeko kuli Lesa na tutokweenda kabotu mulweendo lwesu ulu.”

⁶ Mupailishi uyo wakabakumbula ayi, “Amuye muluumuno. Mwaami Lesa ulilubwene lweendo lwanu.”

⁷ Basankwa bosanwe abo bakatolelela lweendo lwabo akuya mukushika kuLaishi. Bakacana kwaamba ayi bantu bakokulya bakalinga kwikala muluumuno alimwi kabaliibite bweenka mbuli bakuSidoni. Taaku ncebakalinga kulila, bakalinga babile. Bakalinga kwikala palaamfu abene Sidoni alimwi tebakalinga kunyumfwana abantu bamwi.

⁸ Ono ndibakaboola kumishaabo kuSola aEshitaoli, bene mishaabo bakabeepusha ayi, “Mwakeenda buyani?”

⁹ Mpeeke balo bakakumbula ayi, “Amufwambaane tuye tukalwaane abene Laishi! Ceebo cishi cabo twakacibona ncibotu abuumbi. Mutakalibo, kamuya mukabanyaaye cakutatonshaawo.

¹⁰ Mwashika, mulacana ayi mbantu bashiite cakuliiba. Cishi ico ncinene alimwi Lesa wacaaba kale mumaansaanu. Taaku kantu katamo mucishi ico.”

¹¹ Mpomunyaawo bashilumamba bali 600 ba mumukowa wakwe Dani bakabwesa shakulwanisha shabo akunyamuka kuswa kuSola aEshitaoli.

¹² Bakaya mukuyaka misumba yabo kuKilyati Jeyalimu mucishi ca Juda. Anu musena uyo ncebawiitila ayi Maane Dani, nkokwaamba ayi misumba ya bene Dani. Musena uyo uli kumbo lya Kilyati Jeyalimu.

¹³ Kuswawaawo bakeendelela akuya mukushika kucishi ca tulundu ca Efuleemu akuya mukushikila kuŋanda yakwe Mika.

¹⁴ Mpomunyaawo basankwa bosanwe abo bakalinga mukusensa cishi ca Laishi bakaambila babyaabo ayi, “Sa mulishi kwaamba ayi muŋanda imwi pamaanda aya muli efodi, shibumbwabumbwa shimwi acibumbwabumbwa cakubesa cakananikwa silifa? Ono muleshiba cakucita.”

¹⁵ Aboobo bantu aba bakapetuka akuya pamaanda akwe Mika apo pakalinga kwikala musankwa ulya mwine Lefi. Bakaya bamwaansha ayi banyumfwe mbwaakalinga kubuka.

¹⁶ Ono bashilumamba bene Dani bali 600 kabapakete shakulwanisha bakeemikana pamwinjililo unene.

¹⁷ Paciindi ico balo beshikusensa bosanwe balya bakenjila akubwesa cibumbwabumbwa cakubesa cakananikwa silifa, shibumbwabumbwa shimwi alimwi aefodi. Muciindi ico mupailishi wakalinga kwiimfwi kumwinjililo abashilumamba bali 600 abo bakalinga kupakete shakulwanisha.

¹⁸ Ono bantu aba ndibakenjila muŋanda yakwe Mika akubwesa cibumbwabumbwa cakubesa cakananikwa silifa, shibumbwabumbwa shimwi alimwi aefodi, mupailishi uyo wakabeepusha ayi, “Ino mutoocitanshi bulya?”

¹⁹ Balo bakamukumbula ayi, “Webo umunabo! Utaambi nabi liswi, tiyabo soonse ukabe shikutupandako maano amupailishi wesu. Ncili cibotu kuba mupailishi wa muntu womwi nabi kuba mupailishi wa mukowa womwi ukwene pakati ka mikowa ya bene Isilaeli yoonse?”

²⁰ Ndyaakanyumfwa boobo, mupailishi uyo wakasangalala abuumbi. Mpeeke wabwesa cibumbwabumbwa cakubesa cakananikwa silifa, shibumbwabumbwa shimwi alimwi aefodi akuyaabo.

²¹ Lyalo bakanyamuka akutangishaako banike, shifubwa abuboni bwabo bumwi.

²² Ono ndibakeendako mushinso weelete kuswa kuŋanda yakwe Mika, Mika wakabunganya beshikamukobonyina kuya kunkondo. Lyalo bakakonkela bene Dani akuya mukubacana.

²³ Mpeeke ndibakashika pafwaafwi ambabo, bakoolobesha kubene Dani. Abalo bene Dani ndibakacebuka, bakeepusha Mika ayi, “Ino capensha nciinshi ncewesita abantu baanji bobulya?”

²⁴ Mika wakabakumbula ayi, “Mwantolela balesa bangu mbondakalipangila alimwi mwanyaya amupailishi wangu. Nebo taaku ancemwanshiilaawo. Mwamana mutoonjipusha ayi, ‘Ino cakupensha nciinshi?’ ”

²⁵ Lyalo bene Dani bakamwaambila ayi “Umuna, utabooshiiwo kwaamba alimwi, ceebo bantu aba batookalala. Aboobo webo abamuŋanda yako batoomucaya.”

²⁶ Mpomunyaawo bene Dani abo bakaya, sombi Mika ndyaakabona ayi taakoonshi kubakoma, wakaboolela kumishaabo.

²⁷ Munshila iyo bakatola shintu isho shakapanga Mika pantu pomwi amupailishi wakwe. Bantu abo bakaya mukushika kuLaishi uko kwakalinga bantu bakalinga kushiite cakuliiba. Mpeeke bakamana kubacaya akutenta ndabala yabo.

²⁸ Anu taaku wakabafuna ceebo kwakalinga kulaamfu akuSidoni alimwi tebakalinga kunyumfwana abantu bamwi. Ndabala inene iyo yakalinga mucinyika pafwaafwi akuBeti Lewobu. Lyalo bene Dani bakayakulula ndabala inene iyo akwikalaamo.

²⁹ Ndabala iyo bakeetumba ayi Dani, liina lya mushali wabo mukulukulu uyo wakalinga mwanaakwe Jakobo. Kale kale yakalinga kwiitwa ayi Laishi.

³⁰ Lyalo bene Dani bakeemika cibumbwabumbwa cilya cakubesa cakananikwa silifa. Jonasani mwanaakwe Geshomu, mwishikulu wakwe Mose, ngowakalinga mupailishi wa mukowa wine Dani. Bamulunyungu lwakwe bakalinga kuba bapailishi babo kushikila ciindi ndibakatolwa mucishi cabusha.

³¹ Anu bakalinga kulambila cibumbwabumbwa cakwe Mika ico kwaciindi coonse musena wakulambilaako Lesa ncewakalinga kuShilo.