Boomboloshi 17 - Baibo Busansulushi Bwa Libuku Ili

Shibumbwabumbwa shakwe Mika

¹ Kucishi ca tulundu ca kuEfuleemu kwakalinga muntu wakalinga kwiitwa ayi Mika.

² Bushiku bumwi Mika wakaambila banyina ayi, “Maali a silifa alya ali 1,100 ngomwakeepilwa akushingana wakeepa, ndime ngacite. Ndime ndakaaipa.” Banyina bakamukumbula ayi, “Mwaami Lesa akupe coolwe omwanaangu.”

³ Lyalo wakapilusha maali a silifa ayo oonse kuli banyina. Mpeeke banyina bakaamba ayi, “Kukasha mashingo ngondakashingana kucitika kumwanaangu, ndapa maali a silifa aya nemwiine kuMwaami Lesa. Maali a silifa aya asebenseshekwe kubesa cibumbwabumbwa akucinanika silifa. Aboobo ndakupa maali aya.”

⁴ Nakubi boobo Mika wakapilusha maali ayo kuli banyina. Balo bakabwesaawo maali ali 200 akwaapa shikufula uyo wakabesa cibumbwabumbwa akucinanika silifa. Lyalo cakabikwa muŋanda yakwe Mika.

⁵ Ono Mika uyo wakalinga kucite cipaililo cakwe mwiine. Wakatunga acakufwala ca bupailishi ciitwa ayi efodi akupanga shibumbwabumbwa shimwi. Lyalo wakabika mwanaakwe umwi ayi ngumupailishi.

⁶ Paciindi ico tekwakalingawo mwaami muIsilaeli. Aboobo muntu uli woonse wakalinga kucita kweelana ambwaasuni.

⁷ Ono kwakalinga cikula bwangu umwi mwine Lefi wakalinga kwikala muBetileemu mucishi ca Juda.

⁸ Muntu uyo wakaswa kuBetileemu akuya buyandoola mpweenga wekala. Ono ndyaakalinga kuya bweendeenda wakashika kucishi ca tulundu ca Efuleemu kuŋanda yakwe Mika.

⁹ Lyalo Mika wakamwiipusha ayi, “Ino waswita kuli?” Alakwe wakakumbula ayi, “Ndi mwine Lefi wa kuBetileemu mucishi ca Juda, ntooya buyandoola musena wakwikalaako.”

¹⁰ Mpomunyaawo Mika wakamwaambila ayi, “Kala andime, unompandako maano alimwi akuba mupailishi wangu. Ndanookufolesha maali a silifa ali likumi pamwaaka, akunookupa shakufwala alimwi ashakulya.”

¹¹ Mwine Lefi uyo wakasumina kwikala aMika. Lyalo wakalelwa mbuli umwi wa bana bakwe Mika.

¹² Mpeeke Mika wakabika mwine Lefi uyo mubupailishi akwikalaakwe muŋanda yakwe.

¹³ Kuswawaawo Mika wakaamba ayi, “Ono ndeshiiba kwaamba ayi Mwaami Lesa utoompa coolwe ceebo ndaba amupailishi mwine Lefi.”