Boomboloshi 16 - Baibo Busansulushi Bwa Libuku Ili

Samusoni mbwaakaya kuGasa

¹ Bumwi bushiku Samusoni wakaya kundabala ya Gasa, uko nkwaakabona mwanakashi mufuule. Mwanakashi uyo wakamusuna akukumanaakwe.

² Mpomunyaawo bene Gasa bakaambilwa ayi, “Samusoni wesa, nkwaali.” Lyalo musena uyo bakaushinguluka kabalindilila mashiku oonse kumwinjililo unene wa ndabala. Mashiku bakamubelamina, kabayeeya ayi, “Tulaakumucaya macuunsa bwaakuca.”

³ Sombi lakwe Samusoni wakoona kushikila pakati ka mashiku. Mpeeke wakabuka, wacata shisasa sha kumwinjililo wa ndabala iyo washulila kumwi ashisamu shobilo washibika pacifushi akuya mukutantaasho peculu lya kalundu kali kwicwe lya Ebuloni.

Samusoni aDelila

⁴ Pesule Samusoni wakasuna mwanakashi wa kuCinyika ca Soleki wakalinga kwiitwa ayi Delila.

⁵ Mpeeke bamaami ba bene Filisiti bakesa kuli Delila akumwaambila ayi, “Unyengelele Samusoni, akulwiite ncaabetele muyumu alimwi ambweenga twamukoma. Lyalo inga twamwaanga kwaamba ayi abule nkusu. Na ucite boobo, womwi awomwi pakati kesu ulaakukupa maali a silifa ali 1,100.”

⁶ Aboobo Delila wakeepusha Samusoni ayi, “Amundwiite kuswa nkusu shanu shiinji. Ino na muntu ulisuni kumukoma, inga wamwaanga buyani?”

⁷ Samusoni wakamukumbula ayi “Na ndaangwa ntambo sha shipaya shitontola shosanwe ashobilo, inga ndabula nkusu akubabo bweenka mbuli bantu bamwi boonse.”

⁸ Mpeeke bamaami ba bene Filisiti ndibakanyumfwa boobo, bakaletela Delila ntambo sha shipaya shitontola shosanwe ashobilo isho nshaakamwaangisha.

⁹ Ciindi ici beshikulindilila bakalinga kuyubite muŋanda. Mpomunyaawo Delila wakoolobesha ayi, “BaSamusoni mbaabo bene Filisiti bamunjilila!” Sombi lakwe wakasutoola ntambo isho mbuli busutuka looshi lwapya kumulilo. Aboobo bushishi bwa nkusu shakwe tabukwe kuyubuluka.

¹⁰ Lyalo Delila wakaambila Samusoni ayi, “Mwamboona buluya akuncenjeeka. Ono amundwiite cakufwambaana mbweenga mwaangwa!”

¹¹ Samusoni wakamukumbula ayi, “Na ndaangwa ntambo shipya shitana kusebensaawo, inga ndabula nkusu akubabo bweenka mbuli bantu bamwi boonse.”

¹² Aboobo Delila wakabwesa ntambo shipya, wamwaanga akoolobesha ayi, “BaSamusoni mbaabo bene Filisiti bamunjilila!” Ono basankwa bene Filisiti bakalinga kulindilila muŋanda kabayubite. Sombi Samusoni wakasutoola ntambo isho nshaakaangwa kumaansa anga mbusalu.

¹³ Mpeeke Delila wakaambila Samusoni ayi, “Mwamboona buluya akuncenjeeka alimwi. Ono amundwiite cakufwambaana mbweenga mwaangwa!” Alakwe wakamukumbula ayi, “Na mwangoosa shaandaŋombe shosanwe ashobilo mwamana mushoosele pantu pomwi abusalu bwa kucakutungishako nsalu akushaanga cankusu akasamu, inga ndabuula nkusu akubabo bweenka mbuli bantu bamwi boonse.”

¹⁴ Ono Samusoni ndyaakalinga kulete, Delila wakamoosa shaandaŋombe shosanwe ashobilo pantu pomwi abusalu bwa kucakutungishako nsalu akushaanga cankusu akasamu. Kuswawaawo wakoolobesha ayi, “BaSamusoni mbaabo bene Filisiti bamunjilila!” Sombi lakwe wakabuka, watolelela kasamu ako, cakutungishako nsalu pantu pomwi abusalu boonse.

¹⁵ Lyalo Delila wakamwaambila ayi, “Inga mwaambilanshi ayi mulinsuni kakuli moyo wanu toobete kuli ndime? Ono aba mankanda otatwe kamuncenjeeka kutandwiita kuswita nkusu shanu ishi shiloondesha.”

¹⁶ Ono Delila ndyaakatolelela kwaamba makani aya bushiku abushiku alimwi akumunyengelela, moyo wakwe Samusoni wakatentuka cakuyanda kufwa.

¹⁷ Aboobo Samusoni wakamuyubulwita makani oonse ayi, “Nshina kuceswawo kale misusu ceebo ndakabengwa kuli Lesa ayi mbe muNasili kuswa kukushalwa kwangu. Ono bushiku ndaakuceswa, nkusu shangu shilaakunshiya, lyalo ndaakuba mbuli bantu bamwi boonse.”

¹⁸ Ono Delila ndyaakabona kwaamba ayi wamwaambila bushishi boonse, wakatuma nkombe kubamaami ba bene Filisiti ayi, “Amuse ono ceebo wandwiita bushishi bwakwe boonse.” Mpomunyaawo bamaami ba bene Filisiti bakaya kumwanakashi uyo bakatolelela amaali.

¹⁹ Lyalo wakamufukatisha akumooneka pamabelo akwe akwiita muntu ayi ese amucese shaandaŋombe isho shosanwe ashobilo. Lyalo wakatalika kumuwela ceebo nkusu shakwe shakamushiya.

²⁰ Mpeeke wakoolobesha ayi, “BaSamusoni mbaabo bene Filisiti bamunjilila.” Ono ndyaakashinshimuka, lakwe kaayeeya ayi, “Ntooswita pansengwe nkalipakamune bweenka mbooncita lyoonse.” Lakwe kaateshi kwaamba ayi Mwaami Lesa wamushiya.

²¹ Mpomunyaawo bene Filisiti bakamucata akumutuloola meenso. Bakamutola kuGasa uko nkobakamwaanga ancetani ya bulonse akumupa ncito yakupela shili anga ngamaila muntolongo.

²² Ono misusu yakatalika kulaampa alimwi.

Kufwa kwakwe Samusoni

²³ Mpomunyaawo bamaami ba bene Filisiti bakabungana pantu pomwi kwaamba ayi basekelele akubenga mulambu unene kuli Dagoni lesa wabo, ceebo bakalinga kwaamba ayi, “Ngulesa wesu waaba Samusoni mulwani wesu mumaanseesu.”

^24-25 Ono ciindi ndibakasangalala bakoolobesha ayi, “Amwiite Samusoni ese atusangalasheewo.” Aboobo bakamukusha muntolongo, kwisa mukubasangalasha. Ciindi bantu ndibakabona Samusoni bakalumbaisha lesa wabo. Bakaamba ayi, “Lesa wesu ngowaaba mulwani wesu mumaanseesu, uyo wakanyonyoola cishi cesu akucaya bantu baanji.” Bakamwiimika pakati ka macinko aŋanda ya lesa wabo.

²⁶ Mpeeke Samusoni wakaambila cikula bwangu musankwa wakalinga kumucatite kumaansa ayi, “Mbike mpeenga ndacata macinko ashimpya ŋanda ino kwaamba ayi njaamineeko.”

²⁷ Paciindi ico ŋanda yakwe lesa wabo yakalinga kuswite bantu, basankwa abanakashi. Bamaami ba bene Filisiti boonse bakalingaamo. Peculu lya ŋanda apalo pakalinga basankwa abanakashi bakalinga mpashi 3000 abo bakalinga kweebela Samusoni kaasekana.

²⁸ Mpomunyaawo Samusoni wakapaila kuMwaami Lesa ayi, “NoBaami baLesa, Beshinkusu shoonse, ndamusenga ayi munjuumye kakweelaako kwaamba ayi mbooshe cishole kubene Filisiti ceebo cakutuloola meenso angu oonse.”

²⁹ Lyalo Samusoni wakacata kumacinko obilo a pakati ashimpya ŋanda akwaashindika cankusu, lyaansa lyalulyo kulyomwi alyalo lyacipiko kulimwi.

³⁰ Mpomunyaawo wakoolobesha ayi, “Aamfwite pantu pomwi abene Filisiti!” Mpeeke wakashindika ankusu shakwe shoonse. Ŋanda iyo yakawa akulimba bamaami abantu boonse bakalingaamo. Aboobo bantu mbwaakacaya pakufwa bakeenda baabo mbwaakacaya kaacili muumi.

³¹ Pesule beshikamukowa wakwe abamakwabo boonse bakesa mukumubwesa akuya mukumufukila pakati ka ndabala inene ya Sola aya Eshitaoli mucuumbwe ca baishi ba Manowa. Samusoni wakalinga moomboloshi wa bene Isilaeli kwamyaaka makumi obilo.