Boomboloshi 15 - Baibo Busansulushi Bwa Libuku Ili

Samusoni mbwaakaboosha cishole kubene Filisiti

¹ Mukuya kwanshiku, muciindi cakutebula witi, Samusoni wakaya amwanaampongo mukubona mukaakwe. Mpeeke wakaambila bapongoshi bakwe basankwa ayi, “Ndisuni kwinjila kucipinda ca mukaangu.” Sombi baishi mwanakashi bakamukasha.

² Lyalo bakaambila Samusoni ayi, “Nebo ndakabona anga toomusuni. Aboobo ndakamweebesha kumubyo. Ono sa te mwanike wakwe ngumubotu kwiinda nguwe? Sa inga tooebelimo nguwe?”

³ Mpomunyaawo Samusoni wakaamba ayi, “Luno lweendo mutaŋambi kubica na mbooshe cishole kubene Filisiti.”

⁴ Lyalo Samusoni wakaya mukucata bamwaaba myaanda yotatwe akubaangilila kumicila bobilo bobilo. Wakabika shimunimweenge pakaangilwa micila.

⁵ Ono ndyaakamana kunyansha shimunimweenge, wakabaleka baya mumyuunda ya witi ya bene Filisiti. Bakatenta witi wakaceswa awooyo utakwe kuceswa pantu pomwi ashisamu sha maolifi.

⁶ Lyalo bene Filisiti bakeepusha ayi, “Ino ngani wacita bobulya?” Bamwi bakakumbula ayi, “NguSamusoni, mukwe wa mwine Timuna. Wacita bobulya ceebo bapongoshi bakwe bakeebesha mukaakwe kumubye.” Mpomunyaawo bene Filisiti bakaya batenta mwanakashi uyo abaishi kushikila bafwa.

⁷ Mpeeke Samusoni wakabaambila ayi, “Mbomwacita boobo, ndashomesha cakulumbila kwaamba ayi teshi mulekewo kushikila nkabooshe cishole!”

⁸ Lyalo wakabalwana akucaya bantu baanji. Kuswawaawo wakanyamuka akuya mukwikala mucimfwengo ca mwaandami wa kuEtamu.

Samusoni mbwaakakoma bene Filisiti

⁹ Mpomunyaawo bene Filisiti bakaya mukuyaka misumba yabo mucishi ca Juda akulwana ndabala ya Leyi.

¹⁰ Lyalo bene Juda bakabeepusha ayi, “Ceebonshi mwesa mukutulwana?” Abalo bakakumbula ayi, “Twesa mukwaanga Samusoni akumucita bweenka mbwaakatucita.”

¹¹ Mpeeke bene Juda abo bali 3,000 bakaya kucimfwengo ca kuEtamu akwaambila Samusoni ayi, “Sa tooshi kwaamba ayi bene Filisiti mbobatulela? Ono bona nshewatuletela?” Sombi lakwe wakabakumbula ayi, “Nebo ndakabacita nshebakacita kuli ndime.”

¹² Lyalo bakamwaambila ayi, “Twesa mukukwaanga kwaamba ayi tukutole kubene Filisiti.” Samusoni wakabaambila ayi, “Amushomeshe cakulumbila kwaamba ayi teshi ndimwe mweshi muncaaye.”

¹³ Balo bakamukumbula ayi, “Sobwe, swebo tutookwaangabo akukutola kuli mbabo. Teshi tukucayeewo.” Lyalo bakamwaanga antaambo shipya shobilo akumukusha mucimfwengo umo.

¹⁴ Samusoni ndyaakashika kuLeyi, bene Filisiti bakesa coolobesha kuli nguwe. Mpomunyaawo Mushimu wa Mwaami Lesa wakesa pali nguwe akumupa nkusu. Aboobo wakasutoola ntambo nshaakalinga kwaangitwe mbuli butonje bwacatwa mulilo.

¹⁵ Lyalo wakabwesa mubanga wa mbongolo yakafwa coonoono akucaishako bantu bali 1,000.

¹⁶ Kuswawaawo Samusoni wakatalika kwiimba ayi, “Ndacaya milwi milwi ya bantu amubanga wa mbongolo. Ndacaya bantu bali 1,000 amubanga wa mbongolo.”

¹⁷ Ndyaakamanisha kwiimba, wakasowa mubanga uyo. Lyalo musena uyo wakatumbwa ayi Lamati Leyi nkokwaamba ayi Kalundu ka Mubanga.

¹⁸ Mpeeke Samusoni wakanyumfwa nyotwa, aboobo wakalilila Mwaami Lesa ayi, “Mwakampa nkusu nebo nemusebenshi wanu shakukoma, ono sa mutooyanda kundekelesha ayi mfwe kunyotwa akucatwa kubene Filisiti abo batapalwitwe?”

¹⁹ Mpomunyaawo Mwaami Lesa wakatulula kalyaango panshi kuLeyi kwaamba ayi maanshi aswe. Samusoni wakanwa, aboobo nkusu shakesa alimwi wakayuma. Kantupu ako kakatumbwa ayi Eni Aakole nkokwaamba ayi Kantupu ka wooyo wiita. Abobulya nkokacili kuLeyi.

²⁰ Kuswawaawo Samusoni wakaba moomboloshi wa bene Isilaeli kwamyaaka ili makumi obilo muciindi ca bene Filisiti.