Boomboloshi 14 - Baibo Busansulushi Bwa Libuku Ili

Samusoni amwanakashi wa kuTimuna

¹ Bumwi bushiku Samusoni wakaya kuTimuna uko nkwaakabona mwanakashi cikula bwangu mwine Filisiti.

² Ono ndyaakaboolela kumishaabo wakaambila baishi abanyina ayi, “Ndakabona mwanakashi kuTimuna mwine Filisiti, mukaye mukanjebele.”

³ Lyalo baishi abanyina bakamukumbula ayi, “Sa taaku mwanakashi wa mumukowa wesu nabi pakati ka bantu bene misheesu ngweenga weeba? Ceebonshi ulisuni kweebela kubene Filisiti bantu batashomi Mwaami Lesa?” Sombi Samusoni wakabaambila ayi, “Nebo ngomwanakashi ngoonsuni ayi munjebele ceebo ngowankonda.”

⁴ Bashali bakwe tabakwe kwishiba ayi makani ayo aswa kuMwaami Lesa mukwiinga wakalinga kuyandoola pakubacanina mulandu bene Filisiti. Paciindi ico bene Filisiti mbobakalinga kulela bene Isilaeli.

⁵ Mpomunyaawo Samusoni wakaya kuTimuna abaishi alimwi abanyina. Ono ndibakashika kumyuunda ya minyansa kuTimuna, bakanyumfwa mwanaankalamu kaabuluma.

⁶ Mpeeke Mushimu wa Mwaami Lesa wakesa pali nguwe akumupa nkusu cakwaamba ayi wakaya waikwamuna amaansabo anga ngumuntu utookwamuna mwanaampongo. Sombi taakwe kulwiitawo baishi nabi banyina makani ayo.

⁷ Kuswawaawo Samusoni wakaya mukubandika amwanakashi ulya. Mwanakashi uyo wakamukonda abuumbi.

⁸ Ndipakeenda ciindi Samusoni wakaya mukuleta mwanakashi uyo. Munshila wakapambuka kwaamba ayi abone munyama ulya ngwaakacaya. Mpeeke wakacana mukati mumunyama uyo muli nsuki shicite abuuci.

⁹ Mpomunyaawo wakakusha akubwesa buuci mumaansa kaya bulya. Ndyaakashika kuli baishi abanyina wakabapaawo bumwi, abalo bakalya. Sombi taakwe kubalwiita ayi wabukusha munkalamu ifwite, sobwe.

¹⁰ Lyalo baishi bakaya kumishaabo mwanakashi. Uko Samusoni nkwaakacitila kusekelela kweelana amulawo wa beshibwiinga mbowakalinga.

¹¹ Ono bene Filisiti ndibakamubona bakamuletela bacikula bwangu bali makumi otatwe bakumubandikisha.

¹² Mpeeke Samusoni wakabaambila ayi “Ntoomupa kashimpi. Ono na mukakasansulule munshiku shosanwe ashobilo sha kusekelela, ingayi ndaakupa womwi awomwi pakati kanu mwinjila wa nsalu iteshimite alimwi ashakufwala shibotu shimwi.

¹³ Ono na mwaalilwe kukasansulula, ingayi ndimweshi mukampe minjila ili makumi otatwe alimwi ashakufwala shibotu shimwi shili makumi otatwe.” Lyalo bakamwaambila ayi, “Kakesa.”

¹⁴ Mpomunyaawo wakabaambila ayi, “Mucintu cilya babye mwakaswa cakulya, mucintu cankusu mwakaswa shicite mise.” Panshiku shotatwe bakaalilwa kukasansulula.

¹⁵ Ono pabushiku bwane, bakaambila mukaakwe Samusoni ayi, “Nyengelela ibayo atusansulwite kashimpi. Na ubule kucita boobo, tutookutentela pantu pomwi abamuŋanda ya baiso. Sa mwakatutambila ayi mwise mutupaambe?”

¹⁶ Mpeeke mukaakwe Samusoni wakatalika kulila pameenso akwe akwaamba ayi, “Mwebo mulimpatite, tamunsuniiwo. Ceebonshi mwakapa kashimpi bene misheesu kwakutandwiitawo busansulushi?” Lakwe wakamukumbula ayi, “Bata nabi bama nshina kubalwiitaawo, ino webo inga ndakulwiita buyani?”

¹⁷ Wakamulilila panshiku shosanwe ashobilo sha kusekelela kwabo, sombi pabushiku bwakweelaako wakamusansulwita ceebo wakamupensha pacikani ico. Aboobo mwanakashi wakasansulwita bene mishaabo.

¹⁸ Pabushiku bwasanu ashobilo, lisuba kalitana kupila, bantu ba mundabala iyo bakaambila Samusoni ayi, “Anu nciinshi cicite mise kwiinda buuci? Anu nciinshi cicite nkusu kwiinda nkalamu?” Lyalo Samusoni wakabaambila ayi, “Nemutakwe kulimisha mpwishi yangu, neenga tamukwe kukasansululaawo, sobwe.”

¹⁹ Mpomunyaawo Mushimu wa Mwaami Lesa wakesa pali nguwe akumupa nkusu. Lyalo wakaya kuAshikeloni uko nkwaakacaya bantu makumi otatwe. Wakabanyaya shakufwala shabo shibotu akushipa baabo bakasansulula kashimpi. Kuswawaawo wakaboolela kumishaabo kaakalalite abuumbi.

²⁰ Lyalo baishi muka Samusoni bakamweebesha kumubye uyo wakamushindikila pabwiinga bwakwe.