Boomboloshi 13 - Baibo Busansulushi Bwa Libuku Ili

Kushalwa kwakwe Samusoni

¹ Ono bene Isilaeli bakabisha alimwi pameenso a Mwaami Lesa. Aboobo Mwaami Lesa wakabaaba mumaansa a bene Filisiti kwamyaaka makumi one.

² KuSola kwakalinga muntu umwi mumukowa wakwe Dani wakalinga kwiitwa ayi Manowa. Mukaakwe taakalinga kushala, sobwe.

³ Mpeeke munjelo wa Mwaami Lesa wakesa kuli nguwe akumwaambila ayi, “Bona, uli ŋumba, sombi ulaakumita akushala mwaana musankwa.

⁴ Anu tooelete kunwa waini nabi cakunwa cimwi cikola. Tooelete kulya cakulya cili coonse citasalalite kweelana aMilawo.

⁵ Ulaakumita akushala mwaana musankwa. Mwaana uyo na akashalwe taaelete kuceswa misusu mukwiinga ulaakuba muNasili kuswabo bushiku mbweshi akashalwe. Nkokwaamba ayi ulaakubengwa kuMwaami Lesa. Musankwa uyo ngweshi akatalike mulimo wakufuna bene Isilaeli mumaansa a bene Filisiti.”

⁶ Mpomunyaawo mwanakashi wakaya mukwaambila ibaye ayi, “Muntu wakwe Lesa walinga wesa kuli ndime. Walinga kuboneka anga ngumunjelo wakwe Lesa. Walinga kuloondesha abuumbi. Nshikwe kumwiipusha nkwaaswa, alakwe taakwe kundwiita liina lyakwe.

⁷ Sombi wandwiita kwaamba ayi, ‘Ulaakumita akushala mwaana musankwa. Anu kuswa sunu ucileeke kunwa waini nabi cili coonse cikola alimwi utanoolya cakulya citasalalite kweelana aMilawo, ceebo mwaana uyo ulaakunooli muNasili. Nkokwaamba ayi ulaakubengwa kuMwaami Lesa kuswa bushiku mbweshi akashalwe kushikila akafwe.’ ”

⁸ Mpeeke Manowa wakapaila kuMwaami Lesa ayi, “NoBaami baLesa ndasenga kwaamba ayi muntu ulya ngomwakatuma ese alimwi mukutwiisha nshetweelete kucita kumwaana uyo weshi akashalwe.”

⁹ Ncakwiila Lesa wakanyumfwa kupaila kwakwe Manowa. Aboobo munjelo wa Mwaami Lesa wakesa alimwi kumwanakashi uyo ciindi ndyaakalinga kupumuna mumuunda. Manowa ibaye kaatapo.

¹⁰ Mpomunyaawo mwanakashi uyo wakacicila kuli ibaye akumwaambila ayi, “Amubone! Muntu ulya wakalinga wesa bushiku bulya, asunu ndamubona.”

¹¹ Lyalo Manowa wakanyamuka akukonkela mukaakwe. Ndyaakashika kumuntu uyo wakamwiipusha ayi, “Sa mwebo ndimwe mwakabandika amukaangu.” Alakwe wakakumbula ayi, “Ee, ndime.”

¹² Mpeeke Manowa wakamwiipusha alimwi ayi, “Ono isho nshemwakaamba shaakucitika, mwaana uyo ulaakwikala buuminshi? Alimwi ulaakunoocitanshi?”

¹³ Munjelo wa Mwaami Lesa wakamukumbula ayi, “Mukaako ulyeelete kucita shoonse nshendakamwaambila.

¹⁴ Atakalyi cili coonse ciswa kuminyansa. Taaelete kunwa waini nabi cakunwa cimwi cikola alimwi taaelete kulya cakulya citasalalite kweelana aMilawo. Aakonkele shoonse nshendakamwaambila.”

¹⁵ Mpomunyaawo Manowa wakaambila munjelo wa Mwaami Lesa ayi, “Sa inga tamutulindiliiko tumutelekele mwanaampongo?”

¹⁶ Ono Munjelo wa Mwaami Lesa wakakumbula ayi, “Nabi ndalindila, inga nshiliiwo cakulya ico. Sombi na kamusuni, amubenge mulambu wakutenta kuMwaami Lesa.” Manowa taakwe kwishiba ayi muntu uyo ngumunjelo wa Mwaami Lesa.

¹⁷ Mpeeke Manowa wakeepusha munjelo wa Mwaami Lesa ayi, “Ono ndimwe baani liina? Tulisuni kwaamba ayi tukamulemeke shaakucitika nshemwaamba.”

¹⁸ Munjelo uyo wakakumbula ayi, “Ino liina ndyanshi ndimusuni kwishiba? Liina lyangu lilakankamika.”

¹⁹ Mpomunyaawo Manowa wakatola mwanaampongo pantu pomwi acipo ca fulaulo kuya mukubenga mulambu pamwaandami kuMwaami Lesa. Mwaami Lesa wakacita caankamiko, Manowa amukaakwe kabeebela.

²⁰ Ono bwiishi ndibwakaya mwiculu kuswa pacipaililo, munjelo uyo wakaya kwiculu mubwiishi ubo. Ingayi Manowa amukaakwe babone boobo, bakafukama cakushisha shiwa panshi.

²¹ Kuswawaawo munjelo wa Mwaami Lesa taakwe kubonekaawo alimwi kuli Manowa amukaakwe. Lyalo Manowa wakeshiba ayi ncakwiila ngumunjelo wa Mwaami Lesa.

²² Mpeeke Manowa wakaambila mukaakwe ayi, “Ncakwiila tutoofwa ceebo twaboona Lesa.”

²³ Sombi mukaakwe wakamukumbula ayi, “Mwaami Lesa naalinga kusuni kutucaya neenga taakwe kutambula mulambu wesu wakutenta nabi cipo cesu ca fulaulo. Alimwi naakwiinga taakwe kututondesha nshetwabona nabi kutwaambila nshetwanyumfwa.”

²⁴ Mwanakashi uyo wakashala mwaana musankwa akumutumba ayi Samusoni. Mwaana uyo wakakomena alakwe Lesa wakamupa coolwe.

²⁵ Lyalo Mushimu wa Mwaami Lesa wakatalika kumupa nkusu kaacili kuMaane Dani, pakati ka Sola alimwi aEshitaoli.