Boomboloshi 12 - Baibo Busansulushi Bwa Libuku Ili

Jefuta abene Efuleemu

¹ Mpeeke bene Efuleemu bakabunganya bashilumamba babo, basubuka Mulonga wa Joodani akushika kuSafoni. Lyalo bakaambila Jefuta ayi, “Ceebonshi wakasubuka kuya mukulwana bene Amoni kutatulwiita ayi tuye awebo? Tutookutentela muŋanda.”

² Alakwe wakabakumbula ayi, “Nebo abantu bangu twakaambana abuumbi abene Amoni. Ndakamwiita, sombi mwebo mwakakaka kwisa mukumfuna.

³ Ono ndindakabona ayi mwakaaka, ndakabika buumi mumaansaangu akusubuka mukulwana abene Amoni. Mwaami Lesa wakancafwa aboobo ndakabakoma. Ono ceebonshi mwesa sunu ayi mundwaane?”

⁴ Mpomunyaawo Jefuta wakabunganya bashilumamba boonse ba kuGilyadi kulwana bene Efuleemu akubakoma. Lyalo bene Efuleemu bakaamba ayi “Sa te mwebo nobene Gilyadi nomuli pakati ka bene Efuleemu abene Manase mwakaswa pakati kesu?”

⁵ Lyalo bene Gilyadi bakashinkila pamisena yakusubukilawo Mulonga wa Joodani kuya kucishi ca bene Efuleemu. Ono na mwine Efuleemu usuni kuloboka wasenga ayi asubuke, bakalinga kumwiipusha ayi, “Sa uli mwine Efuleemu?” Na wakumbula ayi, “Sobwe,”

⁶ bakalinga kumwaambila ayi, “Amba ayi, ‘Shiboleti.’ ” Bakalinga kucita boobo ceebo bene Efuleemu bakalinga kwaalilwa kwaamba kabotu liswi ilyo. Abo bakalinga kwaalilwa bakacaikwa kweenka kumusena wakusubukilawo Mulonga wa Joodani. Paciindi ico kwakafwa bantu bali 42,000.

⁷ Jefuta wakalinga moomboloshi wa bene Isilaeli kwamyaaka yosanwe awomwi. Wakafwa akubikwa kumishaabo kuGilyadi.

Ibisani, Eloni aAbudoni

⁸ Jefuta ndyaakafwa, Ibisani wa kuBetileemu wakaba ngomoomboloshi wa bene Isilaeli.

⁹ Ibisani wakalinga kucite baana basankwa makumi otatwe abaana banakashi abalo makumi otatwe. Wakeebesha bana bakwe banakashi kubasankwa ba kushipani sha mumukowa shimwi. Abalo baana basankwa wakabaletela banakashi makumi otatwe ba kushipani sha mumukowa shimwi. Ibisani wakalinga moomboloshi wa bene Isilaeli kwamyaaka yosanwe ayobilo.

¹⁰ Lyalo Ibisani wakafwa akubikwa kuBetileemu.

¹¹ Ibisani ndyaakafwa, Eloni wa kuSebuluni wakaba ngomoomboloshi wa bene Isilaeli kwamyaaka ili likumi.

¹² Lyalo Eloni wakafwa akubikwa kuAijaloni mucishi ca kuSebuluni.

¹³ Eloni ndyaakafwa, Abudoni mwanaakwe Ilelo wa kuPilatoni wakaba ngomoomboloshi wa bene Isilaeli.

¹⁴ Uyo Ilelo wakalinga kucite bana basankwa makumi one abashikulu bakwe basankwa makumi otatwe. Womwi awomwi bakalinga kutanta mbongolo yakwe. Abudoni wakalinga moomboloshi wa bene Isilaeli kwamyaaka yosanwe ayotatwe.

¹⁵ Lyalo Abudoni mwanaakwe Ilelo wakafwa akubikwa kuPilatoni mucishi ca tulundu ca bene Amaleki muEfuleemu.